關關難過關關過,十年前我講過呢句說話,終於我過到,今日我再講,我相信勤哥都一定過到,呢幾日好多謝身邊既親朋戚友既支持,十年前我有你地陪我過,十年後仍然係你地,愛係真係需要講出口,所以我真係愛你地架!!仲有勤哥女朋友,呢幾日都以淚洗面,但佢每次都只會偷偷地喊,轉頭大家又再一齊加油,有佢愛勤哥,真係勤哥既福氣!!仲有其他好少聯絡既朋友WHATAPPS問候,差不多全部都係睇住勤哥大既長輩,每一個都支持勤哥,為佢加油,我真係好感激大家!!
我真係寧願受苦既係我!!見到佢插晒喉,個心真係好痛,尋晚我走時同佢講野,佢突然睜大對眼,仲想起身,真係嚇一嚇,好彩醫生話咁短時間唔會令佢再爆,先冇咁驚,但起碼知道佢手腳仍然郁得,心都算定少少!!
或者係傍人眼中,我偏心妹豬,但其實我兩個都一樣咁愛,只係我覺得勤哥係男仔,又大個仔,所以平時好多野唔會講到出口,但我愛佢,佢一定感受到!!我知我阿爸,同埋佢嫲嫲都會係天上面睇住佢,唔會俾佢有事的!我阿媽直頭呢個日都冇心機做野,當然啦,全世界都知,勤哥係佢心肝寶貝,佢既傷心一定比我更多!!
十九年前我諗都冇諗過就將佢帶黎呢個世界,十九年後我都一定唔會多想,一定會照顧佢,生得佢出,就預左照顧佢,所以我已經做好心理準備,將來條路唔易行,但我唔會放棄,因為我知道我身邊所有人都會支持我!!為我打氣!
發表於 
返回列表
