時事熱話 今日: 0|主題: 3950

之前聽到babykingdom仲會有人理性分析，所以註冊個新acc黎留下言，發表唔可以係其他地方講既野。（係，小妹已經失去屬於本人既言論自由）

小妹背景，土生土長香港人，八十後尾，屬於港英政府時期大個班。

細細個就開始睇報紙，由最初娛樂版，到港聞，到國際新聞。由睇一份實體報章到睇幾份網上報章。

回歸前，身邊成個氣氛都好驚回歸，話97後要講國語，唔可以講廣東話，乜都唔可以做，個陣先得十歲八歲，真係超驚。而且對大陸零認知，未返過大陸，淨係知大陸窮，就直頭覺得大陸個個都係賊會偷人野咁。當時社會以至學校，都係有意無意畀個大陸好危險既概念畀大家。

直到十年前返第一次大陸，先覺得唔係大家想像中咁恐怖，相對落後啲同文化低啲，但其實又無大家講到咁得人驚。到近幾年多左返大陸，更加覺得同以往認知係兩回事。

本身逃犯條例原意係好，但不停畀人放大‘送中’，其實好想問一句，如果唔包大陸，條條例係咪就可以順利通過？如果咁既話，就唔係反條例，係反大陸。

相反，如果就算條條例無大陸都唔過，即係條例本身有問題，咁係針對條條例，就唔關送唔送中問題啦。

個人覺得林鄭唔用撒回，用暫緩，用壽終正寢，好明顯係為啖氣為面子，不過，如果目的係唔想條例通過，用咩字眼真係有分別？（唔計條氣順唔順）

任何犯法行為，暴力，都唔應該容忍，白衫打人唔會岩，但點解黑衫破壞立法會、警總、中聯辦、社區設施、係街打相反意見既人，就無人出黎指責佢地？仲要幫佢地護航？更加諷刺既係要求釋放同不能控告佢地，咁樣香港仲有法治？呢種應該叫人治。

如果正常和平合法集會遊行，警察無情情放催淚煙、棍打，呢啲肯定係濫用暴力，但事實呢？係非法集會、非法遊行、非法破壞，之後被驅散制服就話暴力。如果制服後警察仲用過份武力，呢樣係唔岩，係濫權，一樣唔可以合理化。

政府唔聽民意，強行通過就係暴政，但係咪等於街頭暴力出現係合理既呢？

身邊好多黃絲，咬斷警察手指唔講、普通市民被人打唔講、對佢地無利既新聞唔講、將黑白倒轉黎講、破壞社會設施係發洩無錯。直到白衣打人，個個跑出黎一面倒話白衫暴力，但之前既暴力行為，佢地一句都無譴責過，到底有幾雙重標準？

問心，你問我對大陸司法制度有無信心，真係無乜，但我同意修訂逃犯修例，本身件事無錯，但條條例每個細位要再傾，唔好咁急，咨詢期長啲闊啲，針對犯事既野再修窄啲。

大陸呢幾十年事實係進步左好多，但都仲係岩岩起步，香港好多野都相對成熟，但近年開始停滯不前。

今時今日香港既問題，唔係叫下口號可以解決。大家冷靜諗一諗。

後生上唔到車點解？董建華話起八萬五畀人拉落台，曾蔭權就停哂起，咁樓係邊度黎？

買唔到私樓點解？因為自由市場畀人炒推高樓價。身邊見到班人唔儲錢、成日去旅行玩樂換電話、跟住就話畀唔起首期買唔到樓，但就算跌一半，佢地咁既態度同消費模式，一樣買唔起。

至於雙普選，好簡單，第一步都未有，點解想一步登天全部畀哂你揀呢？

近排聽到好多人話要民主、自由，香港只係七百萬人都搞成咁，如果呢個情況放係大陸十三億人口會點，唔難理解點解大陸控制得咁嚴既原因。

成日話政府無回應訴求，政府唔係無回應，係答案唔岩大家心水。感覺好似小朋友要求大人要買玩具車仔畀佢，大人答佢：唔買。小朋友堅持大人無回應，其實回應左，只係個答案唔係小朋友想要。

其實每個人都有言論自由，但點解有其他睇法就會變成五毛、藍屍、廢老、無良知、被起底？

最後想問一句，點解有部份人既自由、民主可以凌駕係別人之上？