Baby Kingdom - 親子王國 香港 討論區 › 首頁 › 興趣嗜好› 閒來無事說些事.....

興趣嗜好

收藏本版
回覆 發帖
返回列表
跳至頁

首頁
1213141516...43

尾頁
   7
cforchat


大宅

積分: 2720


261#
發表於 17-8-15 09:27 |只看該作者
之前都講過, 我會將認為好嘢嘅食物留畀當家吾兒狗狗, 有剩嘅先輪到自己.

有時煮嘢失去預算, 份量少咗, 就會先畀吾兒, 跟住到當家, 然後狗狗. 仲剩少少, 我就索性喺廚房食埋, 費事畀佢哋見到我食咁少而心存內疚. (雖然唔會)

每當我冇坐上飯桌, 佢哋就會開玩笑問, 係咪我獨自匿喺廚房偷吃好嘢喎.

次次咁問, 我就次次都記起曾睇過一集"民間傳奇", 講一家貧窮人, 如何三餐不繼.....

媳婦為咗將家中僅存嘅米糧煮畀家婆食, 每次開飯都一個人留喺廚房食. 一次, 當家婆又埋怨冇啖好食時, 就質疑媳婦成日唔一齊埋檯食, 一定係靜靜雞收埋好嘢獨食, 於是衝入廚房, 見新抱碗飯成座山咁高, 就責罵唔怪得次次匿埋食啦, 原來自己留起咁大碗, 跟住搶咗碗飯過來, 手起筷落將飯撥入自己碗內, 點知原本高如山丘嘅飯被撥後, 呈現眼前嘅係一個碗底. 新抱事先將碗底朝天覆喺碗內, 再將飯鋪上去, 驟眼望去好似好大碗, 其實只係得薄薄一層飯, 目的就係讓家人知道自己都有飯開. 家婆知道自己怪錯好人, 亦明白媳婦一片孝心, 當即自責不已.

哈, 我當然冇劇內嘅媳婦咁偉大啦, 正餐食少啲, 我就有藉口食多啲零食, 因為有時口痕起上嚟, 就算飽肚依然不斷將零食放入口, 搞到飽上加飽, 每次飽到上心口, 我就有罪惡感.

而家正餐加零食, 份量啱啱好, 既吸收到正餐嘅營養, 又可解口饞之欲, 一次過滿足兩個願望.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


262#
發表於 17-8-16 11:02 |只看該作者
一次搜尋想要煮嘅教法視頻, 無意中見到一段農村主婦小芳大姐示範嘅煮法, 睇過幾段之後, 被主婦嘅巧手烹調法吸引, 此後就追住嚟睇.

頻道叫做"泥土的清香", 除咗烹飪之外, 間中亦會播放日常生活點滴, 耕種收成出海捕漁閒話家常...... 透過畫面, 彷如聞到一股農村清新嘅氣息, 令我羨慕不已, 如能置身其中, 一定樂而忘返.

有時我煮幾人份量嘅餐已頻呼頭痛, 但係對小芳大姐嚟講完全冇難度, 隨隨便便就諗到每日至少三餐, 每餐至少五六個人嘅份量, 種類仲相當多元化, 有辣有唔辣, 有濕亦有乾, 見到佢哋食到津津有味, 我就流晒口水, 奢想假如住喺佢隔籬屋就好嘞, 以佢哋熱情好客嘅性格, 就算我餐餐過去串門子都唔怕被趕走, 而且仲可以又食又拎㖭.

我覺得佢哋一家相處得好和睦, 甚麽婆媳糾紛子女不和, 應該唔會出現喺佢哋身上. 以家婆為例, 每次見到媳婦忙進忙出, 佢都自動自覺做下把手幫頭幫尾, 默默工作好少出聲, 而身為媳婦嘅小芳大姐亦非常孝順, 每事都心念家婆, 總之就一副長輩慈後輩孝嘅畫面啦.

