本帖最後由 Arrin 於 12-1-9 17:38 編輯
PS: 閱讀障礙之人士切勿亂留言鬧我~...我會還拖架!!!
如果你99咁對你, 我睇你點忍!!!
1)有一日,我無意中收到[欠繳]既大字報...原來我地未交管理費...而且仲貼咗張[邊個未交]既王榜....但眼見99屋企就[已交]...
平時c6一向鐘意比家用時,再比埋管理費99, 叫佢去管理處交咗去...因為管理處係開9:00-18:00, 我地兩個返咗工都交唔切, 而且99 自己都要交, 所以一次過交比佢......
我馬上問c6, 做咩事....一問之下, 原來c6太忙(開咗10夜班)..日頭都返來瞓覺,,,未得閒交家用比99...所以99直情唔幫我地交....其實590蚊,做阿媽既, [出住先]真係咁難咩?
(如果真係咁等錢用, 點解唔打比我地話無錢??)
c6馬上去比家用99, 仲同佢講 :[係遲咗比...唔係唔比....所以你下次都幫我地交住先....]
99 答: [做乜要幫你交住先!!!! 無錢咪唔交law, 管理處又唔會淋你紅油!!! .....]
(好想馬上爆佢粗law....咁既阿媽都有!!!你比人厄果時又唔見你話冇錢!!!!）
唔夠瞓既c6就馬上鍾馗上身...怒爆99...[洗唔洗咁計較!!!!!]
99話:[咁叫你老婆交囉!]
（又係你話間屋冇我份,要錢既時候就叫我去交...)
自個一次開始....我地自己寄cheque 去自己樓下3樓交錢....=.= 唔洗煩到99了.
(仲敢叫99交咩, 我地未比家用, 佢唱到全大廈都知, 佢同個管理員講話今期唔交我地屋企, 因為未比家用...之後管理員見到我[ x太, 你下次準時d比錢啦,,,,,,,,] 魚皮到呢...)
***********************************************************************************************************************
2)有一次因為99屋企樓上漏水, 99話佢好慘..99走去人地間屋話人地漏水, 99比人地住客鬧痴線之後閂門.....
我好心幫佢預約食環署, 搞搞漏水單野...因為聽到99話比人鬧....
我仲以為樓上係10大惡人(仲估係紋身佬果d)...
唯有我再上去睇下人地乜料啦....一禁鐘，對方開門(紋身就紋身..不過係紋眼線既阿嬸)
我好聲好氣同該住客講道理:[其實漏水唔一定係你屋企, 但有可能係大廈結構既事,不經意漏食水你地咪要白交水費囉. 你都想住得安心d...]
原來一傾之下, 99個次走上去一開口就叫人[賠錢!!!!!]
(咪低能啦一開口叫人賠錢...人地緊係一開口問候你18代啦...人地一聽到屈錢咁緊係閂你門啦, 傻架咩99!!!!!)
事情進展得唔錯...到了事情既一半, 我好心問99, 食環d人嚟咗未? 99一句車埋來: [關你咩事呀!!!!!]
（問兩句姐， 唔洗咁凶悍呀wah!!! 家下又唔係我屋企漏水...)
久而久之連食環署都冇再call 我.....我自己打電話一問之下...原來姑9去改咗contact, 係佢做 唔再係我....
(咁你改咗, 你都出句聲啦!!!咁冇交帶架!!!)
往我仲咁上心....我打去問姑9...姑9答我:[係呀,無你既事啦, 唔該你喎! 呢d係我地家事.....]
(季節咩!!!家事...家變呀笨....問句唔洗死呀wah...咁串!!!!)
之後係樓下, 我撞到果個住客, 佢好惡咁同我講:[唔該叫你個99唔好日日上來gum鐘叫我賠錢呀!!!!!賠咩姐!!!!而家又唔係我漏水, 食環check 咗唔關我地事喎!!!我報咗案架啦!!!!....]
(精神困擾呢下野, 我好明白...99日日gum 完佢鐘, 就gum 我鐘....愛上gum 鐘仔!!!)
我唯有厚顏去同99講, 叫佢唔好咁做...點知99鬧爆我:[你唔識野, 你就咪嘈啦! 關你咩事呀!!家下我間屋咁唔係佢賠邊個賠呀!!!你理得我地點做!!!間屋又唔係你既!!!我個女會幫我啦.............]
(聽到佢咁爆我,其實我好想喊...唔係傷心...係好谷氣到眼淚湧出來!!果一刻好想佢比差佬拉佢!!!!)
