少年成長今日: 1|主題: 16055

收藏本版

發帖

返回列表

跳至頁

查看: 2462 | 回覆: 2

父子情 [複製鏈接]

csir3290

子爵府

積分: 12251

1^#

發表於 18-5-13 11:44 |只看該作者 |正序瀏覽 |打印

本帖最後由 csir3290 於 18-5-13 11:44 編輯

早兩日請病假喺屋企休息，所以平時由我車阿仔阿女返學嘅責任就變咗要由工人姨姨湊佢哋，嗰日晏晝老婆打電話同我講話阿仔嗰朝早返學又眼濕濕好似想喊咁，老婆出門口嘅時候阿仔已經攬住佢好似唔捨得仲眼濕濕想喊，到返到學校臨入學校嘅時候，工人姨姨話阿仔雖然冇呀發脾氣或者喊曬，但係都係眼濕濕望住工人姨姨好似唔捨得咁。所以嗰日佢哋放學嘅時候，我見精神啲我都去接佢哋放學。返到屋企我靜雞雞問家姐今朝細佬做乜嘢事，原來細佬今朝臨出門口嘅時候靜靜雞入咗嚟我房度裝我，但係因為當時我瞓咗所以唔知，家姐話佢閂埋房門行返出嚟嘅時候就已經眼濕濕。夜晚我老婆搵機會問阿仔做乜事跟今朝又喊，後來我老婆同我講返原來呀仔話今日好掛住爸爸所以臨出門口先至咁樣！我聽到就算病咗都當堂成個人精神曬同心都甜曬。阿仔雖然有陣時都會話覺得我好惡好嚴肅尤其是係教佢哋做功課嘅時候，但係原來我同阿仔阿女嘅感情甚至係我哋全家嘅感情都係非常之好。
我哋中國人嘅社會好多時爸爸比人嘅印像都係好嚴肅好惡唔係好識温柔同表達愛，好多時仔女都係啦黐住媽媽對爸爸嘅感受未必係咁好。但係我覺得做爸爸除咗要喺適當時候發揮威嚴嘅一面但亦都要有溫柔嘅一面。我覺得做爸爸除咗要教仔女之外，亦都要用更多嘅時間陪佢哋一齊玩要走入去仔女嘅生活入面從中培養感情，我對仔女而家雖然已經讀小學，但係我都仍然好享受每一日去抱佢哋同錫佢哋，阿仔阿女都仍然好鍾意畀我同老婆去抱同埋去攬住佢哋，畢竟當仔女一路一路長大做父母可以抱佢哋攬佢哋同錫佢哋嘅時間可以話係越嚟越少。就算好簡單每一晚只係互相挨住睇下電視講下無聊嘢或者玩下無聊IQ題，但係我都覺得呢一個係好好嘅培養感情嘅活動，阿仔阿女近排仲好鍾意幫我同老婆按摩只腳，雖然佢哋都係玩吓玩吓，但係我同老婆都覺得好開心好願意畀佢哋攞嚟玩。有陣時亦都千祈唔好怕無聊，可以用啲時間用啲心機同阿仔阿女一齊玩一齊癲下，其實都係一個好好嘅親子活動。每一晚我都好享受臨瞓前陪佢哋傾下偈，然之後錫佢哋一啖同佢哋講我好愛佢哋然之後先至瞓覺，慢慢久而久之我對仔女每一晚都會同返我哋講好愛我哋，好錫我同媽媽然之後先至瞓覺。
其實我同老婆都冇乜特別諗過要點樣培養同阿仔阿女之間嘅感情，我哋只係知道趁佢哋細個嘅時候要多啲陪佢哋同佢哋一齊玩，要融入佢哋嘅生活入面盡量表達我哋佢哋嘅愛同感情，等佢哋都學識去表達自己嘅感受同埋感情。小朋友嘅愛係最簡單只要佢感受到你對佢嘅愛其實唔需要付出啲乜嘢佢哋都會用佢哋嘅愛去回報返父母同埋佢哋愛俾人。現代嘅父母好著重知識同技能嘅教導，但係可能有時就係忽略咗品德，情感同埋愛嘅教育。