37歲「亞視一姐」薛影儀（阿儀）上個月被爆喺寓所樓下無戴罩，有街坊拍片公審時阿儀起腳踢人，事後警方根據網片資料起訴阿儀一項普通襲擊罪，案件前日提堂，法官判認罪嘅阿儀入獄2周。判刑出乎阿儀意料之外，經理人林寶玉同律師立即安排保釋等候上訴，亞視亦安排今日阿儀見傳媒，仲有fb直播。
不過今日官方記者會好有亞視作風，估你唔到！全程大約只有3分鐘，同金鐘坐地鐵過海差唔多。阿儀身穿白色喱士長袖衫配黑色短裙示人，有帶口罩。
踢人被判監 「亞視一姐」薛影儀鞠躬道歉 記者會3分鐘收工
經理人林寶玉表示阿儀正在保釋等候上訴，佢話作為經理人都要負上責任，因為阿儀身為公眾人物，要注意個人言行，之後林寶玉俾阿儀講兩句。結果阿儀真係只係講兩句「唔好意思，呢件事對大家帶來好多麻煩」，隨後就鞠躬道歉。
林寶玉再發言，話亞視日後會盡力貢獻社會，幫助更多有需要嘅人，佢同阿儀有今次經歷之後都會令自己變得更好，由於事件進入司法階段所以不便評論。林寶玉同阿儀一齊起身向傳媒鞠躬，並宣布記者會完畢，但有安排到場傳媒再作圍訪。值得一提係，大會安排嘅咪高峰十分「拆聲」，令網民聽得好辛苦。
發表於 
返回列表