仲有一樣令我羡慕嘅就係佢哋好多食材都係自給自足, 只見小芳大姐到田裡或林裡, 隨手拈來新鮮菜蔬就可以回家炮製美食, 西瓜更堆放十幾廿個喺灶邊, 隨時想食就有得食...... 呢啲生活, 身為城市人嘅我唯一可以做嘅就係得個恨字.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


263#
發表於 17-8-17 10:13 |只看該作者
幾年前有篇網絡潮文, 內容係關於想搵一個肯捱麥記嘅女朋友, 我未睇過原文, 不過聽講曾引起好大迴響.

點解咁多人覺得食麥記係捱㗎呢? 我反而覺得食麥記好奢侈喎, 所以就算幾鍾意食, 都只能間中至食一次半次. 對於我嚟講, 食麥記邊度係捱啫, 係賞賜至真呀, 日日可以食求之不得啦.

所以如果作者只要求一個陪佢食麥記嘅人, 我就係最佳人選, 假如我遲出世或者佢早出世, 大家年紀相若又有緣遇上的話, 一定一拍即合.

其實麥記啲食物唔算便宜, 不過口味大眾化, 幾乎男女老幼都食過, 所以要從中搵到一個女友唔算太難.

計我話, 應該寫另一篇文"搵一個肯陪我捱蕃薯嘅女友". 蕃薯點都比麥記平 (當然係指普通蕃薯啦, 其他外國輸入品種奇特價錢昂貴嗰啲唔算), 而且又有益健康, 真係日日食都唔怕.

不過現今, 有幾多女生會食蕃薯呢? 呢個要求怕且都會有啲難度.

哈, 不過算作者唔好彩, 又要遇上我, 因為我正正就係勁鍾意食蕃薯嘅人.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


264#
發表於 17-8-18 09:51 |只看該作者
每年乜乜節開鑼, 總有人通宵或天未光就排隊霸頭位, 以備第一時間取得大會送出嘅優惠着數, 真心佩服呢班人咁有恆心與毅力.

計吓日子, 都有十幾年冇踏足任何嘅乜乜節, 除咗唔想畀入場費, 亦唔想買埋啲唔等使嘅嘢.

自己知自己事, 我係嗰啲會因便宜而買嘢嘅人, 唔理用唔用得着, 亦唔理有冇地方放, 總之買咗先算, 結果發現根本在搵自己笨, 時時要為所買嘅嘢傷透腦筋.

如果關於食嘅就要煩為免過期而想方設法幾時煮, 與咩食物配搭至美味, 心諗假如冇買到, 咪唔駛煩囉. 如果唔係食物, 就要煩點處置, 如何物盡其用, 再唔係就衰衰地想佢快啲報銷, 心諗假如冇買到, 咪唔駛煩囉.

雖則次次都告誡自己應以需要而買, 但係去到現場就被人人爭住搶購嘅氣氛感染, 因而將事先自我警告忘得一乾二淨, 返到屋企又頭痛.

其實計落條數, 啲嘢係平, 弊在好多唔係必須㗎呢, 圍起上嚟反而多咗使費, 條數根本計錯晒.

所以話我慳錢又好, 自我逃避都好, 唔再涉足呢啲節, 無形中自我解脫, 少咗好多煩惱.

係就係冇得好似人哋咁買到好多又平又抵嘅心頭好, 不過眼不見為空, 唔見就唔知, 唔知就唔會心思思, 對我嚟講係最佳省錢方法.

春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


265#
發表於 17-8-19 10:12 |只看該作者
好耐好耐好耐冇見嘅舊同事將近結婚, 我本身同佢唔太熟, 但佢同另一位我較熟嘅同事素有聯絡, 於是透過呢位同事將電話傳畀我, 告知我婚訊, 問如果畀喜帖我好唔好喎.

問心, 我一定好肯定答最好唔好啦, 同你又唔熟, 況且好多年冇聯絡, 我真心誠意唔想做人情囉, 我寧願攞一千幾百與家人上館子擦餐勁, 好過拎一千幾百一條友食得唔多兼要呆坐婚宴場所睇住人哋開心自己卻完全唔投入磨一兩個鐘.

