善惡到頭終有報，若然未報，只是時晨未到。
有班人為左一己私利，達到自己目的，推人地出黎死，仲要講到大義凜然咁，就算今日法律制裁唔到佢地，他日佢地既人生都會反映出黎。
呢兩個月，先真正明白咩叫是非不分。
修例原意係好，但成件事處理唔好，後續既事處理得更差，無可以否認。
啲人成日話政治問題政治解決，但見到既就係有班人用全香港市民黎做籌碼迫政府屈服，犯法唔拉得、破壞唔畀拉、縱火叫發洩，咁叫政治解決？
修例佢地覺得唔ok，唔畀修；警察驅散非法集結人士，佢地唔批准，唔畀驅；犯法畀人捉到，佢地唔肯承擔責任，就圍警局要求放人。
警察驅散非法集結示威者有無錯？無。
警察濫用武力有無錯？有。
是非黑白好清楚，應該無人唔同意。
咁非法集結有無錯？有。
但佢地話係為‘公義’，你唔可以話佢錯。
咁衝擊破壞立法會、警總、中聯辦、紀律部隊宿舍有無錯？有。
但佢地話係因為官迫民反，所以佢地無錯。
咁破壞社會秩序、刑事毀壞、拆欄杆、剪路燈電線、放火有無錯？有。
但佢地話佢地只係阻擋警方政治拘捕，為‘公義’，你唔可以話佢地錯。
咁非法遊行示威、集會，遊行，阻礙其他道路使用者，先口角，繼而動武，再行私刑，有無錯？有。
但佢地話因為你唔聽佢地講、指示，所以佢地可以‘執法’，佢無錯。
前日話你無回應佢地，佢地圍商場；尋日話你無回應佢地，佢地圍警局；今日話你無回應佢地，佢地圍機場；後日話你地無回應佢地，佢地迫你罷工，搞停哂啲車。
最可怕係傳媒、明星、網路，不停將佢地漂白、美化、加光環。
以前教大家要奉公守法，今日學校、教師教大家為左‘將來、未來’，破壞法治無問題。
以前教大家要尊重別人，今日傳媒教大家非我族類就係垃圾。
以前教大家唔可以鼓吹自殺，今日社交網傳媒教大家消費死人達到目的。
以前教大家咩事都好唔好郁手郁腳，今日教大家踩多兩腳、執行私刑無問題。
以前教大家要有同理心、愛護他人，今日教大家唔撐自己既，燒死人都仲得。
唔好講咩不分黃藍，只有黑白良知，真係好想問一句：良知，你地有過咩？你地所謂既良知只用係你地受惠既事情身上，呢種叫良知咩？
希望畀人洗左腦既，平靜落黎可以清醒；未畀人洗腦既，堅持住，繼續分清是非黑白，憑良心做人。
發表於 
返回列表
