想生BB 今日: 6|主題: 109258

收藏本版

發帖

返回列表

跳至頁

查看: 4092 | 回覆: 84

從流產三次到BB健康出世之路 [複製鏈接]

12 3 4 5

zillionaire

複式洋房

積分: 378

MommyPanel勳章

1^#

發表於 15-7-31 22:30 |只看該作者 |正序瀏覽 |打印

大家好！我將我嘅故事寫出來，主要係想話比大家知：
只要係女人，都可以生育！

故事好長，希望大家耐心睇完。
2011年，結婚後好快就懷孕成功，每次產檢BB都健康成長，大家都滿懷歡喜期待BB嘅來臨，直至⋯
將臨近四個月之時，發現BB腦蓋骨「生唔埋」，即係有個大窿，而呢個情況，無論你有幾多錢，你都補救唔到，亦做唔到啲乜，醫學上，無嘢做到。
而你只能夠選擇：（1）選擇終止懷孕手術（2）照樣陀BB，佢一日喺子宮內，一日都可以成長。不過，出生後幾小時就會離開你，離開呢個世界。
終於，我差不多崩潰嘅情況下選擇（1）
呢次我喺做全身麻醉括宮手術。

2012年，再次成功懷孕，所有人都話係BB返嚟揾返我喇！於是，又再一次期待⋯
七周，第一次產檢，有心跳㗎！未嚟得及笑就聽到醫生話：唔樂觀呀！心跳得八十幾⋯
Ok，我信BB生命力強，只要有心跳就一定能活下來！
於是，一星期後返去再做多次產檢⋯
結果心跳跳至六十幾，醫生話要做定心理準備。
再一星期後，BB已經回天家，我哋再一次分離。
而今次，我係自己回家食藥流產。

2013年，第三次懷孕。
我決定放鬆自己，唔心急去做產檢，唔比壓力自己，唔比壓力BB，直接book十一周先做第一次產檢。
不過，八周滿時，有一日瞓醒流啡，所以立即去急症室，分流將我排緊急，立即可見醫生，而醫生照聲波後，BB有心跳，不過我仍需留院瞓一晚，等第二朝再照多次。
第二天再照，仍然見到BB有強勁嘅心跳，醫生話我無事可出院，但回家要瞓床休息，我覺得自己好幸運。
不過⋯
兩日後由流啡轉為出血，我立即再去醫院，今次係直接去私家醫院，唸住最多長期瞓院，我唔係啲咩有錢人或濶太，只係可以保住BB嘅話，再多嘅錢我都願意比。
但係去到再照嘅時候，原來BB已經離開咗我，心跳已經停咗，而且個胎位已經下移，醫生話呢個情況就算唔食藥胚胎都會自動流出，而結果係一日後佢已經自己流出，我第三次失去BB。

2014年，開始睇中醫調理身體，唔好問我睇邊個中醫，因為人夾人，我嗰個未必夾到你，而且我亦調理好自己心理，因為前三年我都係自然成孕，所以我相信自己身體無問題，只喺唔夠強壯啫！抱住呢個心態，我比自己休息吓，每星期去見吓中醫，同老公去吓旅行，放縱吓自己，因為我信，有子宮就可以成孕！

2014年11月，唔舒服去睇醫生，原來喺多咗個小生命，今次聽從醫師建議，瞓床至十二周保胎。而小生命今次亦很頑強同強壯！每一日都很健康地成長。

今天，2015年7月，我個BB岀世喇！38周剖腹生產。
BB所有嘢都好健康，無唐氏，無遺傳病，順利出世，無黃胆唔駛照燈，食得瞓得，姑娘仲讚佢好多表情好可愛！我同BB只需要住院4天就可以一齊出院返屋企喇！

因為失去過，所以我更珍惜今日嘅幸福！
但我更加相信，只要你係女人，只要你有個子宮，你就絕對可以生育！

最後，要講比大家知嘅就係：
我今年41歲。

祝福大家！