少年成長今日: 3|主題: 16130

收藏本版

回覆發帖

返回列表

跳至頁

查看: 17251 | 回覆: 0

家長性格 [複製鏈接]

csir3290

子爵府

積分: 12774

1^#

發表於 25-11-16 11:49 |只看該作者 |正序瀏覽 |打印

開學到而家，學童自殺問題好似越嚟越嚴重咁，呢啲新聞我諗冇人想聽到。早兩日同教書嘅朋友食飯都傾開，佢話佢學校近排對呢樣嘢都好緊張，據佢講今年中一其中有兩個新生，呢兩個新生喺小學嘅時候都曾經講過話想自殺，其中一個仲曾經行過上學校高層嘅走廊徘徊，自此呢兩個學生喺小學得到特別嘅關顧，到佢哋升到去我朋友嘅中學嘅時候，聽我朋友講開學冇耐就要所有有教呢兩個學生嘅老師開會，商討處理呢兩位學生嘅情況，我朋友講話佢校長提醒啲老師，唔可以追功課追得咁緊，默書測驗亦都要畀一啲酌情呢兩個學生。我朋友仲話雖然佢校長話唔可以逼得咁緊，但係又補充返話提醒啲同事唔可以做到好似放棄佢哋兩個咁，乜嘢都唔追，因為咁樣又會容易令到嗰兩個學生覺得人哋放棄佢。我朋友話做又難唔做又難，條線都唔知點拿捏，最慘就係佢教嗰啲係主科，真係有功課同默書測驗要做，唔追佢哋，其他學生見到又會問點解，追佢哋又驚因為咁而引起佢哋又話要生要死，我朋友都係話暫時都只係見步行步，因為佢話嗰兩個學生都真係唔係幾合作，上堂乜嘢都冇之餘仲唔會交功課！
講開又講，為咗處理學生自殺問題，我哋成日都話要教啲學生點樣應付逆境，又要教啲家長乜嘢叫做正向教育，提醒啲家長要留心同啲小朋友講說話，講說話要盡量正面啲！我自己都係家長，當然都明白正向教育嘅重要，但係我自己就覺得更重要其實係家長自己嘅心態，就算家長覺得正向教育非常重要，學好多講說話嘅方法，但係家長自己心底入面係咪一個正向，係咪一個開朗嘅人，同佢自己日常嘅言行舉止先至係最影響到自己細路仔嘅發展！如果家長本身就一個負面嘅人，就算佢把口所講嘅嘢講到幾正面，其實都只不過係做戲，亦唔會令到細路仔信服，亦都唔會真真正正培養到一個正向嘅細路仔。如果個細路仔喺成長嘅階段，家長成日都表現得好負面，乜嘢都係諗唔好嘅嘢先，咁自自然然個細路仔亦都會學到諗嘢先向負面諗。例如最簡單講去學生嘅成績，如果家長成日都係表示唔滿意，幾多分都好，都係覺得個細路仔未盡力，或者可以做得更好，但係又唔會幫細路仔一齊去諗改善嘅方法，最終就會發展到細路仔好怕攞成績返去畀家長睇，一諗起就會覺得會畀家長埋怨甚至乎鬧，最終就會諗方法去逃避！講到呢度就總會有啲家長覺得咁係咪乜嘢都要就啲細佬，連話都唔話得，其實咁又走咗去另外極端，我唔係話唔話得，而係家長背後嘅信念係乜嘢，如果家長係一個正向心態，凡事唔係向負面諗，咁就會嘗試一齊同個細路仔搵出問題嘅原因然之後一齊去改善，如果細路仔自細就接受呢一套教育，令佢哋相信錯唔係問題，重要嘅係點樣去改善，而且感受到家長凡事唔係只向負面諗嘅心態，咁細路仔自然就會學到唔好逃避自己嘅問題。另外如果家長自己嘅生活態度都係正向開朗嘅，咁自然細路仔亦都會感受到呢一種正向開朗嘅生活態度。所以我成日都覺得喺細路仔細細個開始，你就要培養佢哋成日乜嘢都要同佢哋講，乜嘢都要同佢哋傾，家長自己亦都要知道自己都要經常保持心境開朗諗嘢唔好咁負面。所以我覺得成日都講要同細路仔灌輸正向教育，彈歸根究底其實家長自己待人處事嘅心態，都要有根本嘅改變，自己都要做一個正向開朗嘅人！咁先至能夠真真正正向細路仔灌輸乜嘢叫做正向教育！

0 0 0

私人傳訊回覆引用

跳至頁

返回列表

回覆

發帖

熱門搜尋：

少年成長 今日: 3|主題: 16130

少年成長今日: 3|主題: 16130