但係表面上, 我梗係客客氣氣話悉隨尊便, 佢想請就請, 假如騰唔出位唔請都唔緊要.

好在, 最後都唔駛接炸彈.

其實有時都唔明啲人點會問埋呢啲答又死唔答又死嘅問題, 叫人點答啫, 就算個心唔想, 口都要話好呀啦, 問嚟都多餘! (我諗只有交遊廣闊相識滿天下或是心態認為收到帖代表有面子嘅人先至唔介意畀人情, 否則正常情況下, 如果有得揀, 應該冇乜人願意收到帖, 不然都唔會戲稱為炸彈啦.)

對我嚟講, 除非老死到不得了或常有來往嘅親屬才會戥人開心樂於分享見證動人時刻, 否則呢啲場合真係可免則免.

不過話就話戥人開心, 其實好多時我唔係好想出席, 寧願畀咗人情就算, 只是礙於皆屬畀面派對, 至侷住要盛裝出場做活動佈景板.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


266#
發表於 17-8-20 09:23 |只看該作者
吾兒有位印巴籍同學, 最近家中遭逢巨變, 經濟陷入困境, 由於仲未正式成為香港居民, 好多福利都申請唔到, 所以處境甚堪虞.

我問吾兒同呢位同學熟唔熟, 佢話普普通通, 不過平時都幾照顧佢, 有時會幫佢搬搬抬抬, 又會教佢做功課. 我又問咁呢位同學讀書成績點, 佢話算幾勤力用功, 唔係得過且過嘅人.

睇在佢肯伸出援手幫吾兒, 又係肯讀書嘅苦學生, 於是我就提出不如喺經濟上幫吓呢位同學.

吾兒聽後就話, 而家屋企一個二個失緊業, 自己都搞唔掂, 又何來幫到人, 我話省吃儉用慳慳地都可以抽出少少出嚟嘅, 佢話唔駛嘞, 好多同學正準備為佢籌款.

咁就好咯, 有佢哋眾志成城為阿差, 相信呢位同學好快可以渡過難關.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


267#
發表於 17-8-21 10:05 |只看該作者
遲啲就話嚟每家每戶會收取垃圾徵費, 對於每日產生好多廚餘嘅家庭, 唔多唔少都會增加經濟壓力.

開頭我好愚昧, 以為廚餘乃係食剩嘅餸菜, 心諗有狗狗作為後盾, 會將所有剩餘飯菜解決, 所以不禁沾沾自喜話對我嚟講收嘅純粹係垃圾費, 廚餘根本唔關我事.

後來先知所謂廚餘, 唔淨只係指食唔晒倒掉嘅, 仲包括唔食得嘅嘢, 例如骨頭瓜果皮菜根爛葉等等喺每餐烹調時所衍生出嚟嘅渣滓垃圾, 全部歸納為廚餘.

日常產生最多嘅廚餘, 應該算係生果皮同埋肉類嘅骨頭, 以前自製豆漿會將豆渣丟棄, 重量都唔輕. (每次掉都好心痛, 明知有益卻唔知點處理, 結果掉咗好多好多年, 亦心痛咗好多好多年, 近兩三年至發現可將之用嚟焗蛋糕煎葱油餅混入麵糰內做麵包, 才得以解決心痛問題.) 仲有就係西瓜皮, 又係好重秤. (最近又發現可以將西瓜皮涼拌或熱炒, 又解決多一樣.) 有時又會有榴槤, 皮仲重過肉, 閒閒地都有三四磅, 又佔位喎, 一個袋未必裝得晒, 不過而家嘅價太貴, 買嘅機會唔大. 最後就係煲湯骨, 恁地狗狗如何鍾意咬骨頭, 已一把年紀, 最多都係畀軟骨佢咬, 硬骨點都要扔掉, 又係重到死, 到時多數只會買肉嚟煲就算.

