自由講場 今日: 801|主題: 1347087

咁第二日去醫院 探佢啦, 舅父話佢好嚴重喎, 但其實醫生未通知家屬既. 去到, 入咗深切治療部. 佢對眼已經張唔大, 個人迷迷糊糊咁, 可以點頭同搖頭. 但係睇得出佢好累, 唔想講嘢, 舅父叫佢, 佢只係好似發脾氣咁好大聲嗯咗一聲, 意思係你咪煩住我喇. 大家都有晒心理準備, 但當晚無事, 第日再探佢, 都係咁, 如是者幾日, 都係咁. 大家就放下戒心喇. 後尾仲轉埋出去普通病房, 個人精神返少少, 但去探佢都係唔肯講嘢, 唔肯自己食嘢, 插住胃口, 但佢係咁用手扯甩佢, 結果要綁住佢雙手. 我哋通常日頭去探佢, 佢好少嘢講, 唔睬我哋架, 成日瞓. 但係醫院 d護工話佢夜晚好多嘢講, 成晚講嘢, 又唔瞓, 但係明明無人同佢講嘢架, 唔知佢係自言自語定係

再之後, 奇跡出現了, 佢竟然可以出院轉返去老人院, 但係仲係要插胃口同埋尿袋, 偶爾可以食粥(如果佢肯食的話).

講漏咗一樣, 阿媽發完第一個夢之後就話返俾大家知啦, 我哋問外婆喺個夢到著咩衫, 阿媽話件衫未見過佢著架, 講咗個顏色出嚟. 我舅母聽到, 就話, 外婆前幾年幫自己做咗件壽衣, 就係呢隻色. 但我同我媽都無件過嗰件壽衣架.

如事者佢喺老人院又過了幾個月, 有個星期六朝早舅父又打電話嚟話緊急, 咁我哋去老人院啦. 話說阿媽星期五晚又發咗個夢. 夢見外婆同黑白鬼差(好似係咁叫, 今晚問下阿媽先)一齊, 外婆笑笑口同阿媽講話我走啦. 阿媽話你又話唔走住既. 外婆無答, 但好風騷咁話bye bye(阿媽話外婆以前從來唔講bye bye架)! 呢個時候嗰2個黑白鬼差就問阿媽, 你知唔知佢同你講bye bye係咩意思啊? 阿媽話唔知, 嗰2個就話喇, 意思係呢, 你好快會有個新阿媽. 阿媽聽到即刻話, 黐線, 我老豆走咗好耐啦(over 30 years)! 跟住嗰2個人就俾咗支嘢飲阿媽, 支嘢飲唔記得係奶白色定係透明, 上面插住支飲管.

好喇, 去到老人院, 今次真係幾嚴重下喇, 佢哋話佢上唇都開始縮, 手腳又發紫喎, 我唔識睇, 我淨係知佢有低燒. 眼張唔開, 呼吸都好弱. 老人院隔離係醫院, 有個醫生(唔記得講, 我外婆在大陸). 醫生話佢又瘦又弱, 連血壓都量唔到, 淨係可以幫佢吊針咋. 阿姨同我哋講, 話幾日前, 外婆突然問佢嗰日係農曆幾號, 咁阿姨就話佢知啦, 跟住外婆就自言自語話廿八廿九. 阿姨問, 做咩啊, 呢2日你去邊啊? 外婆話, 唔話你知. 點知咁啱, 呢一日就係農曆廿九, 你話幾邪!!

其實大家都預咗佢唔得架啦, d仔女喺晒度, d孫就催緊佢哋過嚟. 但係, 我舅父就話要送佢入醫院, 但係其他人都反對, 因為一送醫院一定係ICU, 入到ICU又唔可以成班人一齊探, 又唔可以成日探, 我哋話等佢安安樂樂咁去吧啦, 話晒個個都可以陪住. 我哋連錢都塞埋去佢隻手度俾佢握住. 我問佢仲有咩心願, 佢又唔講, 問佢去唔去醫院, 佢又唔講. 舅母話佢仲講得嘢既時候咩都無交低過(正常如果佢唔想醫應該講定). 但係後尾我哋都係叫咗救護車, 車嚟到, 醫生話唔樂觀, 可能中途就已經會(但其實外婆係無大病, 只係輕微中過風同埋營養不良)

咁算啦, 我哋唔想舅父有遺憾, 就又送咗佢入醫院. 結果, 佢而家仲喺度. 唔止咁, 我上次去探佢, 佢仲精靈咗, 可以講嘢, 講好多嘢, 對眼可以張開好耐. 我臨走問佢有無嘢同我講, 佢竟然話: 邊d嘢係你既, 你就拎啦! 我唔知佢想講乜, 好玄.

其實我唔知係乜嘢令佢一定要撐落去, 因為我見到佢都辛苦, 佢瘦到剩返排骨, 係真係皮包骨, 食又食唔到, 又要插胃喉同埋尿管. 有時我覺得佢去咗反而係解脫, 但唔知點解, 佢好似總係唔想放棄咁.

我講漏咗一樣, 我哋再去老人院(即係情況好危急嗰次)探佢前一晚, 除咗我阿媽有發夢, 原來老豆都有, 佢話夢見自己買金銀衣紙. 佢都覺得好唔老泥. 咁我哋一齊返大陸啦, 經過深圳, 老豆掉煙頭, 大大個垃圾筒都睇唔到就掉咗喺地下, 結果俾人罰咗RMB100. 老豆話唔知因為咁而過咗d衰氣俾罰佢嗰個人喎.

~完(如果有下文, 我再update大家)~

題外: 我都有估過阿媽個夢個新阿媽係咩意思, 有網友話會唔會係做咗我個女, 哈哈, 我都真係有咁諗過架!