過咗幾日, 原來人地真係call咗差佬上去....99好彩有管理員阿姐幫口...小事化無....如果唔係坐花車去花廳有佢份......
******************************************************************************
過年過節做新袍既就算同男家關係唔好, 衰極都會買d野做下樣...而我初初嫁咗, 都會特意去諗下買乜比佢兩老....但好遺憾次次我都食檸檬!!!!
過年買件衫送比99,我係大陸買既...係[織錦]人手造..手工好好.. 99一見到, 第一句就問我係邊買?我話我係大陸買...都未講完.....佢就黑面放返低, 話我特登走上大陸買, 唔方好野.d 料唔好, 手工差..........不如索性唔好買比佢慳返d錢!!!!係咁話退返比我話唔要.....叫我比我阿媽....後來c6出聲,佢先肯收.... 過咗一段時間, 佢有d親屬探佢, 見到呢件佢周圍pat既衫,大讚好嘢!!!!佢先死著爛著....
(我就係見佢d衫咁舊. 先打算買d 好[體面]既衫比佢過年....點知佢嫌係大陸買, __! 你自己咪又係乜都大陸野,咁你大陸人就著返大陸野啦!!!!! 成日著到共產幹部咁做乜je!!! 唔好要啦笨!!!! 件野你估平架!!!!)
*******************************************************************************************
叔仔因為長期困係屋企, 所以同啞既人無分別..又冇主見..直至佢去外國做野, 佢臨走果時,佢個寬頻仲有一年contract,用信用咭自動轉賬, 姑9教佢走寬頻數就係走到外國就cut 咗張信用咭, 咁寬頻就過唔到佢數...賴一段時間就唔洗比......
點知, 咭又cut 唔到(因為未找數), 寬頻又收唔到錢而追數...$389蚊咭數拖到近$3890...因為條友仔連minpay 都唔找.....直到99收到大字報收數(律師信), 99就急call c6去幫細佬找數!!
(等你成日塞野去我信箱咁好玩...拿!呢D就真係收數佬字件啦)
字條內容,自己填充啦:
冚_剷(XXX全名),死_街,有錢唔還正_弟,你老_做臭_, 全家無好死!
見字還錢!
(咁上下啦唔係好記得....都幾好笑~)
咁大個人, 要拖數都冇計, 所以c6 決定唔理佢地, 由佢自己搞. 點知99上來喊苦喊忽話c6唔肯幫個細佬.....etc.點知姑9話唔關佢事, 係佢細佬蠢...拍拍羅柚走咗去.....
(正一死8婆!)
c6 同99 嘈, 佢有難一定會幫, 但家下係佢衰貪心, 想走數又不負責任!!! 所以唔會出錢幫佢!!!!!
99 因為c6咁講, 就狂鬧又喊:[果個唔係你細佬!!!!少少錢都唔肯幫!!!!! 你唔係我個仔!!!!!]
(家燕姐上身咁, 好好戲,同好好氣~)
c6好嬲, 做人阿媽都唔講道理既, 個仔唔岩都算, 仲要咁樣教佢!!!!
(都唔弱四哥上身咁, 教佢做人既道理~)
結果c6打咗好多次長途去鬧個廢細佬,之後出咗錢幫佢找咗數,又幫佢cut 晒d 野, 叫佢返來hk 還錢!
最後叔仔有還返錢比c6....但99仲馬後炮話, 其實洗乜找數呀~~~
(咁你又喊苦喊忽話要我地救下佢個仔~~~吹到bear bear 聲)
*******************************************************************************************上半講咗因為樓上漏水, 99間屋toilet 同廚房天花濕晒...而廚房支光管漏電.....62打算自己整,,,就係咁電一電,跌親....c6鬧佢地...仲拎咗800蚊比佢地,.要佢地叫人來整啦, 唔夠既話再同佢講.....
事隔兩星期, 光管依然冇整到, c6好緊張咁問做乜唔叫人整????電死人架!!!! 99 又哦c6話, 係都叫樓上d人賠錢, 唔係你出錢law!!!! (唉, 講極都唔明, 都話係大廈滲水, 唔關樓上果家人事)...c6同99 拗咗好耐, 最後c6自己call 人上去整, $3400!!
(最後99果$800都冇還返比c6, 而姑9又扮聽到, 話係我老公自己話出錢整,所以佢唔會比錢....豈有此理!有個咁既媽媽. 就有個咁既女!!!! 一講錢, 六親不認!!!)
<font color="Magenta">大家睇還睇,千萬唔好轉載去其他地方呀!!!!仲想追我既故事,就請大家合作~保持我神秘身份!!!!
發表於 
mouth:
support you!!!
返回列表
