內地古裝宮廷劇《武則天》人靚、衫靚，連劇中主角妝容都係好多女士嘅追捧對象。早前武則天妝就連電話app都要跟風，俾使用者變身成為武則天。但係唔知佢近排呢個特別妝容你又有冇興趣跟呢？
大家有冇發覺上星期五《武則天》講到武媚娘封后嘅時候，嘴角旁邊多咗兩點紅點？相信大部份人都會覺得個妝好奇怪，但係原來喺唐朝呢個妝好流行㗎！
話說當時唐朝嘅女士化妝同現代嘅化妝差唔多，都係會搽粉、畫眉、搽胭脂同搽唇膏等等，但係佢哋就多咗一個叫「面厴」（讀音掩）嘅步驟。面厴就係多咗呢兩點紅點，目的係模仿令人覺得可愛嘅酒窩。當時冇酒窩嘅女性會利用胭脂或兩點好似黃豆咁大嘅「面厴」。但係後來盛唐之後，「面厴」就變得越來越多花樣，有時會畫成錢幣，稱為「錢點」或者畫到好似杏桃咁，名為「杏厴」。更加貪靚嗰啲就會係「面厴」周圍加埋花卉裝飾，稱為「花厴」。
而原來圓點係唐朝更加係有特別嘅象徵意義，就係可以代表宮中妃子嚟月事。由於當時女性比較保守，對呢回事難以啟齒，所以就會係塊面上面點兩點，咁樣就唔會俾皇帝傳侍寢。不過傳下傳下去到民間，就變得十分流行啦！
但係千祈唔好以為就咁樣點兩點好似簡單呀！據講拍攝皇帝李治廷親自幫武則天范冰冰點面厴呢場戲就NG咗好多次，證明要靚都唔係咁易㗎！
發表於 
返回列表