當家話而家可能有好多廠家正在研究一啲機器, 專用嚟磨碎廚餘, 就好似外國嘅家庭, 廚房鋅盆側邊設有一個磨碎位, 只要將硬物倒入, 再按下掣就會攪碎. 假如真係有呢啲發明, 除非天價咁貴令我卻步, 否則為長遠計, 我都會購置.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


268#
發表於 17-8-22 14:08 |只看該作者
每逢打風前夕, 我都習慣到街市買定啲肉類菜類, 以備個風打到嚟時, 都可以安坐家中一邊食嘢, 一邊聽住外出呼呼風聲, 寧舍有情調.

其實而家搵食艱難, 就算打風, 好多食肆超市依然照常營業, 根本唔需要特別儲糧, 不過硬係認為有足夠糧食, 個心會踏實啲, 況且一場去到街市, 睇啱嘅就買, 咁就又可以幾日都唔駛出街.

肉類係其次, 最緊要有菜, 咁無論煮飯好煮麵好都用得着, 其次就係生果, 習慣每日都要有, 否則總覺得欠缺啲嘢.

記得細個時, 掛得風球, 即係風力真係強勁, 所以幾乎各式商店都關門, 條街冷清清渺無人跡, 唔似得而家人聲鼎沸, 有啲人甚至會專登出外追風逐浪, 完全不顧自身與救護人員嘅安危, 簡直世風日下.

而每到打風日, 電視嘅廣告時段, 多數都以罐頭即食麵為主, 印象最深就係"楊協記咖哩雞", "長城記火腿豬肉"....... 見片中主角食得津津有味, 搞到我又走去買, 但實際並非如廣告中會令人食到津津有味囉.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


269#
發表於 17-8-23 08:25 |只看該作者
偷得浮生一日閒, 打工仔終於等到額外假期.

今次呢個風比上一個勁好多, 確係有料到, 唔似得上個輕輕的來悄悄的走, 唔講都唔知曾經掛過八號波.

不過最令人擔心嘅係無家可歸嘅流浪貓狗 (瞓天橋底嘅流浪漢可以到庇護中心留宿, 所以唔駛擔心), 風聲凜凜暴雨連連, 一定令佢哋受驚不已, 可憐!

成日幻想, 假如我富可敵國, 第一時間一定會買塊地建一處寵物王國, 收養流浪貓貓狗狗, 讓佢哋每餐得溫飽, 無憂無慮頤養天年.

唉, 都知得個想㗎嘞, 真係富可敵國, 都搵唔到塊地啦, 人都未能安居, 幾時輪到毛小孩有樂園吖.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


270#
發表於 17-8-24 20:35 |只看該作者
以前返工日日要搭車, 令我已習慣舟車勞頓, 而家可能太耐冇坐車, 偶一搭幾個站就頭痛, 認真不中用.

嗰陣時, 一個月總有幾次與上司往內地公幹, 佢就最鍾意勞役我, 明明收咗工, 仲安排餘慶節目畀我, 就係坐幾個鐘車去探訪客戶 (國內人做生意應酬係幾夜都奉陪), 完全冇任何公事傾, 純粹食完餐飯就回程, 來去幾個鐘, 返到下榻嘅酒店仲要食宵夜, 又唔肯放我走先, 上到房差不多凌晨, 一日就玩謝我.

最吹脹係佢老人家跑慣江湖, 一啲都唔覺有疲態, 第二朝仲可以精神奕奕嘆早餐, 而對於一向喺溫室中嘅我嚟講, 經歷一日嘅舟車勞頓, 當堂老咗十年. 要命嘅係佢並無意放過我, 每次都將行程排到密麻麻, 慌我唔死咁. (我心諗, 想對我耐啲啫, 喺酒店大堂把杯談心傾過夠見到夠咪得囉, 何須咁嚟折磨我呢, 見到我被整得容顏憔悴, 唔只一啲憐香惜肉之心都冇, 聽到我訴苦居然仲笑騎騎, 簡直唔係人.)

