本帖最後由 rose-mag 於 16-8-23 21:30 編輯
worthy 發表於 16-8-23 18:57 
回覆 popomeow 的帖子
我都係咁同阿伯講. 陪你走到最後嘅會係邊個? 依家同你笑意盈盈, 因為你重可以談笑風 ...
JM呀，睇到你嘅回覆，有時真係好嬲又好笑，嬲係你講極都唔明，果頭拉咗你出嚟，轉頭你又走番入個窿度又loop過，好彩叫做都唔算冇成績，你都肯去見輔導攤開同人講，我地呢度咁多JM叫做有少少成就。笑係你已經做咗咁耐人，點解會唔化架，好多嘢有捨才有得，感情就好似雀仔咁，你死握住喺手只會掐死佢，放佢走，佢未必唔會飛番嚟，唔番飛走咗咪養過另一隻識得感恩嘅，再唔係，唔養雀，養金魚囉。
人最大失敗係要以別人去肯定自己價值，一早喺呢個帖最初都好多人叫你走架啦，係你話唔走，唔好益阿伯益個女人，死都要爭番個老公返嚟，而家事實係你鎖得住佢個人鎖唔到佢個心，咁再爭落去，又生又死又刀仔拮大脾為咩？搞到自己又顛又喪咁無謂啦，女人要愛就愛得無悔，要走就要走得瀟灑至係，有咩大不了？仔已經大啦，唔駛再話為佢地有個完整嘅家，家人呢，幾蠢幾唔開心都要講，咁至係一家人，你又收收埋埋，佢又收收埋埋，你估同屋主咩，而且仔大啦，你以為佢地睇唔出咩，可能只係唔敢問啫，同仔講下啦，可能有另一視點俾到意見你，睇佢地支持邊個囉，不過唔好期望仔可以幫你出頭喎，唔好難為後生做磨心。
灑脫D，為自己而活，唔好再以為阿伯冇你唔得，事實証明咗唔係，又唔好以為自己冇阿伯唔得，係你自己唔敢試啫，唔好再喺個窿度轉，開下眼界，睇多D嘢，plan咗去旅行，放縱自己去感受下風景美食，見到藍天白雲個人會開心好多，記住你係去玩，唔好再focus喺呢件事上面，既然知道底線喺邊，最壞咪分開囉，冇再衰架啦，你有呢個醒覺就知道冇咩輸架啦，仔女細就話多負擔，你個負擔都長大啦，係時候去搵番你自己。
唔好俾我批死阿伯，而家仲係享受緊果種如沐春風有人崇拜果種快感，男人係貪新忘舊嘅，邊得咁多痴心情長劍，幾多男人老婆死咗未夠兩三個月就有新歡。你買過股票嗎？當年我好多朋友買咗8號仔，跌到痴晒線仲要再買，話溝淡蝕少D，到頭來咪又係得個吉，長揸唔會蝕晒，不過要返到家鄉就睇下有幾長命啦，如果一早斬纜咪輸少當蠃。你而家覺得唔甘心係因為捱咗咁耐，幾十年夫妻，仔女大晒，以為收成期，點知走個酒樓妹妹出嚟，俾著我就襯早走人，分阿伯身家，走咗要活得更好更精彩，當你活得好過以前就係對阿伯最大懲罰，或者你到時會呻笨走得太遲添。
花旗太太生活在花旗國，留意時差，你問我未必即時答到。
發表於 
最尾個段講出我心聲。
留番你自己慢慢嘆
返回列表
