少年成長今日: 0|主題: 16038

收藏本版

回覆發帖

返回列表

跳至頁

查看: 37459 | 回覆: 4

仔女不願意傾訴的原因 [複製鏈接]

csir3290

子爵府

積分: 12166

1^#

發表於 25-4-27 11:56 |只看該作者 |正序瀏覽 |打印

公眾假期喺屋企冇嘢做碌吓社交平台，突然間睇到有個年輕人喺社交平台度發咗個貼文，佢只係講咗兩句說話，但就引嚟好多留言，嗰兩句說話大意就係話「同父母傾訴問題，好大可能會引嚟更大嘅問題」，就只係呢兩句說話，但係就引嚟好多嘅回應，大部分都係同意呢個貼文嘅講法。當然亦因為呢個社交平台係而家新興大部分都係年輕人用家，所以大部分回應嘅都係年輕人。

其實呢句說話我諗都反映咗好多年輕人去到青春期時候，同父母相處嘅一啲擔心。自己諗返自己做細路仔嘅時候，其實都好怕同父母講自己心入面嘅諗法同埋問題。父母作為成年人好多時對後生仔嘅諗法都係覺得佢哋唔成熟，諗嘢唔全面。而好多時父母都係用咗一個批判嘅心態去同仔女傾計，如果仔女講嘅係一啲唔開心嘅嘢，就會覺得佢哋只係為咗啲雞毛蒜皮嘅諗法唔開心，又或者硬係要啲仔女跟自己嘅諗法去做，但正正就係呢啲心態，所以令到啲仔女覺得同父母傾可能就會引發更大嘅問題。所以其實而家做父母更加要學習做一個好嘅聆聽者，好多時不論係仔女又好其他人都好，搵我哋傾訴問題好多時未必係想聽我哋嘅意見，反而只係想有人聽下佢哋講嘢，畀佢哋抒發一吓，未必需要一定去批判佢哋呢個諗法係啱定錯，但係更重要嘅反而係畀到支持同埋安慰，做父母要學習點樣去聆聽，但係偏偏好多時仔女未講完，父母已經插把口加唔同嘅意見，覺得仔女嘅諗法有乜嘢問題，但係正正就係咁樣就令到啲仔女越嚟越唔想同自己講嘢。因為仔女有陣時只不過係想得到認同同埋支持，唔開心嘅時候得到安慰。至於問父母意見，有陣時除咗怕父母擔心之外，更重要嘅就係怕咗父母畀咗意見之後就一定要跟父母嘅諗法去做。因為好多時父母都會覺得自己作為成年人畀嘅意見先至係最好最正確嘅，而且亦都係為咗仔女著想，所以仔女就應該要跟父母嘅諗法同埋意見去做。但係正如我成日都講，其實畀咗意見之後更重要嘅就係應該畀仔女自己去選擇，而且要尊重佢哋嘅選擇，只有咁樣仔女先至願意聆聽我哋嘅意見。另外，仔女好多時最怕嘅就係父母問長問短，我明白好多時父母嘅問都係因為關心同埋緊張，但係父母既然已經畀咗意見，就應該畀仔女自己決定，如果仔女再有需要嘅，自然就會再問父母再傾。如果我哋成日問長問短，其實好多時嘅心態就只不過係想知道個仔女有冇跟住自己嘅意見去做，咁只會令到仔女更加反感。

我自己都對呢個貼文都做一啲反思，真係要提醒自己唔好成為仔女嘅下一個問題，做父母真係要學習做一個好嘅聆聽者，要令到仔女肯主動同自己傾，就要父母肯主動學習點樣去聆聽同埋點樣去畀意見，同埋要有開放嘅心胸。唔好令到仔女因為怕咗我哋而唔再同我哋傾偈。