國內嘅版圖實在太大, 偏偏客戶又分佈於唔同地域, 因而最近嘅車程都要超過一小時. 日子有功, 嗰段時期, 坐車坐到如履平地, 就算偶然坐倒頭座位都濕濕碎, 唔似得而家郁啲都感到頭暈作嘔作悶.

不過雖然難受, 點都唔及當時全天候困於車廂內被逼遊車河咁辛苦, 簡直可列入我人生中艱苦歲月嘅往事之一.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


271#
發表於 17-8-25 09:08 |只看該作者
呢排當家被同事影響迷上數獨, 日日喺報紙寫寫填填不亦樂乎. 佢話咁沉迷唔知好唔好, 我話有機會用腦梗係好啦, 咁就唔怕患老人痴呆嘛.

其實都唔知有冇根據, 只係斷估咁諗, 正如人哋話老人家要打多啲麻將, 等個腦有活動思考空間, 我諗原理都係一樣啫.

好多識打麻將嘅人, 每次喺牌局中會用腦諗出咩牌至唔益另三家, 又會計算上下家扣咗啲咩牌想叫咩糊而避免送牌畀對方, 甚至連咩牌見咗光都瞭如指掌了然於胸, 過程絞盡腦汁亦非常考記憶. 但對於一個唔識打牌嘅我嚟講, 以上全都係麻將高手至做得到嘅技能, 我呢, 只係識將自己認為冇用嘅牌打晒出去, 何謂筒子索子乜花物花通通唔識, 只想盡快砌夠一對對食糊就算. 當家話呢啲係最濕碎嘅雞糊, 又話因為我亂打一通而令其他三家陣腳大亂, 有若盲拳打死老師父, 畀我激死云云.

基於我完全唔駛亦唔識用腦思考, 所以打麻將能強化腦部功能嘅說法, 對我就起唔到任何作用.

當家與吾兒見我日常用腦嘅機會微乎其微, 怕我老來會變痴呆, 於是就提議我玩遊戲機, 希望能藉着遊戲讓我手腦並用.

唉, 弊在我對一啲容易過關嘅遊戲覺得毫無挑戰性可言, 玩幾玩就嫌悶. 好啦, 難度高㗎呢, 我又因屢屢過唔到關而覺得冇心機, 玩幾玩又放棄.

所以, 想挽救我免於患老人痴呆症嘅種種行動, 失敗嘅機會好大, 情況並唔樂觀.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


272#
發表於 17-8-26 11:44 |只看該作者
踏入農曆七月, 傳說有好多禁忌.

例如唔好去夜街, 喺街上如聽到人叫你嘅名, 千祈唔好回應, 要當聽唔到, 因為有可能係在搵替身, 所以隨口叫個名, 咁啱叫中你又應咗, 咁就無辜辜死咗都唔知咩事. 又假如聞到香味, 唔好多口話好香, 行過就算, 否則又係容易瀨嘢.

雖然冇諗過要犯禁, 不過好似幾難做到.

好似聽到有人嗌自己, 第一時間自然反應係會回頭望, 睇吓邊個叫㗎喎, 要停一停諗一諗好唔好應, 我自問就唔多可能做到.

再者, 人嘅壽命係有定數, 邊會咁兒戲被搵替身就成事㗎, 假如咁都中, 即係根本係自身業力所致, 可能與對方有共業, 可能前生所欠, 既然係咁, 即係唔關七唔七月事.

至於出夜街或唔好多口, 咁就容易搞, 一來夜街已與我絕緣, 二來長期鼻塞, 既然聞唔到, 自然唔會有反應.

細個成日聽鬼故, 所以每逢農曆七月總係特別驚夜晚, 事關鬼門關大開, 驚啲鬼會出嚟嚇人, 只要半夜醒咗, 個腦就會胡思亂想, 成晚眼光光到天光, 直至見到天邊開始現魚肚白, 先至敢閉上眼繼續瞓.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


273#
發表於 17-8-27 10:12 |只看該作者
好怕一啲人, 大家只係初相識, 本應淡如水, 偏偏卻非常熱忱, 你未求助佢已經幫你解決咗問題. 但我係想講, 我明明已經正在解決問題, 只是要再思考一下更妥善方法, 佢二話不說就為我遮風擋雨, 我還會長知識嗎?

