行程篇
好耐無同呀爸呀媽去旅行，帶埋BABY小T去，再加埋奶奶，三老日日見個孫都已經夠晒開心。最初想跟團去桂林，點知似樣啲的團都要三千幾，咁不如去泰國玩，帶住老人家關係，本來都唸住跟團，團費只係$999，但行程唔太岩玩，景點太無聊，咁不如自遊行。
首先去永安找PACKAGE，它的APPS太好用了，但今次想住SERVICE APAERMENT，永安啲房唔太岩，一係太貴，一係地點唔就腳。最後在TRIVAGO找到了EVERGREEN PLACE BANGKOK($8XX/晚)，這間4星酒店位置在市中心，10分鐘到SIAM區，5分鐘內到BST和渡輪碼頭去水門市場，步行30米就有按摩店、小食檔、夜市、SEVEN-ELEVEN…真係好方便。間房就好似間咁，有2間睡房，2個厠所，房間簡潔舒服，廚房有齊食具和爐具，個廳夠晒大，小T開心到跑來跑去，還有個小露台，風景也開揚；而且所有酒店職員很有禮，有問必答；早餐有齊中西泰式，種類不算太多，但3老已認為很豐富，每天也吃到飽飽。
然後再找到EMIRATES做緊去曼谷的PROMOTION，最後俾AIR ASIA或國泰平成三千，4大人加BB總共$60XX。EMIRATES服務好好，當然有BB位揀，上機BB有小禮物，飛機餐好味，最緊要CHECK-IN唔駛排隊。
搞掂機票加酒店，當然到按排行程。我無去過曼谷自遊行，之前同佢去過台北和保和島2次自遊行奶奶都話唔好玩，所以要很勤力爬文(多數也是台灣BLOGERS寫的，而且有關BB的資料不太多，所以我今次自己寫返)和問朋友找資料，希望佢哋玩得開心。其實有一定難度的，他們不喜歡陽光與海灘，不可以太多行街，而且我呀爸不吃辣、薑、蒜，要小心選擇食物。
最後行程是這樣安排：
第一日：(早)金山寺、黎明寺 (午)搭船去唐人街+回酒店休息、按摩 (晚) ASIATIQUE+人妖SHOW
第二日：(早)JIM THOMPSON’S HOUSE (午)搭渡輪去水門市場＋BIGC+ ＋四面佛＋SIAM PARAGON FOOD COURT+
海洋世界 （晚）酒店樓下夜市
第三日：（早）大皇宮 （午）水上市場＋按摩 （晚）SIAM NIRAMIT天使劇場（泰國村＋自助餐＋ＳＨＯＷ）
第四日：（早）JJMARKET (午)機場
今次的行程其實我啲朋友都話無乜去過，所以都介紹下：
金山寺：行幾百級細樓梯，都輕鬆架，ＢＢ同老人家都行到，沿途有啲盤景睇下，幾得意，又有很敲鑼敲鐘，ＢＢ可以玩下，亦可以遠眺附近景色
黎明寺(鄭皇廟)：造工精美，原本有樓梯上寺頂，樓梯好斜，但維修中，我們只上一層，對老人家都幾刺激下 （附近有碼頭去唐人街或其他地方）
唐人街：本來唸住食燕窩，其實又唔覺特別平，反而食咗餐好差勁的中菜，但睇到當地金行人山人海，瞭解了當地黃金市場，有趣。但無必要都係唔好去，可能去FLOWER MARKET仲好
ＡＳＩＡＴＩＱＵＥ＋ＣＡＬＹＰＳＯ人妖ＳＨＯＷ：因為只有３老睇人妖，當然揀啲合家歡場啦，雖然比其他地方貴，但我可以襯佢哋睇ＳＨＯＷ去行街，一舉２得，個場都幾多嘢睇好行，但較貴
JIMTHOPSON’S HOUSE：呢導係一個美國人的故居，都幾有特色，有導遊帶住睇，服務好，舒服 （搭渡輪去水門市場，只１個站，８株／個，地道方便）
ＢＩＧ Ｃ：網上勁推，但３老只買食物，又覺得啲嘢唔夠市集平，不停有說話俾我聽，煩～～
四面佛：奶奶話乜呢個就係呀，我話係呀，但唔去又好似無去過曼谷，順路睇下啦
SIAM PARAGONFOOD COURT：２老自己去買野食，感到困難，但呢度有好多選擇，呀爸算係有野食 （而且落一層就係海洋世界，方便到呢）
海洋世界：好集中，好行過香港海洋公園，之前訂咗飛＄９０／個，都抵玩，因為可以坐玻璃底船，周圍都有位俾人坐，都幾多魚睇，仲可以從上、側、下面多角度睇魚，小Ｔ興奮到不得了，３老都甚為欣賞，因地點實在方便，在市中心大商場底層，仲有４Ｄ短劇睇
夜市：我好回味鴨肉河同串燒，另外大排檔的小炒都好味，又平，但唔幾得叫走辣ＴＩＭ，奶奶都讚好味，但佢擔心衞生，最後我哋無人肚痛
大皇宮：本來是第一日去，但去到先知無開，去前一定要問前台工作人員，仲有的士司機怕塞車，想呃我話早上唔開，叫我先去水上市場，我再去問前台職員，佢哋話早上有開，所以大家要小心。去到真係好多人，小心走失。３老話皇宮好靚，造工精細，靚過故宮；之後仲去睇埋皇后的服裝博物館，都幾好睇，唔駛２個鐘行完。 （走時在大皇宮搭的士，一肚氣，每架都話要５００株，最後屈服了）
