講番嗰張，30年前嘅許志安，同30年前嘅黎明呢張「世紀合照」，去年俾網民loop一次，網民笑安仔當時個look十足阿源咁；噚晚呢張相失驚無神再loop一次，網民反應更熱烈，笑兩人造型似足……係咩就唔講啦，見到就見(個po)。
咁究竟影呢張相嗰陣，係發生咩事嘅呢？
其實呢件事係發生於1986年8月12號，亦即係許志安19歲生日嗰日。當晚發生咗一件事，就係爆出贏咗新秀大賽亞軍嘅安仔，同落選新秀喺尖東一家disco打交!!!
事發翌日，安仔接受傳媒訪問時，直截了當否認打交。當時《城市周刊》都有報道，標題係:
「尖東打架鬧劇‧新秀誓神劈願
同屬一個奶媽‧礙眼動作管他
許志安詞拙 黎明代解釋」
條題係非常之長嘅，亦正如標題所講，當年只有19歲嘅安仔詞拙，唔識表達，當佢話「我冇同人打交」呢句時，記者描述其表情係「欲盡力保持冷靜，但卻教人很易察覺他內心的激動。」
當時黎明就坐喺安仔身旁。30年前，係30年前，黎明已經發揮其關公／公關天份，代安仔向傳媒解畫，指當晚係一班新秀同華星同事去食飯，因為之前大家約定過，邊個得獎就請食飯。咁喺豪苑擦完一餐勁嘅之後，再拉隊去disco跳舞。當晚亦係安仔生日，兩人先去酒廊(嗰陣係咁嗌的!)再落disco join番華星同事。
咁跟住呢？
黎明就話:「冇打交，我哋成班新秀，私底下感情好好，點會無啦啦打起上嚟？而且可能當晚我哋玩得太癲，講嘢又大聲，而且後生仔講嘢嗰陣少不免動作多啲，拉拉扯扯，啲人離遠見到我哋咪以為係打交，其實完全唔係嗰回事。」
黎明發揮完佢嘅公關本色之後，原本神情繃緊嘅安仔係放鬆了不少。(記者形容當時嘅安仔係「有點害羞的男孩子」)至於有指黎明勸交，咁即係咩事？黎明解釋番:「我只係拉住許志安，叫佢唔好爭喇，快啲走啦。可能喺人哋眼中以為我喺度勸緊交啦。」
有黎明幫手舖靚晒下台階，「有點害羞的男孩子」許志安先至講多啲:「其實後生仔玩得癲起上嚟，郁手郁腳難免，不過經過呢次之後，我都唔敢再喺條街玩得太癲。」
那些年青澀的許志安與青澀的黎明，多麼令人懷念。
發表於 
返回列表
