http://hk.apple.nextmedia.com/enews/realtime/20150727/54020665 |
今年24歲嘅盛女Whitney，前年閃嫁模媽陳靜儀（Mia）前夫莊家傑，上年6月一索得子，生咗囝囝Chalmers後，今年2月宣佈再度有喜，點知5月時B都未生，就突然宣佈離婚!真係「離奇過小說」。當時Whitney就表示呢一胎陀得辛苦過上一胎，24小時都想嘔，好大壓力。
經過咗2個幾月，Whitney又同老公和好喇!仲話咁快同老公莊家傑以及囝囝Chalmers齊齊去影樓影咗一輯靚靚孕照兼全家福，今次Whitney影咗幾個唔同造型，除咗只着內褲，用雙手掩胸嘅美孕照，仲有天使look、黑白貴婦look同公主look等，有啲係一家三口影，有啲就係Whitney畀老公攬到實影嘅甜蜜相，而第一次同媽咪、爹哋，加埋媽咪肚入面個妹妹咁樣影合照嘅Chalmers就全程好興奮，笑到流晒口水好鬼可愛。
Whitney接受我哋電話訪問時話：「係呀！上年都有影呀！但今年特別啲啦！妹妹喺個肚度，又有仔仔，咁一家四口咁，都想留番個紀念。」問佢依家同老公嘅感情係咪已經完全修補？佢就話：「同先生關係有改善到嘅！其實婚姻輔導都畀到好大嘅幫助，所有嘢都比之前更好啦！關係都好咗！」
另外，Whitney之前提過今胎出現胎盤前置，有可能要開刀生，令佢有啲擔心，因為佢希望可以順產生囡囡：「最近照話個胎有升番少少上去，但開刀定順產就仲要等醫生之後再check下。」Whitney又話覺得今次個肚冇上次咁大，佢話：「可能今次陀得無咁好，自己食慾都冇咁好，所以都有食啲花膠，因為聽人講話食咗會長肚，依家食咗又真係覺得大啲喎！」 
 |  5月先話離婚... |  到o依家7月好返喇!咁咪好囉! |
 一家四口(連肚裡BB)影全定福! |  囝囝好興奮! |  Whitney仲好多造型! |
 |  |  嘩，好性感... |
發表於 
咁咪好囉
返回列表
