是說fb見到有唔少朋友都去左今個夏水禮，post晒相同埋好多都話好正，終於搵左個星期6同埋老公帶左仔仔去玩。
一入到場，仔仔已經勁興奮係咁話要去玩水，多得老公o係屋企執野執得太高調，仔仔知道左今次去海馬公園有得玩水。興奮到點呢？行去玩水途中經過海洋館，我同仔仔講不如去睇左魚先啦(平時佢超級鍾意睇魚，次次去都要一入去睇一次，臨走再睇多次既)，今次佢係咁講要玩水唔肯入去睇魚！
事不宜遲第一站：
冇錯，就係更衣室XD，O係怡慶坊玩水對面，入面有冷氣，唔驚會焗親，而且唔只分男女，仲有家庭用，入便好闊落下，好似我地咁兩個大人1個小朋友再連埋BB車入都冇問題。
到喇，換完衫對面就係喇！
首先呢，驚ｄ野整濕的話，佢有儲物櫃可以放低野，不過因為一見睇晒，所以如果有貴重野驚唔見又怕整濕可以去佢更衣室隔離個寄存區放低。
不過我都見到有人就咁推住架BB車坐O係位度。
一入到去就見到呢樣：
左右兩邊係小小水流落黎，而點解D人坐左o係中間呢，就係因為咁：
因為每隔幾分鍾上便個大水筒就會倒水落黎，每一次D小朋友都V嘩鬼叫，好鬼興奮，而我第一次都因為冇留意到，企埋左小小就濕左半邊身...
而由於仔仔係比較慢熱，一開始望到呢個moment就轉頭玩左第樣：
呢個係６個噴水拱門，連成１直線。
苜先望下
試下手溫水壓
淋下個頭
再淋埋肚腩仔，完成。之後就ｏ係呢６拱門來回跑左100次...
然後就到噴泉地帶(呢個位我自己叫佢做地雷區XD)
原因係因為如果大人掛住幫小朋友影相冇留意腳下便(我老公)，或者大人掛住同小朋友睇隔離d沙雕(我)，就會比佢突然出擊淋濕左...
O係玩水區入便有幾個超大沙雕，O係玩水對面果度，基本上唔洗搵既，因為大到一入到去企邊度都會望到。大鄉里既我睇到嘩嘩聲囉，完全想像唔到沙都可以整到咁靚！
咁arm果個人仲整緊，仔仔肉緊到話想上去幫佢手...好彩有呢度：
由於仔仔本身勁鍾意玩沙既關係，由之前同沙雕合照已經見到，冇錯，我係帶埋仔仔既私家工具玩既，果度工具係有既，不過張張枱既工具唔一樣，有時會出現小朋友唔夠玩既情況，而之前已經ｏ係fb做好功課既我梗係帶埋私家工具啦！
場入便有2個位玩沙既，1個係上便相咁，比小朋友自由發揮既，而另1個位就係咁：
佢係有人教家長同小朋友一齊整沙雕(好簡單果種啦梗係)，不過呢個好多人排，而且係隔個鍾先開一班既，如果小朋友想玩呢，家長最好一入場就拎左飛先。
玩完沙，就到另1個極受歡迎既重頭戲：
泡泡池！冇錯係泡泡池！
呢個泡泡池計埋泡泡大概40cm高，d泡泡一d都唔少！而且最重要係：佢每隔幾分鍾，就會由上便噴一大堆泡泡落黎：
絕對係又一v嘩鬼叫位！
呢個泡泡池都係我身邊好多家長朋友大讚，玩完之後我都忍唔住大讚：
1, 個泡泡池排隊呢係分左2條隊，由職員度身高去分，所以有2個小朋友既家長要有心理準備可能大B細B要分開玩既，但係真心覺得安排得好，因為年紀唔同大小小既小朋友自然玩得比較放，咁樣分開玩細小小既小朋友都可以盡興！
2, 個個小朋友玩之前都會派個防水鏡比佢地，而且池入便有個沖水位，佢地可以自己沖水(佢地拎來洗手玩手多)，不過會防止佢地有泡泡整到面又要出去洗咁麻煩！
3, 玩完之後沖水位就o係出口，而且有5,6個，唔洗點排隊：
沖身喇！
好！熱身完畢！到玩果個大水筒！
望下落黎未先
唔...呢個算係...綵排??
玩玩下突然問我拎支槍(係呀又係私伙野呀XD)
佢話要射個水筒喎...佢話因為佢已經充滿勇氣！
呢位小朋友...你幾秒之前既勇氣呢...？
其實d相係笑下姐，佢之後就加入左坐等比水淋軍團度，仲拉埋我同老公一齊去...
之後仔仔就玩水＞泡泡池＞玩沙＞玩水無限loop...玩左4個幾鍾...唔係肚餓都唔肯換衫走去玩其他野。
呢個玩水區整體黎講係可以玩足全日囉，同埋真心覺得佢抵讚，一來佢唔係露天，唔會晒到，而且佢果度有好多凳比大人坐低休息下：
二來，佢樣樣野對小朋友都極襟玩，我同幾個媽媽吹水，佢地話佢地果個朝早玩完食完野再玩到而家(果陣2點幾)，不過個場最多人其實係大人坐低既位，我星期六入場不過小朋友都唔算好多，佢地都唔會好迫。
三來，佢果度有幾樣野玩，小朋友唔會點排隊，而唯一要等好耐果個學整沙雕班可以拎玩飛，玩住其他野，夠鍾先過去玩，所以呢度比起機動遊戲真係排少好多好多隊！
不過都有樣野要注意，就係玩水區入便因為地下鋪左防滑墊，係幾吉腳既，好似仔仔玩左一陣都話腳板底痛要著返拖鞋，大人就更加唔洗講，係痛過石春路３倍囉！所以最好去果日著涼鞋/拖鞋去，如果之後玩機動遊戲嫌麻煩呢，可以帶定去，然後對波鞋放落臨時儲物櫃囉。不過真係唔記得帶都唔緊要既，佢出便就有得買，毛巾呀泳衣呀拖鞋呀咩都有。
嘩，淨係寫玩水區都寫左咁長，可能係我太長氣啦XD，之後仲有玩左其他野，不過要留返下次再寫！
發表於 
返回列表
