夫婦情感今日: 0|主題: 42771

收藏本版

發帖

返回列表

跳至頁

查看: 61683 | 回覆: 827

(11月29日update)繼續寫下我家癲佬Bruce同我之間的趣事

[複製鏈接]

12 3 4 5...42

252

oguh

子爵府

積分: 11575

1^#

發表於 12-8-31 18:34 |只看該作者 |倒序瀏覽 |打印

本帖最後由 oguh 於 12-11-29 12:17 編輯

之前個post，寫左好多生活趣事，多謝大家支持:
http://www.baby-kingdom.com/forum.php?mod=viewthread&tid=5386984

今日放假，諗諗下又想繼續寫下野，大家笑下又好，爭議下又好，都係希望大家睇得暢快，有D未必關Bruce事但我都想寫下。之前太忙，有D野想寫都無時間寫，希望大家可以等一等我，出post真係唔可以好似之前咁快了。

0 7 0

私人傳訊

oguh

子爵府

積分: 11575

2^#

發表於 12-8-31 18:42 |只看該作者

本帖最後由 oguh 於 12-8-31 18:42 編輯

放狗記

話說，我同Bruce放狗慣左行某一段路，每晚差不多時間出去，撞口撞面都係熟悉既人，大家清楚晒大家既狗，狗名、年紀、品種、來歷，大家狗主都會講兩句，或交流下心得。

其中一位狗主，是一位中年混血婦人X太，佢每晚都帶住隻老唐狗散步，人同狗都有種形容唔到既高貴優雅感覺，無錯，唐狗都可以步姿高貴。X太身形高佻瘦削，永遠束一條馬尾，身穿簡約衣服，談吐施文大方，溫文彌雅，步伐不快不慢，狗永遠跟隨佢既左邊，同樣不快不慢，自信地散步。X太同佢隻狗有種默契，睇得出感情好好。

我家兩隻頑皮狗，見到陌生人都係cool cool地唔會主動迎上，佢地好識揀人去親近，只會親近少數人，而X太係其中一個少數狗主佢地會親近。每次X太見我地，兩隻野都會主動搖住尾巴上前搵佢，而佢隻老唐狗就停係一邊，默默等待繼續前進，非常非常聽話。X太每次都會親切地同我兩夫妻打招呼，有時會停下來大家傾下計，有時大家打完招呼就走。

早排天氣悶熱，就算晚上出去放狗，都熱到焗爽拿一樣。我地行一段路，停一停，比D水狗飲下，又再行下，停下。有一晚，我地行到某一段路，見到X太企左係路邊，佢隻老唐狗攤左係地面。Bruce問佢：「做咩唔行呀？太熱？」

X太有D尷尬咁話，隻狗停左係度唔肯行，佢已經企左係度十幾分鐘。

我地比左D水佢隻狗飲，但佢飲完都係唔肯行，可能實在太攰太熱，而佢年紀又老，無體力。

呢個時候，懶好心既Bruce就呈英雄，話幫X太抱佢隻狗返屋企。X太開頭話唔好意思既，佢打算叫佢老公開車過來接佢地，只係老公聽唔到電話。後來佢頂唔順Bruce既熱心（佢要威，你比佢威啦），就唔好意思咁，比Bruce抱佢隻狗返去。

隻狗睇落都有70磅重，Bruce平時運動開，佢話無問題，一手抱起左就開始行，我就拖住我地兩隻狗尾隨。沿路都係X太帶路，佢一邊行一邊話唔好意思，又一邊擔心地望住佢隻狗，可能驚佢中暑會有事。

Bruce最初行又快又穩，好似胸有成竹咁，但行左十分鐘都無，佢開始慢落黎，同埋問X太：「到你屋企未？」X太話：「就到，就到。」

但X太既「就到」，對於抱住一隻毛茸茸大狗既Bruce來講，真係有D遠。而我呢位衰格人妻係後面望住佢行到身水身汗，果一刻只係想笑！鬼叫你呈英雄！人地老公或者準備開車來接佢地啦！平時你巴巴閉閉，今次你會唔會好瘀要半途叫的士呢？（我真衰格！）

Bruce越行越慢，途中停過下來，放下狗狗休息下，又試下叫隻狗再自己行，可惜佢都係唔肯行（有人抱返屋企喎，真係無咁笨自己行！狗真係有性架！）好喇，X太依然話「就到，就到」。我靜靜雞問Bruce：「洗唔洗叫的士？」佢唔服輸既性格又點肯，佢咬緊牙關，又抱起狗，繼續行。

結果，佢行到件衫濕到滴水咁濟，行左大半個鐘先到X太屋企！連我都全身出極多汗，我兩隻狗都喘晒氣！我地以為X太係左鄰右里好近，原來根本係我地一箱情願.......

送佛送到西，我地送埋狗入屋。一入到去，見到從未露過面、從未試過一齊放狗既X先生，佢一見到Bruce抱住狗入屋，佢就罵X太：「我都叫左你載的士架啦！做咩要人幫你抱隻衰野返來！喂！佢唔準入屋架！放佢係花園！」原來佢唔係聽唔到電話，而係根本唔想理佢地。

X太：「但佢今晚可能太熱.......」X生：「放佢入狗屋！果度咪有風扇囉！唔好整污糟我間屋！」

Bruce即刻面黑黑，但佢唔想搞到人地屋企嘈喧巴閉，狗原本在玄關休息緊，佢又再抱起佢，走出去花園有間磚起既狗屋，放左佢係裡面，隨之有個傭人去幫狗抹身。

X太多謝我地多謝左好多次，我地行到去門口準備離開時，X先生走出來，又罵X太：「睇下你，勞煩到人喇！」然後就咁除左手上既名錶，塞比Bruce，話：「麻煩晒你地！」

當下我地呆左，但佢好快就走左。當佢地關上大門時，我見Bruce望住手上既錶，一副哭笑不得既表情，佢問我：「我係咪比人當係阿四？佢咁做咩意思？唔通我個樣似乞兒？我似買唔起呢隻垃圾錶咩？」隨之而來連串爆粗。

由於折騰左成晚，我地兩個攰到無輪，最後係我地叫的士回家。落車前Bruce想衝動地比左隻錶個司機，但比我制止左。

過左幾日，放狗時都唔見X太，暗中擔心佢隻狗狗有咩事。然後，幾日之後，又見到佢地再次出現。X太一見到我地，又再次多謝我地，原來佢隻狗後腳有事，休息左幾日又可以再次出來散步，但只要減少時間。

Bruce自從收到隻錶後，每次放狗都戴住，終於見到X太，佢就立即比返佢。X太唔好意思，代X先生道歉，佢話X先生好憎狗，養左隻狗咁耐，從來都無比佢入屋，從來都無摸過佢一次。Bruce比返隻錶人地之後，即刻輕鬆晒，話：「嘿！終於擺脫左果舊垃圾！」

我地後來都覺得，唔怪之得狗狗咁跟X太、咁聽X太話，因為應該只有X太在乎佢。再睇下我家兩隻大爺隨時隨地都被我地擁抱住，真係覺得我地寵壞左佢地。