婆媳關係 今日: 0|主題: 27765

我只係想抒發下自己既感覺，打完篇野之後，心情好番D，冇咁鬱悶，分享有D長，純粹個人意見同感覺，畢竟家家有本難諗的經……..

阿B 剛滿月，其實剛出世的時間真係好開心的。不過,時間耐左，家庭問題開始接踵而來......

外父母是退休人士，得閒無事就會入來我地屋企hea，有時又會入來過夜。之前未有姐姐來佢地會入來幫手家頭細務，叫做搵D細藝。雖然係咁，本身其實兩老都我老婆(包括我)感情都不太好的，因為佢地既價值觀同我地完全相反的，加上佢地好固執，好難相處........

其實為左阿B 既來臨，我地特登請左姐姐同陪月幫手。老實講，我初初都唔中意屋企有個生保人o係屋企，同埋要使唔少錢。但係，源自兩位退休人士左一句話 “自己老喇湊唔掂” ，右一句話 ”退左休想多D時間周圍去玩，唔想困身”
，所以我地先至要使錢搵人幫手......

好喇，請左返來，可能姐姐家務上都算幫到手，對上一份工又有湊過NB經驗(雖然佢唔係好主動，但至少踢一踢都肯郁一郁，算听我同老婆話，起碼好過 “論盡家傭”入面D個案好多)，兩老出于妒忌，同埋或者可能生平第一次有人使，就成日覺得好似要使到佢盡24小時冇停手，工作心態要主動到當自己屋企咁……..其實，我同老婆到目前為止都算滿意姐姐表現，亦都諗到將來要靠佢湊BB, 將心比己，都會想對佢好D, 佢都好識撈地做好自己本份(起碼冇得寸進尺)。但係兩老就成日都唔妥姐姐，攪到我同老婆都覺得兩老得閒冇野做搵野煩，當然最重要，係煩埋我地……..

BB返左屋企，兩老又係無所事事的日日入來我地屋企打躉，一屋人，我同老婆，陪月同姐姐，加埋兩老，對住一個BB仔。老實講，D老人家成日當左自己係湊仔專家咁，成日翹埋雙手O係度指指點點，又話你乜又話7，到自己真係落手去做又雞手鴨腳，抱又抱得唔穩陣(有幾次佢地抱住阿B 差D趺左落來) ，眼高手低……老實講，請陪月返來，除左係照顧媽媽同BB之外，最重要係想全家人跟陪月姐姐學下D正確育兒既野，但係兩老淨係闊佬懶理，覺得”你幾兄弟姊妹都係我湊大架，我唔識湊唔通你呀…..”
我在想，你們...........的而且確係 "專家"，不過這已經是三十幾年前啦，就算係你地o個套都過時啦, 你個年代有冇你地一日到黑都打既手機同CandyCrush oY? ………..其實我好想家人會有多D實習照顧BB既機會，大家交流下，特別係將來當我老婆放完產假，BB D野總得有人做同照顧。一次我準備餵奶時，阿B o係度喊緊，心中覺得自己是宇宙最強的外父o係我隔離當然又o係度指指點點說三道四，好喇，咁我話 “公公不如你試下餵啦…….” 公公一句得埋來 “ 唔喇，廢事陣間你覺得我手勢唔岩你心水你轉個頭話番我………”老婆都在場，即刻呆左…… 唉，大家都係為件事好，大家都想好好照顧阿B，就算真係手勢唔太岩，咪當學D新野囉，大家研究下姐…………o個刻我先感覺到，原來一個人為左面子，係可以大到蓋過左阿B 既福祉………..咁得喇，我同老婆都唔想/唔使旨意你地，寧願靠姐姐(至少陪月一直有特訓姐姐，同埋佢對阿B都算係有愛心，唔係諗住當公仔抱下玩下就算)…………阿B雖然已經過左滿月，礙於面子，公公都未試過餵一次奶，換一次片(其實我地唔會+唔想要求，如果兩老唔介入唔义隻腳埋來我冇所謂的)，淨係識阿B 喊 o個陣抱起佢玩下，到我同老婆抱o個時又話你成日抱會縱壞佢，仲要覺得自己係天下第一抱，一抱即收聲…….唔好太天真啦，bb 平靜o個時你搵個5歲小孩抱都會訓得著，佢心情唔好時就算好專業既陪月姐姐抱都喊。

