成龍曾經有一句名言:「中國人是要管的」，所以佢決定將個仔交俾內地嘅公安教?
話說前日係國際禁毒日，成龍就喺內地湖南衛視節目《天天向上》以禁毒大使身份去宣揚禁毒訊息，並首次正面談論仔仔房祖名。雖然自從佢個仔房祖名上年吸毒被捕，入獄半年，被好多人批評成龍無資格出任禁毒大使，而佢自己亦有諗過退出。但係佢就話「我做人就是這個樣子，錯了我就認，不錯你打死我，你殺了我，我都不會承認，我覺得這就是男人」。
而講到仔仔房祖名吸毒一事，佢就表示覺得自己對唔住家人，唔係一個好爸爸，但係就覺得自己係個負責任嘅爸爸，又話：「我對得起全世界，卻對不起我的家人。」而佢亦表示好感謝公安喺獄中將房祖名教導得好好，而家佢變得好有手尾，例如會識將對鞋放係應放嘅位置，食完飯又會將啲碗放入洗碗盤，佢仲更加喺獄中睇書寫字寫歌。成龍對此感到十分欣慰，仲話房祖名將咁多年來無做過嘅事係半年入面都做返晒。而最爆嘅係佢仲話房祖名最好每年都返入去坐半年，令到一眾主持和觀眾大感驚訝。
而成龍呢句最新名言當然又成為網民圍剿嘅目標啦！對於成龍話自己係負責任嘅父親，有網民就問:「小龍女是怎麼來的？」亦有網民表示成龍叫祖名每半年返去坐監嘅言論係無理過佢屋企人嘅感受：「祖名聽了，不知如何反應？林鳳嬌聽到了，如何傷心？」 其實與其將個仔交俾人哋管教，不如每日停低十分鐘，聽聽祖名心底話啦！
發表於 
祝大家身體健康
返回列表
