| （攝影：陳順禎）(蘋果日報) |
張智霖（Chilam）及泳兒今日喺尖沙咀出席「世界愛滋病日紀念典禮」，兩人獲委任為「愛寧大使」，佢哋喺活動上承諾唔會歧視愛滋病人，又表示與愛滋病人相處，係唔需要忌諱。
對於首度入圍商台叱咤男歌手五強，Chilam坦言從未試過，仲話受寵若驚：「入到五強已對Fans有交代，自己演藝事業呢個階段係雲淡清風，爭勝心唔強。」
咁會否出席頒獎禮？Chilam就話等公司安排，自己未知。講到有指今年好多歌手缺席頒獎禮？Chilam就話：「我會盡我所能，如果我去到的話，又令場面好睇，冇獎我都會去，撐下吖嘛。」
佢話近日忙同佘詩曼拍攝新戲，並於澳門拍外景，佢話：「今次套戲好似行為藝術，平時拍戲趕頭趕命，今次公司自己投資，好有寬裕時間，拍攝時好認真，仲睇到季節轉變。」佢又話聖誕節會同老婆袁詠儀（靚靚）喺韓國度過。
另外，Chilam同靚靚拍強國真人騷節目《一路上有你》，佢話已經拍咗第一集：「好有趣囉，好多嘢自己意想唔到，周圍有鏡頭，睡房都有。」
咁兩公婆做啲乜都畀人見晒？Chilam哈哈大笑話：「瞓覺時可以熄咗佢（鏡頭），想睇除衫嗰啲就冇呀，透明度都好高，不過初頭有啲唔慣，耐咗就都冇理啲鏡頭。」
有冇激嬲靚靚畀佢鬧？Chilam笑謂：「未喎，其實我哋平時唔會扮模範夫妻，嗌交幾咁奇呢？」講到今次呢個騷請到Super Junior及EXO做嘉賓，靚靚可以不停睇靚仔？Chilam話：「係呀，佢慢慢睇，不過佢都唔好阻我睇（靚女）。」
http://hk.apple.nextmedia.com/enews/realtime/20141201/53185455
發表於 
返回列表
