老實，我都唔知仲有咩可以再講，講完又講，我打嘅字夠寫個短篇小說啦。。。
有冇想過：阿伯如果唔係仲愛老婆，駛唔駛日日對住個疑神疑鬼嘅人，又要陪笑，又要氹，幾十年仲唔夠咩！阿伯其實想個老婆開心，所以至會咁忍讓，老婆就一直挑戰佢底線，要個男人同知客無拿拿講自己已婚，鬼都知佢係老婆奴啦，仲有冇面？阿伯都做，而家不斷逼佢要講自己同個知客斷咗，一來佢唔會斷，冇知客，下次可以係部長，再下次可以係點心嬸嬸，二來點解佢下下都要就晒你，留番少少底線俾佢唔得？
唔好再去想對錯，已經發生咗就係發生咗，返唔到轉頭，唔可以時光倒流去返之前未發生之前，破鏡只能重整，不能真正重圓，人老咗有老花，將將就就唔去睇咁清楚，大家咪仲係俊男美女，否則事事太高清，D皺紋都收唔起架啦，何必呢!
未睇過樓主之前嘅帖文嘅，建議睇咗先鬧呢度其他回應嘅會員，因為樓主喺呢個帖未寫晒成件事來龍去脈，一隻手掌打唔響，對阿伯如是，對其他會員如是。唔好成日問如果其他人有咁經歷會點，第一，其他人唔同樓主性格，第二，其他人老公唔係阿伯，唔同人有唔同處事手法，亦因為對手唔同，所以不能一概而論，每個人心中把呎都唔同，有人覺得呢件係芝麻綠豆事，亦有人當件事係天跌落嚟咁緊要，如人飲水，冷暖自知，大前提係做個獨立嘅人，首先自己愛自己，唔好同自己過唔去，亦唔好自視過高，要人俾至有開心至有價值，女人呀女人，點解搞到自己咁一文不值，冇男人唔會死，要個男人冇咗你會死至係，而且兩頭唔到岸，自己唔開心，對方唔就範，自己挖個窿俾自己跳落去，至怕你作繭自困，原本好好地將就下行埋以後幾廿年，變成臨老一個人，咁就真係阿彌陀佛啦。
花旗太太生活在花旗國，留意時差，你問我未必即時答到。
發表於 
返回列表
