唔係話錯晒，但呢篇有好多盲點，以偏概全：
求學時成績較差的一群，最後竟然成為中小學老師＞＞＞的確以前好多人去讀教育學院係因為考唔到大學，但事實原因唔只係成績唔夠好，亦有人因為家境唔好冇錢讀大學，教育學院6X年時有一年制兩年制，比起大學要讀三年四年更早可以投入社會，以前係文憑制。成績差唔代表唔識教書，我以前小學成班老師都係教育學院出嚟，但有半數老師都係好熱心，好肯教學生，有D會用好生動方式去教，令學生更入腦，課餘又帶去學界體育比賽、歌唱比賽、常識問答比賽等，當時全部都係額外課餘時間嚟，如果照文中所講，實在不能苟同。
不能啟發學生， 唯有以恐懼施壓＞＞＞我估作為校長嘅應該都要檢討，我自己好多舊同學朋友做教師，佢地話要搵個好校長難過搵過好老公，好多校長都要求好高，係唔係都要教師補課，假又冇得請（BK以前都有會員開過帖講家中有紅事白事都話要分親疏至請得假），教師都生活喺恐懼之下，加上家長係唔係都投訴，佢地嘅壓力有幾多人明白？
欠缺社會經驗，難教做人道理。。。知識未經實踐＞＞＞你估學校又冇辦公室政治？部份老師可能真係初出茅廬入世未深，但教得幾年又點會唔識做人道理？唔可以賴晒老師，家庭中嘅較育更重要，我估家長身教比老師講嘅更實際，就算學校冇功課，有D家長都驚死自己仔女落後於人，又要補習又要入精英班，呢D唔係老師作出嚟逼學生啩。
井底之蛙，怨天尤人。。。質素參差，態度欠佳＞＞＞唔走唔一定係走唔到，有人唔想走，心裡面亦都有一團火作育英才，就算真係走唔到留喺學校教書都唔應該被講成井底之蛙。至於基準試，的確有部份老師可以安逸太耐，未必追得上社會上改變，但問題係當初點解會請？教育文憑試又點解會通過？俾得個文憑或學位個老師，但之後可以唔通過基準試，係唔係其實個教育文憑基制都有問題？無可否認，有一班人可能真係不思進取，但呢一篇文一竹竿打一船人，無理將責任全部轉架俾教師就有欠公允，校長識唔識點管理一間學校？家長又扮演咩角色？學生本身性格資質又有影響，根本係多方面配合至可以教到一個好學生出嚟。
過去一兩個星期已經失去咗咁多條年青生命，而家係唔係又要將個波拋過去俾老師，指責晒所有老師，過去咁多年老師太大壓力自殺嘅都唔只一單半單，我自己以前中學有個老師都跳樓死咗，朋友同做教師嘅老公新婚冇耐，老公就因為不堪工作壓力跳樓自殺，如果佢地係呢篇文中所講嘅咁不濟，又何苦上心到要自殺？我相信各行各業都有好人唔好人叻人唔叻人，當我地講到教師係不被尊重嘅職業之時，評論時又有冇尊重到老師？
花旗太太生活在花旗國，留意時差，你問我未必即時答到。
發表於 
有興趣理解下呢位校長本身學歷
返回列表