我知對方嘅出發點完全係抱住見義勇為, 尤其是遇着我呢個乜都唔識猶如瞎子摸路嘅人, 所以至想伸出援手扶我一把, 本應要感激不盡, 但係如樣樣事都要加把口踩隻腳入嚟, 未免就過咗火位了.

好怕一啲人, 口就講要如何努力將勤補拙以追回比人不足之處, 實際卻冇行動力兼人影不見, 累及與佢合作嘅人都要被逼蹉跎歲月.

好怕一啲人, 表面看似日理萬機運籌帷幄, 實際卻每每安排失當, 熟手與熟手拍檔, 客戶群卻寥寥無幾, 新手與新手拍檔, 客戶群卻多出幾倍. 假如有腦的, 應該安排熟手帶新人, 才有能力招呼大量客戶群, 豈非更事半功倍. 而新人對新人, 即係你眼瞪我眼, 何去何從, 完全抓不着邊際.

好怕一啲人, 明明係自家生意, 卻對之不聞不問, 只間中放下一兩句口訊, 跟住就要你做做做, 但係冇畀清楚指引, 叫人點做呢, 係咪應該至少都定條底線, 等班細嘅睇住條底線看着辦呢.

好怕呢啲人, 總有幾個喺左近.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


274#
發表於 17-8-28 09:39 |只看該作者
每次聽到身邊親戚朋友談及與佢哋母親嘅關係如何親密親近, 我就會好羨慕, 因為我與母親之間感情頗為淡漠.

母親係一個傳統女性, 我諗佢認為一生最大嘅任務, 只係好好照顧家中各成員嘅胃, 其他有關身與心嘅關懷, 佢完全唔識, 又或者可以講係唔理.

打從我懂事開始, 我嘅心就一直向住母親, 幫佢分擔家務, 聽佢吐生活中遇到嘅苦水. 有工作之後, 除咗將大部人工畀咗佢, 亦不時以零用錢買禮物畀佢, 補品首飾衣物不計其數, 而只要佢稍為提起呢樣好嗰樣好, 我亦二話不說, 通通送到佢面前.

每當放假, 除非母親唔出街, 如果出的話, 我一定同行負責畀錢, 而行嘅地方大多以佢有衫買嘅商店為主. 有時與同學逛街買衫, 我除咗睇自己嗰啲, 亦不忘到母親平時逛開嘅服裝店, 睇吓有冇新貨返, 假如有母親鍾愛嘅款式和尺碼, 無論價錢幾貴, 我都會買下博取母親歡心, 而自己所買嘅, 多數只係三數十元. 此舉總惹來同學讚賞我有母親心, 我都覺得相比起佢哋只顧自己玩樂, 我算叫做幾孝順.

我以為, 母親負責收, 我負責給, 一切都係理所當然. 唔可以話佢苛索, 畢竟一切都係我自願, 我只係不解, 為何我嘅付出, 一直以來, 都未能得到母親真心實意對待.

隨住自己成為人母, 赫然發現, 原來做一個母親, 唔單只冇得收(希望唔係永遠), 而且仲要源源不絕給予, 但係一啲都唔覺得委屈, 反而甘之如飴. 一心只期望子女成長中無論身心皆健康快樂地成長, 全部付出皆以子女為依歸, 只要佢快樂我就快樂, 其他嘢根本唔會諗, 亦唔覺得重要.

或者有人會解釋, 唔係每個女人都識做媽媽呢個角色, 但我想講, 未做爸爸媽媽之前, 邊個會識做呢, 從來冇一科係教如何做一個稱職嘅爸爸媽媽, 邊個唔係要等到真正做咗爸爸媽媽, 先至將天生潛藏喺內心嘅父愛母愛激活起來.

