少年成長今日: 0|主題: 16033

收藏本版

回覆發帖

返回列表

跳至頁

查看: 2041 | 回覆: 0

帶去玩定陪去玩 [複製鏈接]

csir3290

子爵府

積分: 12138

1^#

發表於 6 天前 |只看該作者 |正序瀏覽 |打印

剛剛開學，早幾日阿女食晏嘅時候whatsapp我哋，同我哋講話佢今年學校要去佛山交流兩日一夜。要去境外交流對阿女嚟講係幾唔鍾意嘅事，所以今年開學一聽到公民科老師講話今年要去佛山交流嘅消息，佢都等唔切等我哋放工返到屋企先同我哋講，食晏就已經要即刻whatsapp我哋，仲要加一個唔開心嘅表情。返到屋企佢當然有再講下啦，不過因為係學校嘅安排，雖然佢唔係咁鍾意但係佢都一定會去。

其實之前都有同阿女講過會唔會參加學校啲交流團，因為佢由中一至中四，其實都無去過，佢學校有陣時有啲去韓國，日本甚或似乎歐洲嘅交流團，都曾經問過阿女想唔想去。我哋同阿女講話咪當同啲朋友一齊去下旅行囉！但係阿女畀我哋嘅答案竟然係如果要同人去旅行，佢淨係想同我哋去旅行，因為佢覺得同我哋去旅行開心啲。所以佢都幾唔想參加學校啲交流團。阿女呢個答案我哋當然開心啦，證明佢都仲係好想同我哋一齊去唔同嘅地方，仲鍾意同我哋一齊出去玩。

有乜嘢原因會導致阿女有呢個諗法呢？我自己就諗其實好主要嘅原因係佢兩姊弟就算到而家咁大個，如果同我哋一齊去玩我哋都係同佢哋一齊玩。呢句說話好似有啲奇怪，因為好多家長都會帶細路仔出去玩，但係分別係，點解有陣時到仔女長大嘅時候，就會開始越嚟越唔需要家長一齊陪伴，甚至乎已經唔再想同家長出街呢？我覺得問題係在於家長同細路仔一齊出街玩，究竟係只係帶佢哋去玩，定係陪埋佢哋一齊去玩呢？一個好具體嘅例子，好似阿仔阿女細個我哋同佢哋去公園玩咁，究竟我哋只係帶咗佢去公園，然之後就由得個細路仔喺家長嘅目光之下喺公園自己玩，定係你會陪佢哋一齊玩呢？我自己帶阿仔阿女去公園就一定會同佢哋喺公園一齊玩，會追下佢哋，會同佢一齊玩韆鞦，到大個啲嘅時候會就同佢哋喺公園玩捉，總之帶佢哋去親公園玩，我同老婆就一定唔會只係坐喺公園側邊睇住部手機，然之後由得佢哋自己喺公園玩。我成日都同老婆講，同佢哋去公園玩好似自己做咗一輪劇烈運動咁。所以自細佢兩個都一路好鍾意同我哋去公園玩，因為一定會同我哋玩得好開心。好喇都大個同佢哋一齊出街玩，例如好似去啲主題樂園咁，其實我哋都訓練到佢兩姊弟我哋鍾意玩乜佢哋就玩乜嘢，我哋有啲乜嘢唔敢玩佢哋到宜家都唔係敢玩。例如我同老婆都唔鍾意玩過山車甚至乎係驚添，所以佢兩個從來都唔會叫我哋玩過山車而我哋亦都唔會畀佢哋自己去玩。反而喺主題樂園我哋玩親嘅機動遊戲都會係全家一齊玩，就算嗰啲好幼稚嘅騎木馬我哋都一定會係全家一齊玩。又或者好似去旅行咁，喺玩嘅時間我哋一定會四個一齊玩，絕對唔會各自喺度睇電話。我哋參加旅行團時我都見過有啲十幾歲嘅細路仔，就算跟埋爸爸媽媽一齊去旅行團，都可能已經係各自睇自己嘅手機，去到玩嘅地方有陣時甚至乎係啲細路仔自己玩，阿爸阿媽就搵地方等佢哋。其實講到最尾，問題就係在於究竟父母只係帶仔女去玩，定係同佢哋一齊去玩！如果要想仔女keep住想同父母一齊去玩嘅話，最重要就係由仔女細個開始，父母就要同仔女一齊玩得投入，要成為仔女嘅玩伴。唔好成日覺得同細個嘅仔女玩佢哋玩埋啲嘢好幼稚，又或者嘥時間同浪費體力。到仔女大個啲，又覺得仔女玩啲嘢自己唔識，或者唔鍾意，其實呢一啲全部都係一啲父母畀自己嘅藉口，慢慢令到仔女唔再需要同父母一齊玩。

諗返以前同對仔女玩埋啲低能幼稚嘢，反而可以令自己忘卻有陣時喺工作上面嘅煩惱，咪當做運動囉！到佢哋大個啲，佢哋玩嘅嘢我哋可能未必全部都識，但係學下聽吓佢哋講，又嘗試一齊玩吓，其實都當係開闊下自己嘅眼界。做家長千祈要記住唔好只係帶細路仔去玩，記住係要同佢哋一齊玩！透過玩先至最能夠培養到大家嘅感情！

0 0 0

私人傳訊回覆引用

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 0|主題: 16033

少年成長今日: 0|主題: 16033