想生BB 今日: 2|主題: 109118

收藏本版

發帖

返回列表

跳至頁

查看: 6962 | 回覆: 108

BB 16Weeks靜靜地離開了我....... [複製鏈接]

12 3 4 5...6

@吱喳@

子爵府

積分: 11376

1^#

發表於 12-7-31 21:54 |只看該作者 |倒序瀏覽 |打印

28/7,星期六 18w3d 今日約了12PM覆診最後等到1PM先入房見醫生....
第一次同老公覆診,一心諗住開開心心去照性別.....加上今次專登約了星期六老公可以陪我開估....
點知惡夢開始......醫生照了好多次都搵唔到BB有心跳.....我立即呆了...好驚...希望係搞錯或者部機壞左.....
我驚到望住老公,老公立即安撫我.....我開始好想喊.....醫生再試下開機聽下有冇心跳聲...結果都係無.....我果一刻真係好希望係發緊惡夢!!!係我未瞓醒!!唔係真架!!
醫生說BB個SIZE停留了16Weeks........我聽完真的喊了.....我明明冇肚痛,好流血,我身體一直都好好,食得瞓得....加上BB都有4個多月了....
點解要離開我地.....點解要係我.....點解個天比左希望我又要收返.....點解.....
我真係好痛苦...好難受...之後醫生立即寫信給我,見意我去QE急症...
大約1:45PM 我們就到了QE急症,可能我有醫生信好快我就安排照第一次照聲波.....
結果都係一樣....搵唔到心跳...
之後我一邊喊都唔知自己去左邊.....上了唔知幾多層樓....又安排照多次....結果都係一樣...醫生都係問我有沒有流血,肚痛....我話沒有...
之後問我...想宜家入院定係過多幾日先入院安排做塞藥流產.......之後我決定當日入院安排塞藥....
換好入院衫老公一直陪我,陪到我4PM之後回家幫我執日常用品,等到6PM再黎找我.....我知道老公見到我係咁喊咁心會好痛....我都同自己講...我要堅強一點...唔想另愛我既人擔心.....

大約5PM醫生幫我塞藥,之後會慢慢另到子宮收縮令個胎排出.....
到了6pm老公黎搵我,我又忍唔住喊了.....我真係好冇用.....之後8pm老公就要走.....我真係好唔想老公走....我好驚.....我咁大個人第一次入醫院....感覺一d都唔好受...
塞藥後頭幾個鐘都唔算痛,可以忍到...之後差不多11點痛既感覺開始好強烈!!!越來越痛!!之後大約5:45am將胎排出....
姑娘同我講胎盤未排出,叫我試自己排出來,如果唔係就需要做手術....之後我好快好就連胎盤都排出了.....排出後真係冇晒陣痛..果一刻雖然又喊了.....但果一刻我知道我又要重新開始了.....

29/7 排出胎後,安排照一次照聲波...睇下清得乾唔乾淨....結果有少量血塊,同有少量殘留....需要食3次藥安排流出....不過食完後都沒有肚痛....

30/7 早上飲完糖水後....醫生問我有沒有肚痛....我說沒有.......醫生再檢查我流血多唔多....我流血不多....說我下午可以安排出院了....之後約下星期再覆診

31/7 今天早上收到QE打電話比我,話我尋日CHECK血糖好高,需要再安排多一次飲糖水.....我真係好擔心.....

不過經過咁次我深深感受到我老公,我屋企人,6299對我的愛護,關心!!真係好多謝佢地每一位!!

我今日早上個胸開始好痛!!好硬!!大家知唔知有咩方法可以另個胸冇咁痛呀??