http://www.vjmedia.com.hk/articles/2014/09/20/85676
【短篇小說】媽，罷課是你教我的！ 2014年9月20日 最新文章綜覽,短篇小說,社會運動 辣椒
（photo via cc Flickr user Mark Anderson）
我2000年入讀小學，當天派到城中名校，媽媽開心到喊，對著報紙傳媒稱說：「我哋每月花三萬元栽培個仔，又上咗一年領洗班，得到天主教領洗證，希望佢大個入投資銀行，最好係Morgan Stanley。」這份剪報，而家重起度。為了令我成材，琴技書畫，游水打波，解難、創意、交際班，一至日，九至五，時間表編得密密麻麻，好係攰囉。
我成績都幾好，次次默書100分。但有一次，一不小心，得了98分。眼看同學都得100分，心裡不是味兒，媽媽更是怒火中燒— —「怎麼得98分？」她質問老師。「真的不能加分？加2分都唔得？俾我個仔默多次，俾返100分啦！」
小四適逢學校80週年紀念，中小學合演大型戲劇，同學穿著小蜜峰小甲蟲的戲服排練表演，勁得意，勁好玩。「老師，點解我個仔唔係王子。」小孩子千千萬萬個，王子得一個。「乜我個仔唔似咩？你地點揀先？咩標準先？咁俾佢做王子個兄弟啦，王子點會無兄弟？」
哈，有得出場走在台中間，感覺就是不一樣。最後，學校多演兩場，還加了很多角色，確保每個同學都有對白。我做的角色是王子的第三個哥哥，句對白係：「嘩！你睇下！」
升中考試，本應一條龍直升，但媽媽話，九龍區有間更好的。媽媽叫菲傭去學校排隊拿表格，又叫我準備才藝表演，我背了一首Lord Byron的英詩，不過面試時校長無問囉。媽媽還弄了一本掟得死人的履歷表，拿去給校長看。我面試了，但學校不收。不過我覺得原校也挺好，可以跟老死一齊升中一。
中二時，我竟然轉校了，原來媽日日到學校門口等校長，等了一個星期，又寄信又送禮，日等夜等，終於等到。「仔！你第時入咗ibank唔好唔記得阿媽呀！」
Ibank? 食得？Ice-cream我就識。不過阿媽的苦心，我細細個就明白，佢教識我，投訴，就有得傾；嘈，就有得拆，不平則鳴就是這個意思吧！我媽就是女俠風骨。
中五，老師、校長都幾鍾意我，我估我有一定贏面……但我竟然做唔到領袖生！都算啦，但估唔到佢地揀陳小明！條友成日匿起廁所都唔知係咪吸毒！我同阿媽講，有無搞錯呀！阿媽話幫我出頭。後來小明被革職，好似話收到匿名信，雖然我都唔係領袖生，但條氣順啲囉。我做唔到點解你做到先？
轉眼間，2014年，我已經20歲，讀緊大學。
學校加宿費，我們坐出來抗爭。
ARRO reg少我一科，我同嗰個死人staff糾纏四天，再去 department，再去學院，佢先破例俾我 reg到。哈，我reg 到，阿強 reg唔到！
重有，嗰個管理員，話我地soc個 counter擺得太出，要警告，警告多幾次就唔准擺。痴線？又無阻住人，學生會都未嘈啦！我哋就係擺出去，咁點呀？係咪宣傳下都唔得吖？
Reg科無耐，大學校園就掛起黑布：答應了30年的民主，為何化為灰燼？
如果大學生可以為了宿費學費reg 科圍校長，點解又唔可以負起更大重任？阿媽教落，有不滿要講，唔可以袋住先。默書100分就係100分；要做主角，我就是主角；要升的名校，早晚都要升。最重要是毅力、堅持，那麼公義就在我手。
我決定罷課。
9月22日，我結起黃絲帶，準備去集會。朝早堂 lecture，唔上啦。
臨出門口，阿媽叫住我：「你係咪去金鐘？阿爺都話唔俾囉！我辛辛苦苦栽培你，學費又咁鬼貴，你唔返學？」
吓！乜唔係你教我，侍應沖杯水唔夠熱，都要爭取，都要講，都要換咖咩？
「你去罷課，就唔好返屋企食飯！有飯，你真係唔食？」
我都費事睬佢。
「媽，個碗都唔係飯，點食呀？」
原來我曾經崇拜的女俠，已經收咗山。
發表於 
返回列表
