「細粒妹」向來做慣外賣，幾遠都送，一次常規開工竟然俾「阿尊」𥄫 中，初時「細粒妹」唔多識「阿尊」係邊位，但送得幾次外賣，見對方靚仔住得又富貴，雖然貼士唔多，勝在係熟客，又唔太難招呼，如是者外賣咗成年。
最抵死有次唔知點解兩個人出街食飯被斷正，由屋企開始就被狗仔跟足全程，論背景身份「細粒妹」真係無可能，但當時「阿尊」媽咪身體一直麻麻，幾個仔無個肯成家立室，向來孝順嘅「阿尊」把心一橫，實行自己踢爆同「細粒妹」係戀人關係，而且定埋婚期係半年後。
「細粒妹」點諗？無所謂啦，自己又唔係出身矜貴，可以嫁知名人士，直情光宗耀祖啦，加埋尊媽成日話「細粒妹」靚女後生有福氣，最好婚後三年抱兩，繼後香燈。「細粒妹」以為「阿尊」行頭勁又住得富貴，做佢老婆唔會太刻薄，而且一直都有工作，人氣唔錯，加埋老本成屋人都可以過啲好日子。
弊在婚後先知「阿尊」有不良嗜好，成日搏殺到唔知天昏地暗，阿媽鬧都當耳邊風，所以家用都俾得手緊，早排外父想搵女婿支持下置業都無表示，「細粒妹」真係有啲嬲。為哄番老婆，「阿尊」即刻出咗張附屬咭俾佢話任簽，「細粒妹」覺得總算等到出頭天，終於可以有私己錢用吓買吓。
有咭唔用點對得住班姊妹，「細粒妹」叫晒班同行出嚟，畢竟佢係最風光嘅一個。成班女人喺高級餐廳飲飽食醉之後，「細粒妹」諗住去買個恨咗好耐嘅名牌手袋，仲有一件大褸，條數加埋都未夠10萬，找數時店員好尷尬咁同「細粒妹」講話超額碌唔到，最瘀係大家都知「細粒妹」老公係邊位，店員叫佢一係買袋一係買褸，成班姊妹望住「細粒妹」嘅恥笑眼神，佢呢世都應該唔會忘記，勁在佢返屋企粒聲唔出，因為佢心諗，「阿尊」一定比自己早死，只要唔離婚，自己最後都係大贏家
發表於 
任佢亂作都得，又唔使開估
返回列表
