我知自己都就快做人媽咪…但有時望住自己阿媽, 都不停咁警剔自己, 唔可以變成佢咁野蠻
由細到大…佢重男輕女我係知, 佢唔係唔鍚我, 但同一件事下, 對待我同我阿哥嘅標準可以好唔同。
我阿媽係一個好自我中心嘅人,係…佢有時係佢道理, 但咁唔代表可以唔洗理人感受,或者覺得自己啱就可以打橫。所以好多時…我會寧願選擇唔講或者只講一個佢想聽到嘅version…
好記得, 舊年年尾小X….雖然周數唔大, 9週…但都好傷心。我仲放緊病假期間, 佢嚟我屋企陪, 點知…我嗰幾日, 反而係想自己靜吓多過佢喺度,因為佢會不停問點解點解點解….我答完點解都仲未完, 仲要好細心咁解釋比佢聽等佢明。我知佢係出於關心, 但timing 錯咗。我最傷心嘅時候, 要由我自己把口挖返個傷心經歷出嚟…仲要講每一句說話都要好深思熟慮務求佢明佢安心, 我又要忍住唔可以喊, 都咪話唔盞鬼。
好…今年我再次有咗, 慶幸相安無事而家已經23週。但真係要開始plan吓生咗之後係點。本身我唔諗住請陪月…想我阿媽過嚟幫吓手, 話晒自己阿媽感覺上乜都方便D。但我老公覺得我阿媽年紀都大…加上大家屋企距離又唔係近, 就算我老公可以車出車入, 其實都辛苦。另一個原因係, 我同我阿哥出世嘅頭一個月都唔係我阿媽揍…即係對初生BB嚟講, 我阿媽可以話係零經驗。結果…我地都係請陪月…
點知…頭先咁啱同我阿媽傾開電話, 同佢講我哋會請陪月幫手…我同佢講, 到時佢鐘意都可以照上我度咖…如果佢想拎湯比我都無問題, 我叫個陪月姨姨唔洗煲, 免得煲雙重。
點知佢就突然起晒"鋼" 咁,講啲悔氣說話: 「哦…咁得啦, 你請得陪月仲洗乜我煲湯比你呀? 唔係請嚟做乜呀?」
唉…可能我真係又又又「講錯嘢」啦, 要不停咁同佢講﹕「我只係話如果…我冇話要你一定要煲, 亦冇話唔要你比我D嘢…」
跟住佢一句頂過嚟話﹕「你洗乜同個部月講咁多嘢啫…請得佢, 嗰個月乜都係佢做晒咖啦」
跟住佢講佢本身係想我一生完,就直接比個B佢湊…等我可以盡情休息。(我當然知佢心意, 但唔敢話佢知, 因為佢未湊過初生BB啦…講咗佢實反檯) 然後又開始講返三十幾年前佢係點坐月…
不過, 我都好直接話佢知, 其實我地唔prefer咁樣…因為我想餵母乳, 佢又即係質問我: 「你放產假放幾耐先?」 「諗住餵人奶餵幾耐呀?」 ……衰D講句, 答佢D問題, 真係攰過比老細摔囉。
真係好怕…兩母女講句說話, 仲要係D無傷雅嘢…都要步步為營。但我同佢傾完呢個電話…真係嬲都有D想爆粗。我唔明點解要跟住佢諗法做, 佢先開心…
發表於 
返回列表
