呢個訪問對鍾意胡歌嘅人一定要睇，雖然入面又重提胡歌早年車禍，但同時較深入探討胡歌內心好多睇法及對生命嘅詮釋，我覺得中間有好多對話，胡歌係忍住眼淚去講，感覺係幾沉重幾嚴肅。有人鬧個主持講嘢冇深度扮嘢又持老賣老，但我感覺唔係，我覺得主持何東訪問頗有水準，佢的確係層層深入去挖掘胡歌靈魂深處嘅想法，亦收集咗好多胡歌以前經歷同文字嘅資料。通過胡歌嘅言談，我見到一個唔同嘅胡歌，之前我一直覺得胡歌嘅笑容好燦爛好陽光好天真，原來主持人都有呢個感覺，最驚奇係原來胡歌自己係唔想長大，佢一直都有一顆天真嘅心，所以笑容可以咁可愛咁傻更更，同樣嘅笑容我只喺我自己對仔女面上見到，估唔到胡歌果然同宗主/林殊一樣有一顆赤子之心。
另一樣就係點解胡歌散發出一種淡然平靜嘅氣質，睇完我覺得係部份源於佢信佛教，加上佢經歷過嘅嘢都造就而家嘅胡歌，佢就如同林殊經歷梅嶺一事重生後，「既然可以活著就不會白白的活下來」。最後主持人贊胡歌有紳士風度又謙恭，不裝模作樣，對於生死談得深入又有慧根，最難就係胡歌特別天真，只係有點大壓力。可惜剛於前幾日鳳凰衛視宣佈停播《非常道》呢個節目，一個八年嘅訪談節目正式落幕，胡歌無緣再上呢個節目。
花旗太太生活在花旗國，留意時差，你問我未必即時答到。
發表於 
返回列表