當然, 亦有父母嘅所作所為令人髮指啦(所以對於衞道之士口口聲聲"天下無不是之父母"以偏概全嘅講法, 我非常/絕對地反感), 好彩只係佔好少部份, 十之八九嘅父母都係充滿愛心克盡己任無私奉獻眠乾睡濕衣不解帶去照顧子女.

我未能與母親心連心, 未能得到佢嘅關心呵護, 未能讓我可撒嬌依偎..... 只能嘆一句緣淺情薄, 若然有下一生, 希望不再遇上.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


275#
發表於 17-8-29 20:49 |只看該作者
狗狗而家好大食, 又完全唔嘴刁喎, 以前一唔啱胃口就推跌狗兜玩抗議, 搞到我成日要花心思喺佢飯食上, 而家好咯, 畀咩佢都食到津津有味, 易服侍好多.

哼! 佢仲夠膽揀飲擇食? 如果佢知道自己曾經逃過一劫, 肯定會抹一額汗.

話說呢, 前排家中經濟拮据, 本來諗住將佢烹嚟食, 慳慳哋至少都夠食一頭半個月. 後來諗吓, 一頭半個月之後, 咪又係死路一條, 既然唔捱得幾耐, 就唔好要佢作無謂嘅犧牲.

於是三個無良嘅主人就對佢虎視眈眈, 睇吓喺佢身上可以發掘到啲咩生財工具.

要一位老人家養起成頭家? 驚唔驚雷劈呀? 咩啫, 養佢千日用在一時, 輪到佢義犬報恩嘅時候嘞.

又話動物嘅本能係可以預警危險即將臨頭而避難嘅, 但係我家隻傻狗完全感應唔到危機正向佢逐步逼近, 依然活蹦亂跳周屋走.

睇見佢身手咁靈活, 有人心念一動, 有嘞! 一於訓練佢成為無敵小神犬, 然後帶佢去旺角街頭賣藝, 相信呢項前所未有嘅表演, 一定會引來途人圍觀, 甚至會喺互聯網瘋傳, 然後受邀上各大傳媒接受訪問, 話唔定可以參加一叮二叮揚名國際..... 哈, 到時主憑狗貴, 睇怕離發達之路不遠矣.

正當在籌劃如何訓練佢跳火圈行平衡木爬繩網攀圍牆入水能游出水能飛嘅時候, 當家就話搵到嘢做.

算狗狗好彩, 唔駛臨老唔過得世, 否則以佢一把年紀要作此壯舉, 老骨頭唔散就奇. 我同佢講, 最好求神庇佑佢個哎呀老爸生生性性努力工作, 先至可讓佢頤養天年, 不然的話, 佢就要重操故業㗎嘞.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


276#
發表於 17-8-30 09:32 |只看該作者
之前講過, 踏入七月會好驚, 但係驚嘅程度, 又唔及七月十四咁嚇人喎.

因為人哋話七月十四先至係群鬼出動嘅正日, 呢日之後鬼門關就會閂, 咁就要再等到明年至可以出嚟尋開心嘞.

於是少不更事嘅我, 每到呢晚, 就望快啲十二點, 因為十二點過後就係計第二日, 即係啲鬼走晒, 咁就唔駛晚晚月光光心慌慌, 可以大覺瞓到天光.

當然, 大個咗聽得鬼故更多, 知道原來只要時運低, 加上同對方嘅線路咁啱搭通, 無論日與夜, 皆有可能撞見, 唔係只限於農曆七月. 所以而家反而心安理得, 冇再自己嚇自己, 只要不作虧心事, 定可安睡到天明.

講起七月十四, 之前仲返工時, 有位平時只喺電話傾談, 一次公司團年飯見過一次咁大把嘅客戶, 有一日臨到收工打電話嚟約我食晚飯, 當時冇諗咁多就爽快地應承, 收線後偶然掃咗一眼放喺檯頭個月曆..... 慢着, 今日係七月十四喎, 七月出夜街已經唔好, 仲要正日㖭, 梗係可免則免啦.

