自由講場 今日: 2636|主題: 1358975

Hello大家好~ 我又黎喇~~

原本諗住尋晚更新，但係奈何我家韓妹唔太合作，係都要佢娘親抱住先肯瞓，瞓得黎都已經點幾兩點

Anyways，我地而家就黎講埋個part 2佢啦!

(此乃本人親身經歷分享，純share吹水，絕無任何針對意思)

第三篇 － 韓妹的真身 part 2

上文提到我係入住宿舍嘅半年裡面慢慢咁見識到韓妹嘅真面目，講真，佢地晚晚係個沖涼房度玩CSI係影響唔太到我嘅，不過搞到個廚房咁污糟，我就真係忍唔到，始終食對我黎講係好緊要好緊要好緊要! (實在太重要，所以要講3次) 再加上同房姐姐將會返台灣，所以我已經開始考慮係咪要搬出去其他地方一個人住...

事件一 : Don't touch my PANTY!!!

係嘅，不要懷疑你雙眼，就係因為一條底底，我就即刻決定我要搬走，我要一個人住! 事緣就係宿舍嘅B1係洗衫房，入面都有好幾部嘅洗衣機同乾衣機，基本上只要唔係星期六日去洗衫，都唔會太full，一定搵到個空位嘅

洗衫房其實都好大，除左放左咁多部洗衣機同乾衣機之外，係另一邊係有梳化同櫈俾你坐係度hea等嘅，當然我呢啲港女公主又點會忍受得到咁多部洗/乾衣機一齊發出嘅轟轟轟轟聲吖，梗係返房un un腳睇Running man好過啦，所以我次次放好哂衫，落埋洗衣粉，開著部機，確保佢正常運作我就會返房睇電視，當然我較定哂鬧鐘就會去拎衫，始終我自己都係最憎個啲唔依時依候拎衫、霸住哂部洗衣機嘅人，正所謂己所不欲勿施予人，我係唔做呢啲嘢架!!!

點知，就係一個星期六，我都已經知道呢日一定好多人洗衫，所以我已經一早落去洗，而真係好好彩地我搵到個空嘅洗衣機同乾衣機喎，搞掂哂之後，鬧鐘都較早左5分鐘，諗住早啲落去搞掂就唔好阻住人，結果係過左40分鐘之後....當我返到去嘅時候...

咦?! 邊個咁大頭蝦啊，拎衫漏左條底底喎... (邊個買Peach John咁有taste啊，朋友黎架喎!)

行多兩步...

咦?! 又有一條喎... (呢條Lace我都有喎，識貨啊下!)

再行多兩步...

咦?! 呢個人都真心係咪失憶啊... 咁多條底底都冇執嘅?!!! (不過韓國冇Peach John架喎...)

再行多兩步...

內心大聲問候一句 : 你娘親最近好嗎!!!!!!!

我天真地以為志同道合嘅人... 啲淨色、Lace Peach John底底嘅主人... 原來就係我!!!!

一埋去個洗衣機，機頂、地下全部都係我啲衫、褲、爸爸同底底!!! 而個個原本屬於我嘅乾衣機就繼續係度轉緊...當然入面啲衫 不 是 我 的! 而我自己啲衫就係原本洗乾淨哂只等乾，變到未乾(基本上係濕嘅，同係洗衣機度拎出黎冇分別)，仲要從新洗過同乾衣... 一諗到所有嘢要從新做過仲要無啦啦冇左個洗衣乾衣加埋嘅3000won，個一下我真係火燒心到差啲心臟病發咁滯...

事件二 : 一屋都係韓妹

自從廚房、CSI同洗衫房事件次後，我就決定左要離開宿舍，當時我有一個好好嘅台灣朋友，咁啱佢自己就係一間距離學校15分鐘路程嘅考試院住緊，所謂考試院，其實就係一間間嘅細劏房，每一間房都好細好細，但係就好似叮噹個百寶袋咁神奇可以 fit 到有齊床、衣櫃、書櫃、電視同獨立廁所，而廚房呢就係共用嘅，同宿舍唔同，廚房可以明火，有齊煮食用具同爐頭都不特止，管理員每日都會係飯煲煮好一煲飯(仲要係健康嘅紅米飯!)，而且廚房入面嘅公仔麵、茶包、咖啡(韓式一條條即沖黃色個隻呢)同埋雞蛋都係免費提供嘅，仲會無限量供應!

