少年成長今日: 4|主題: 16023

收藏本版

回覆發帖

返回列表

跳至頁

查看: 22387 | 回覆: 0

做乜都唔順眼 [複製鏈接]

csir3290

子爵府

積分: 12083

1^#

發表於 25-3-23 12:01 |只看該作者 |正序瀏覽 |打印

仔女去到青春期，父母可能會發覺好似自己做乜嘢仔女都唔欣賞，好似做親啲乜嘢啲仔女都覺得煩，但係父母問心其實做好多嘢都係為仔女著想為佢哋好，但係做極都好似唔啱佢哋心意，唔好話要求佢哋一句多謝，就係連一個欣賞嘅眼神都冇，唔反白眼或者覺得煩厭已經好好。親子之間好多時嘅拗撬就係咁樣產生，父母覺得自己為仔女做咗好多嘢，但係仔女一啲都唔欣賞而且有陣時仲覺得煩厭添。
造成呢個局面其實有好多原因，最簡單可以係好多時都係父母由自己出發，未必諗到仔女係咪真係需要。但係我今日想講嘅係另外一個原因，就係好可能喺仔女嘅成長入面，父母根本就冇教過仔女點樣去欣賞對方。正如我成日都講，要挑剔係好容易，找錯處永遠都易過搵做得啱嘅地方。有啲父母可能會覺得只係做啱少少嘢，需唔需要讚咁大件事呀！而且父母覺得做啱係應該嘅，做錯就應該要罰，咁所以既然係應該嘅，使乜要有讚賞呢！但係既然你自細都唔教啲細路仔要欣賞對方，唔教佢哋點樣去讚賞點樣去表達，咁仔女又點會自動懂得去表達讚賞同埋欣賞呢！再加上仔女去到青春期嘅時候，好多時都有自己嘅諗法，父母係呢個時候要搵到佢哋做得唔順眼嘅地方，可以話非常容易，但係如果我哋樣樣都只係挑剔，樣樣都用找錯住嘅心態，再加上父母自己又唔懂得表達，咁仔女自自然然亦都係學會同父母一樣。再者，父母可能會覺得，咁佢做錯嘢唔通唔話佢咩，唔通由得佢繼續做錯？咁我都明白，但係當細路仔長期係一個負面嘅諗法入面成長嘅時候，可能佢只會學懂點樣避開做錯，但係就絕對唔會學懂點樣去互相欣賞。所以我自己有陣時都會覺得要教細路仔唔好做錯嘢，其實係適當嘅時候應該用相反嘅方法，就係讚賞去做啱嘅嘢，學術啲嚟講，可以叫做正面加強法，多啲欣賞同埋讚賞佢哋做得啱嘅地方，滿足細路仔鍾意被讚賞嘅渴求，從而令到佢哋追求做得更好。如果個細路仔做嘢嘅出發點只有為咗避開唔好畀人鬧，咁並唔會令到佢想追求做得更好。但係相反如果佢哋係出至於為咗追求進步，追求做得更好，而父母從旁亦都能夠鼓勵佢哋懂得欣賞佢哋嘅進步，咁樣對佢哋嘅成長就有好大嘅幫助。

所以去到青春期嘅時候，如果父母都仲係覺得仔女好似唔懂得父母嘅心意，父母好似做親啲乜嘢佢哋都反感嘅時候，父母有冇調返轉又會諗下，其實自己又有冇嘗試去欣賞仔女做得好嘅地方，有冇嘗試盡力去搵到仔女一啲啲嘅進步，有冇嘗試去同仔女表達自己嘅欣賞。我覺得所有嘅嘢都係相輔相乘，仔女見到父母懂得欣賞自己，其實佢哋亦都會慢慢懂得用同樣嘅心態去面對家長。