「男人婆」衰格嚇粉絲
2011年06月24日
「男人婆」唔止成日扮到懶有性格，仲係好衰格㖭呀。佢啲衰格嘢，幾乎通記者行家都知，不過大家費事理佢咋。
話說有次大婆台頒獎禮之後，「男人婆」就同舊情人「師弟」及「瘦人」拉大隊貢上「歌神」屋企開半夜派對。到咗夜深時分，先前喺「歌神」屋企樓下嘅記者都已經收晒工，只係剩番幾個 die hard fans繼續癡癡地等。
大約凌晨兩、三點左右，靜英英、黑孖孖嘅馬路邊，突然傳出一把鬼聲鬼氣嘅女聲：「喂……咁夜，你哋等邊個？」班妹妹仔一聽見已嚇到腳軟，有啲膽大啲嘅就用眼尾周圍睄吓，但又唔見到有人，但依然有把女聲講嘢，班妹妹仔嚇到冇鞋挽屐走。之後有個二五同媽咪姐爆料，話嗰把女聲其實係「男人婆」扮 o架，係佢自己講番出嚟，仲話嚇到嗰班女三魂唔見七魄喎。
唉，你「男人婆」憎記者就通晒天啦，不過估唔到連粉絲都玩埋，睇嚟佢真係唔想撈咁款喎。
發表於 
返回列表