環境好到咁都只係45萬won一個月，即係3000幾港紙! (講緊包埋房入面嘅水、電、冷暖氣同電視喎!) 我呢啲港女公主仲唔即刻仆到去咩! 係咁意望下間房就即刻俾左一個月租，好快就搬左入去喇，而我又點知只係另一個惡夢嘅開始呢...


話說我住嘅考試院係兩層嘅，二樓係男女合宿，而地下一樓就係純女仔住嘅，我呢啲咁奄尖聲悶嘅公主就梗係住地下啦! 結果就係只得我、台灣朋友，仲有一個同校嘅大陸同學係唯一嘅外國人，而其他房就係韓妹喇... (出事喇出事喇...)


首先我發現原來韓妹都係好需要人地關心嘅，但係佢地又太怕醜唔敢講俾人知...如果唔係點解佢地咁鐘意打開個房門俾人知道佢係房睇緊咩電視、一邊坐係張書櫈上面洞高隻腳食飯同時夾實部三叔電話再用高十度嘅聲線不停Oppa前Oppa後等等等等都要俾我地睇呢...我諗佢地真係好寂寞架...


事件三 － 劏房裡的醉拳
大家都應該知道韓國人好鐘意飲酒架啦可?! 冇錯! 住係度嘅韓妹個個都好鐘意飲酒，而且我係絕對地相信佢地係有預謀地輪住出去飲嘅! 因為真係晚晚都有唔知邊一間房嘅韓妹係醉哂先返黎咁滯，仲要佢地醉酒pattern係完全一樣嘅!


就好似鬧鐘咁，每晚嘅凌晨時份，大慨兩、三點就會聽到有人dum dum dum咁係走廊到行黎行去，(個種由腳踭踩落去個地板嘅狠勁，你係完全唔明點解可以係由一個得100磅嘅韓妹發出...) 明明兩邊加埋先得個10間房，間房仲要豆腐潤咁大，條走廊有幾長，我諗聰明嘅大家已經計得到，偏偏醉左嘅韓妹就係都要好似星光大道咁行成10幾20分鐘都摸唔到返房，仲要間間房個門把都要摸下開下、搵鎖匙再摸下開下、去下間房又再搵下鎖匙摸下開下...無限反覆咁終於俾阿韓妹撞啱房門返到入去之後呢，通常就係一連串跌嘢、撞到嘢、粗口，再跌第二啲嘢、撞到第二啲嘢，同第二句粗口... 而我亦都因為咁學識左好幾句嘅粗口傍身


事件四 － 翻滾吧雞蛋!
住係我斜對面嘅韓妹好鐘意係夜晚淥熟幾隻雞蛋黎食，我諗呢個應該係佢keep住咁瘦嘅減肥秘方黎嘅...而有一晚嘅12點幾，正當我想大覺瞓嘅時候我突然聞到一陣好燶嘅味，下意識即刻彈起身再衝入廚房，果然! 阿韓妹冇睇火、仲要完全忘記佢個幾隻蛋，閂哂房門黎瞓覺... 蛋當然就燶哂，而個煲都無不幸免咁燒左一個大窿出黎... 事態嚴重，我影低左啲相，而係第二日，我亦走左上去二樓向管理員投訴... 隔左冇耐，我就見到管理員去拍韓妹門，而韓妹亦都有備而戰咁一開門就用唱大戲個高音tone(都真係幾似周星星套大內密探凌凌發入面嘅劉以達個tone...) : "Oppa~~~~你搵我咩事呢~~~~" 諗返起佢平時黑口黑面個樣，你都咪話唔得人驚...


當然管理員係男人，結果就梗係當咩事都冇發生過，韓妹有得繼續留低，而我亦都開始又再搵屋搬...


part 2 到此為止，聽日會有最後一篇嘅韓妹的真身番外篇
將會係由我身邊冒死娶左真正韓妹返屋企嘅朋友直接爆料
想知多啲聽日就要準時收看啦~~~