少年成長今日: 0|主題: 16026

收藏本版

回覆發帖

返回列表

跳至頁

查看: 18016 | 回覆: 0

食飯 [複製鏈接]

csir3290

子爵府

積分: 12098

1^#

發表於 25-2-16 11:34 |只看該作者 |正序瀏覽 |打印

早幾日放假一家人出街食飯，見到一個景象令到我哋一家人多咗個話題。話說我哋去咗九龍塘一個大商場其中一間餐廳食飯，間餐廳平日都好多人幫襯，我哋入到去坐低咗之後，傾傾下偈就發現咗一件好奇怪嘅事，隔離枱一家四口應該係爸爸媽媽同埋一對大約八九歲嘅仔女，點解會留意佢哋呢？因為傾傾下偈我哋就聽到好似人哋睇緊電視嘅聲音，望一望過隔離枱就見到原來嗰一家四口，阿爸阿媽各人一部手機喺度睇緊，佢對仔女面前亦都各自放咗一部ipad，原來對仔女喺度睇緊卡通片，但係又冇用耳機，而果到又可能比較嘈所以佢哋開到部機好大聲，好大可能就係因為阿爸阿媽想專心睇自己部手機，所以就畀埋對仔女喺度一路睇自己部ipad，而可能因為佢哋睇緊嘅嘢實在太吸引，所以淨係見到對仔女面前嗰啲食物都冇食過，隔咗一陣個爸爸睇完手機可能發覺個女都未開始食嘢，個阿爸就坐埋佢個女身邊逐啖逐啖咁餵個女，講真個女都七八歲，但係隻眼就只係望住部ipad，阿爸放隻羹埋去，佢就擘大個口食一啖。但係呢個都未算特別，因為冇耐我哋後面張枱就坐咗一個小朋友喺度，佢自己一個坐咗一張二人枱，開頭我哋都以為大人去咗洗手間行開咗，點解佢吸引我哋注意呢？因為我哋見到個細路仔自己喺度揸住個餐牌同個侍應喺度點餐，我哋見到個侍應開頭都有啲猶疑，到個小朋友點完餐之後，個侍應行開咗仲同佢其他同事喺度講，幫唔幫個細路仔落單。因為好似等咗成五至十分鐘都未見佢家長返嚟。個細路仔又好乖落完order之後就自己一個坐喺度又係睇住部電話。到啲食物嚟咗佢自己就一路睇住電話一路食嘢。可能側邊嘅人都留意到，都覺得有啲奇怪，點解一個幾歲嘅細路仔可以自己一個坐喺餐廳度點餐然之後自己食呢！又過咗一陣之後，我哋就見到間唔中就有個工人坐入嚟同個細路一齊坐，但係個工人又唔係長期坐喺度陪個細路仔食嘢，又隔咗一陣又有個大人走埋嚟同佢傾咗一陣，跟住就由得個細路仔自己繼續坐喺度食嘢。咁我哋食完就離開，但係行到門口嘅時候，我老婆同我講話留心到近門口嘅其中一張枱，坐喺度嗰個成年人就係頭先入去同個細路仔講嘢嘅嗰一個，佢話個成年人應該同埋另外兩三個成年人帶住幾個細路坐喺一張長枱度，但係就係唔明點解會留低另外嗰個喺入面自己一個食嘢。
食完飯走咗之後，我都仲有講話呢個景象真係好奇怪，一個細路為咗睇iPad，就要個家長一啖一啖咁餵落個口度先至肯食，而另一個就可以獨立到自己一個落order然之後食嘢。呢兩張枱嘅細路仔望落去其實年紀差唔多，總之都係十歲樓下，但係佢哋各自嘅家長教細路仔嘅方法就真係好特別。有陣時家長教細路仔嘅方法，真係好令人費解，令人摸不著頭腦。