本帖最後由 rose-mag 於 11-9-9 10:25 編輯
mimi005 發表於 11-9-8 23:53 
Ng g 點解, 都係覺得好辛苦點解女女吾可以普普通通 gum 覺得好吾公平 (當然世界上係冇公平 ge )好灰, 冇助 ...
唔好淨係諗負面嘢，我知社會上標籤咗我地嘅小朋友，好多人一聽到多動症，
就即刻同曳加上等號，有D甚至覺得小朋友會打人有暴力傾向，我聽過呢度有家長講,
小朋友有自閉症多動症食藥就會好，小朋友情緒失控或有其他「唔乖」嘅行為，
係我地呢D家長唔教唔管，聽到我覺得可憐，因為佢對呢類小朋友一無所知，
如果真係咁簡單，點解咁多家長要尋求協助？點解要搵專家幫手？點解要花時間做訓練？
點解一確診就好似世界末日？但口喺人地度，我控制唔到，人地標籤我個仔，我冇辦法，
人生就好似攪珠一樣，有人好彩D，抽到個容易教嘅小朋友，有人冇咁好彩，
個小朋友會花多D時間，但我地已經俾好多人幸運，因為我地嘅小朋友唔係冇得教，
只係要另一種方法教，咁做人都係活到老學到老，只不過做父母呢樣嘢要邊做邊學，
而學習對象係我地小朋友，係佢地主導我地去學，如果講我自己，
我估只係一個剛好合格嘅媽咪，有好多嘢我都做唔到做唔好，但呢份工冇得唔做，
唔好就做到好，而且唔應該做得唔好，因為小朋友靠我地。
你可以諗你個女而家係迷咗路，你要同佢搵番條路出嚟，小朋友有唔同普通人嘅學習方式，
佢地冇錯，有得揀佢地都唔想同其他人唔同，但每個人都係一個個體，有長處亦有短處，
好似我仔咁，佢學嘢好快但專注力弱，我想佢上堂專心佢做唔到，但當佢鍾意玩嘅嘢，
佢會好有心機做，做得好靚，咁我咪用同佢玩嘅方法去教佢，係比其他小朋友花多D時間，
但過程都唔係太差，當係一種親子活動。其他人講到點教仔女、點有心得、睇幾多書，
我聽完就算，我小朋友用唔著呢D方法，我要用啱我仔果套。
你家人支持你嗎？有冇同佢地講吓你嘅感受？有時講咗出嚟會感覺冇咁慘，
當你諗到你個女起碼有你錫佢，有飯食有衫著，已經俾好多其他國家小朋友幸福架啦。
我而家希望有生之年，仔仔可以學到獨立，同人好好相處，做個開心有用嘅人就好滿足啦。
花旗太太生活在花旗國，留意時差，你問我未必即時答到。
發表於 
什麼政府部門、途徑尋求幫助？
返回列表
