黎芷珊於演藝圈人脈極廣，2012年膽粗粗拎住自己構思嘅訪問節目計劃書，包括心目中可以接受訪問嘅名單畀TVB高層睇，造就個人清談節目《最佳男主角》嘅誕生，更憑節目於2012年勇奪「最佳節目主持」及後再加碼《最佳女主角》節目。近日就有網民批評黎芷珊於熱播節目《芷珊約您》嘅表現唔係好理想，指佢請到星級嘉賓但唔識得問問題。
有網民覺得《芷珊約您》節目形式麻麻，以往請嘉賓坐定定錄影厰傾計仲好睇，不過更大問題係對於黎芷珊訪問技巧感失望，指唔係想睇佢本電話簿有幾厚，除咗直斥「畀一個小秘密我」環節無料爆，更指黎芷珊經常以「真係㗎」應對星級嘉賓各種答案，同時內容唔入肉，舉例許志安罕有提到2019年發生嘅「安心偷食」事件係一世嘅傷，網民覺得黎芷珊為保持與許志安友好關係而無深入追問；又有網民指睇完楊千嬅嗰集覺得黎芷珊為討好受訪者而讀稿，節目組更刻意用楊千嬅喊得肉酸嘅畫面譁眾取寵。今次黎芷珊主持《芷珊約您》雖然被批評，但都有唔少網民為佢平反：「我覺得好好睇喎，真係全靠佢訪問，令到我哋對嗰啲藝人改觀」、「本身是演員，而不是主持出身，表現是好是差難有標準」、「唔啱睇咪唔好睇，想佢下下問辛辣嘢，然後變成，全為討好網民？」、「甘都要插？唔鍾意未唔好睇囉，仲幫人收視」、「支持芷珊+製作組，你哋能做到跟著不同歌手演唱會，仲能係被訪客演唱會中抽出時間接收訪問（勁）」等等。
其實黎芷珊早年都曾被唔少網民批評其訪問技巧，網上討論區有網民曾出PO討論，認為佢成日反被嘉賓主導，嘉賓答乜都照單全收，僅人面較廣而成功邀請到星級嘉賓：「佢訪問嘉賓一係就說真係架，一係就大笑，但笑得好假。反而獨自對鏡頭講對嘉賓感覺就ok」、「佢基本上係一個不及格的主持，個節目常常反被嘉賓主導,又唔識追問，嘉賓答乜，都照單全收」、「吓！真係架？／係呀！（疑問語氣）／哈哈哈哈／（重覆嘉賓說話） 完全唔識做主持......」等等。
發表於 
人就唔黑人憎，但無乜技巧。
返回列表