難忘的第一天接左阿B 返屋企的晚上，兩老o係我地屋企客房過夜，話幫手 “睇” 住阿B。當時屋企咩架步都未set 好，到左零晨一兩點，明明阿B食完成枝奶，掃完風換完片，但係唔肯訓不特只，仲竭斯底里地哭哭鬧鬧(唔係因為肚餓)， o個晚我地來回房間同客廳好多轉，阿B 喊到拆天。結果最終要搞一大輪先tum 到佢訓。我理解外父年紀老邁可能訓得好好听唔到喊聲，冇所謂的，但我估唔到，外母听到阿B零晨一兩點時喊成咁，而佢又醒左(因為第2日佢同我地講番)，而佢竟然冇出來幫手。反而姐姐都被嘈醒左，仲好主動咁出來問有冇野需要幫手，仲提議試下比佢抱抱，安撫下BB等佢快D訓著……..o個個感覺，真的，好雪中送炭，亦都感覺到咩叫袖手旁觀，同埋對咩叫做“幫手 “睇” 住阿B” 有個新既定義 (與其係咁，不如我比個webcam攝影機密碼，你24小時幫我 “睇”住就夠啦……..)

有時真係，如果本身屋企人既關係唔好，而大家想改善大家既關係，就應該唔好見咁多，咁樣大家保持番D距離反而感情可能會緊密D，尤其是老婆產後情緒好唔穩定。但是，兩老經常都好專家地你一句我一句，又或者o係度分享自己教仔有幾叻 (實情佢地另外有兩個仔，但當自己冇生過的) 有時，就算唔係我生完bb，我都會覺得好煩厭，特別是返完成日工想耳根清靜下。其實佢地o係度時我都選擇做隻沉默的羔羊，不過有一次食食下飯老婆真係忍唔住要同佢地開拖。實情係佢地講D無關痛恙既野(煮餸)，但老婆情緒唔穩定，突然間喊起來，跟住話佢地講野好煩，想清靜D食餐飯…….跟住，兩老就唔執輸，你一句我一句，係咁話自己個女，搬哂D道理出來，又話你唔尊重老人家，唔孝順，又話係咪而家連講野既權利都冇，又乜又漆..…..我o個刻諗，就算邊個岩邊個唔著都好，佢岩岩生完情緒唔穩定，咁既情況你地仲o係度刺激佢，o個個點講都係你地個女，係咪想迫到佢真係有精神病你地就最開心? 其後外母仲加鹽加醋，o係facebook 度公開咁數落自己個女，又whatsapp 話佢唔孝順，不斷精神上轟炸佢，唉…….這真的是你們的女兒嗎?

老實講，上一輩同我地呢一代人既價值觀有好多唔同既地方，當中好些小學生都會明白既道理，但係佢地會自以為是…….我會諗，或者好驚，如果第時阿B 真係潛移默化左佢地O個一套的話，後果可能會好不愖設想……..

可能諗得遠左，不過諗番近D，如果老婆遲D返工，兩老又無所事事咁日日入來打躉，而我地又打算安排信得過既姐姐主理湊B的話，可能又會爆發新一輪的家嘈屋閉，永無寧日，最驚係明明我同老婆安排左姐姐負責BB既野同家務，跟住兩老出於妒忌唔抵得又要爭住做，爭來爭去，最终整親阿B……..

其實，兩老自以為自己煮野好得，見人地陪月姐姐煮既又彈三彈四(平心而論係幾好食的)，話人地煮D咁既野比我老婆食好刻薄wor (其實只不過係雪菜肉絲豬腩肉，我都有份食，我覺得唔錯同有營養)…….不錯，兩老煮既野可能用好多貴既食材，但可惜千篇一律，了無新意，淨係以為將所有貴野，如大量花膠、海參、蟲草、冬姑堆砌埋一齊就最好，結果煲完既湯變左個獻…….當然兩老會自high，覺得我地食完要好感動流涕……..我咁講或者係好衰，但係大家坐埋食一餐飯，就算清茶淡飯，只要融洽的話我都覺得已經好滿足，但如果大家感情唔好就算食山珍海味我都唔覺得有味道！

我都唔知應該點處理呢個情況好，畢竟如果是我阿媽的話，我會毫不留情地去”教育”佢，而我媽之後都會好識趣的尊重番後生既空間，但呢個係我老婆既父母，雖然佢同我有著相同既感覺，但佢都唔知可以點解決。老婆都覺得自己好與別不同，因為平常人係同6299過唔去的，但係佢就反而跟自己既父母過唔去……….當然，我只係呻下，畢竟家家有本難諗的經，唯有忍耐下……….