我同老公拍拖連結婚都已經15年，喺同一間“大機構”做野(當然不同部門)，又有一對龍鳳胎，本來幸福美滿。
但兩個月前嘅一晚，個C6突然話我知佢鍾意咗同佢部門嘅一個女同事(已婚女士，有個仔)，佢話因為成日聽到嗰個女同事同人講佢老公對佢唔好、又大男人…，所以覺得佢好可憐，好想同佢分憂，個C6重主動追個女同事，話唔會破壞人地同自己家庭，只係做個心靈上溝通嘅「好」朋友，不過個女同事拒絶咗佢，而佢親自向我剖白，係因為驚我會由其他同事口中得知此事。
嗰一刻，我真係好嬲，覺得佢不可原諒，但過了約一個月嘅冷靜期(我趕咗佢番99度住)，我清楚明白自己為咗頭家同兩個仔女，係一定唔會離婚，加上我覺得佢鍾意個弱者(佢以為係)係因為我職位較佢高，揾錢多過佢，表面睇好似好強，所以我都有啲責任，而佢亦都知錯同發誓話除咗我，以後都唔會再鍾意第二個，所以我原諒咗佢，比佢番屋企。
日子一日一日咁過，我發覺自己每日都唔開心，因為梗係覺得佢心內始終對嗰個女同事仍然有愛慕之意(雖然佢把口話冇)，何況重日日見住添！我真係好努力好努力咁叫自己唔好再胡思亂想，但縱使個C6係咁話愛我又成日攬住我又錫我，我都重係一啲愛/安全/信任嘅感覺都feel唔到。究竟係我諗多咗，定係個C6未做夠，所以我重係唔開心﹖愛係咪真係可以喺死心後重燃﹖我係咪自尋煩惱﹖
發表於 
返回列表