水上市場：３老大表欣賞，好多小食檔、花檔，在艇上大排檔吃海鮮大餐很有風味，價錢平宜，奶奶不停買買買、吃吃吃，的士回酒店是咪錶計，１５０株有找，半小時內返到，方便，但只開星期六日
SIAMNIRAWIT：台灣網友大推，所以在香港訂了飛＄２４５／位包自助埋，我覺得唔駛訂ＶＩＰ位，因我們就是坐在ＶＩＰ旁邊，ＨＥＨＥ！有個泰國村，奶奶話係世外桃園喎，其實又無咁誇張，只係展示泰國不同地區的民房、文化特色、小食等，都值得睇下。自助餐一般，普通嘢，但３老又食得開心囉；之後有啲歌舞表演，小Ｔ又衝咗出去跳舞，面皮成吋厚！而個ＳＨＯＷ有水準呀，個台好華麗，有小河在上面，又可以落雨、划艇、放花燈。內容主要講泰國民族的建立，有字幕介紹，很多歌舞表演，出動埋山羊、大象上台，也有少量互動位，呀媽、奶奶睇得開心，呀爸瞓足全場，小Ｔ好努力捱眼瞓睇咗１個鐘，最後瞓天光
ＪＪ ＭＡＲＫＥＴ：只得９０分鐘行，只係行咗好少部份，但足以散盡我所有泰株，ＨＯＨＯ！奶奶不太欣賞，話大陸平好多，唉，唔岩ＣＨＡＮＮＥＬ！呀爸全程推ＢＢ車，毫無怨言，抵錫！（最後搭的士都係咪錶計，１２０株返到酒店，再轉大的士去機場，７００株！２５分鐘抵逹，無塞車）
交通及換錢篇
首先由機場去酒店可以在香港先去ＢＯＯＫ車，朋友教落用ＹＯＵＹＯＵ ＷＩＦＩ，但我無信用咭，最後發現淘寶都有公司都安排到，用繳費鈴俾錢。不幸地，職員打錯日期，我哋無奈多等２０分鐘，總算有架靚靚七人車零晨載我哋返酒店。聽講等的士有排等，可以先訂車。
啲人話泰國成人塞車，ＳＩＡＭ區和大皇宮確係好塞，幾時都咁塞，的士會拒載或開天殺價，要有心理準備。但ＥＶＥＲＧＲＲＥＮ ＰＬＡＣＥ在ＳＩＡＭ外圍，基本都唔塞車。但如果５－７ＰＭ出去，我哋係搭ＢＳＴ，好逼人，唔好用ＢＢ車，嗰次係我哋唯一一次無用Ｂ車出街，其餘都帶車，大皇宮、行唐人街都無大問題。
的士方面，有好多種顏色，搭咁多次，最好係黃綠色的，好少拒載，多數跟咪錶，有顯示司機資料，安全可靠！
的士車費其實真係平，因為我哋５人出行，同搭ＢＳＴ一樣咁多錢，而且截車容易，好方便！
換錢方面，好多人都話去SUPER RICH, 但唔就腳，我哋酒店行5分鐘有間SIAM EXCHANGE聽講都SUPER RICH個滙率一樣咁高，我嗰日對1:4.58。至於機場係1:4.07, 可先換少量, 買7日電話咭約300株內； 大皇宮係1:4.44。 其實仲可以用ATM，記住要先開通，會收手續費共港幣幾十蚊一次，但滙率幾好的，我無試過，但必要時有用!
BB事項篇
1. 早啲訂機票，確保仲有BB位，其實短途都唔會用BB籃(長途就好重要)，但多啲空間俾佢走動，自己又坐得舒服啲。開頭有唸過訂AIR ASIA，但無BB位，再加上俾國泰機更窄，好感恩最後用廉航價訂到AMIRATES，30KG行李，帶個大喼去無煩惱
2. 酒店選擇方面，如人多住宅式確係幾好，可以煮嘢俾BB食，唔駛再帶電煲，地方又夠大;其次一定訂埋自助早餐，好多嘢都岩食。最好有BB遊樂設施，今次間EVERGREEN PLACE都有搖搖馬、彈彈牛同埋個帳蓬，朝朝食完早就放陣電
3. 行程按排當然唔可以太密，一有樓梯就放佢行下，見到有其他細路都放佢出嚟同人玩下，見到成地石仔又程都唔會扭計，未識嘢麻，所以2嵗前帶BB去旅行都幾好，起碼慳唔少機票錢，行程設計唔會太多顧累。當然帶佢哋睇動物，佢哋可以玩到既野，BB會瘋狂跑、跳、叫
4. 去泰國當然要去按摩，但BB、小朋友都不准進入，所以我請人上房按摩的，我嗰間另加100株，SPA都係等小T大個仔先再嘆啦
5. 出出入入都係坐的士啦，因為多數都帶BB車，托住部B車搭BST好唔方便，多數都要上2層樓的樓梯，上上落落，只要唔好揀繁忙時間出去，特別5-7PM，早上9點後我酒店個邊都無塞車
6. 飲食方面我都唔太注重, 佢主要飲樽裝水，我哋都帶定盒裝奶、蛋糕、BABY FOOD做後備；而街邊果汁、串燒佢都有食，整個旅程都無病無痛
7. 帶定簡單玩具、幾本書俾佢睇，喺飛機都唔會嘈住人。而今次佢2程機都瞓足全程咁滯，之前的放電策略非常成功
發表於 
返回列表
