位於紅磡x工大學入面既X工大學視力檢查嘅痛苦經歷，希望唔好有下一位受害者。
我個小朋友剛剛滿四歲，好多媽媽都話係時候帶佢去驗眼睇吓佢需唔需要戴眼鏡，所以就約咗x工大學嘅視光診所同佢做一個檢查，當時佢話$800可以搵註冊視光師，$400可以搵實習視光師，我選擇左貴啲嘅，兒科註冊視光師。
當日一入到去登記完，就有一位女士帶我個小朋友用三部儀器檢查眼睛。開始小朋友都好合作，之後又有一位男視光師出嚟，佢就帶咗我個小朋友入房做檢查，然後佢又話要落藥水放瞳孔，再出去用嗰三部儀器重新檢查。
重點來了，那位視光師不停按着我小朋友的頭在其中一部儀器上，花了很多時間，然後突然叫我走過去說：媽媽你看看他的視神經有問題，指數非常之高，要轉介去看眼科醫生，平時佢有冇頭痛或者嘔？那我就說：沒有呀！佢話咁細個小朋友都可能唔識講，咁我話沒問題你給我寫轉介信吧！
再等了一會，佢將轉介信和眼底相片俾我，突然同我講：媽媽你現在馬上去急症室吧！我說：有那麼緊急嗎？視光師說：是的這個是緊急情況，擔心佢腦裏面有些東西壓着雙眼，所以出現這個不正常指數，你快點去看醫生吧！
我嚇得馬上打電話俾工作中嘅老公叫佢趕過來私家醫院急症室，然後即時轉介眼科。但是眼科醫生跟我說這間理工大學是黑店啊！經常做一些冇必要嘅檢查，這麼小的孩子根本不需要做這個檢查，他的眼睛還在發育中，出現以上嘅指數也是正常。
我同老公俾佢哋搞到非常之混亂，一個話我小朋友可能腦裏邊可能有個瘤，一個話我小朋友冇事。為咗審慎起見，我哋最終都同醫生講不如照樣同佢做一個腦部磁力共振。
我小朋友喺做磁力共振當日，因為又要打鹽水豆又要抽血已經哭成淚人，最後因為磁力共振嘅聲音太恐怖太受驚，仲要幾個醫護按在磁力共振上打鎮定劑先至送到佢入去做磁力共振，食完安眠藥嘅副作用仲令佢醒來時不停話好頭暈好頭暈…我哋兩公婆都心痛到不得了。而我哋最嬲嘅係照完磁力共振出嚟嘅結果係一切正常，咩事都冇！
先唔好講整個過程我哋用咗三、四萬蚊，無啦啦將一個身體健康冇病冇痛嘅小朋友，講到好似患上絕症咁，要佢即刻去急症室睇醫生，知唔知會令到父母有幾擔心？又知唔知小朋友因為咁白白受咗幾多嘅身體同心靈上嘅折磨？
我真係好想知道x工大學視光師點解會做一啲眼科醫生認為不必要嘅檢查？根據該視光師講我小朋友只是做常規檢查，而間中都會有小朋友出現呢啲情況，究竟年中又有幾多個小朋友同我嘅小朋友一樣，因為比佢哋誤導而身心受害？
發表於 
大家都對視光師唔了解，睇醫生仲可以claim，睇視光師係無得claim
返回列表