於是我立即回撥電話問佢 : 你早唔約遲唔約, 偏偏喺正七月十四至約我去街, 係咪想當自己撞鬼呀? 佢初初未知我嘅含意, 當細心咀嚼話中嘅意思後, 狂笑不已.

最後我當然冇出到去啦, 收工後就速速趕回家.

後來聽啲行家講起, 呢位客戶係一位搵食男, 吓!? 咁我咪差啲送羊入虎口?

雖然唔知佢當日約我嘅動機只係單純因好傾而食餐飯定係另有所圖, 反正之後大家都冇再提起食飯呢件事, 所以就冇去深究. 後來佢轉咗職, 偶然一兩次喺電話傾公事, 傾完就收線, 多餘說話都唔多一句, 自此之後就再冇任何聯系.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


277#
發表於 17-8-31 14:33 |只看該作者
吾兒有個同學嘅家長, 以玩票性質拍微電影, 邀吾兒客串當中嘅一個角色.

我問可唔可以帶埋我去撈個老臨角色, 再唔係做茶水阿姐都冇所謂, 旨在呃個飯盒食吓都好吖.

吾兒一口拒絕, 所持嘅理由係 : 家醜不出外傳.

曲線踩我一腳.

其實我都係講吓啫, 真係想搵我上鏡, 我都要諗過度過.

以前吾兒間學校有一家媒體接受訪問, 吾兒被抽中為受訪對象, 本來幾好嘅, 弊在要我一齊出鏡呢. 人哋害羞㗎嘛, 平時連影相都硬晒軚, 點學人上電視呀.

但副校長不斷游說, 再唔應承怕會影響吾兒, 只好勉為其難, 不過有條件㗎, 就係我嘅樣要打格仔, 聲音要經過處理, 畫面要漆黑一片......

唔知係咪嫌我麻煩呢, 結果個訪問胎死腹中, 母子同心, 我同吾兒都鬆一口氣.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


278#
發表於 17-9-1 17:36 |只看該作者
踏入九月, 莘莘學子又開學嘞, 早上嘅街道顯得沸沸揚揚, 三三兩兩結伴上學嘅學生隨處可見.

唔知係咪因為佢哋係未來社會嘅主人翁呢, 望住呢班學生, 有種生生不息欣欣向榮嘅感覺.

不過最苦莫過於一班小一學生, 人仔細細粒, 書包卻大大個, 又臃腫又重, 看似會隨時將學生向後拉嘅感覺, 難怪大部份都要弓起背走路, 否則好易向後倒.

其實書包過重, 已經講咗好多好多年, 可是問題卻一直唔多覺有解決過, 每次見到佢哋背到身水身汗, 都不期然感到心痛.

唔知幾時已經話會實行電子書本, 但係講嚟講去, 都只聞樓梯響, 咁耐以嚟都未普及化, 我諗無非又係為咗要顧及一班書商與印刷商嘅飯碗.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


279#
發表於 17-9-2 20:10 |只看該作者
以為明天又打風, 好彩吹歪咗啫.

唔好再打風啦, 啲菜價貴咗多好呀, 又唔靚.

每日唔食過菜, 總好似缺少一啲嘢咁, 但係如果貴, 我又唔捨得買呀, 所以最好就係一直保持菜價穩定.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


280#
發表於 17-9-3 20:14 |只看該作者
以前會覺得眼大大鼻高高先至叫做靚女, 但係而家覺得唔可以咁籠統, 因為見過好多眼大大鼻高高, 但與靚女嘅準則卻有點距離.

最近對審美觀有啲改變, 覺得單眼皮都幾吸引, 不過只限於單眼皮得嚟唔可以係豆豉眼咁細喎, 始終眼係靈魂之窗, 太細的話, 就算幾有神采都睇唔到.

當然, 靚唔靚都要睇整體組合, 有啲五官拆開嚟睇非常靚, 但係拼埋一齊就平平無奇. 相反, 有啲分散嚟睇冇乜特別, 但係分佈喺面上呢, 卻出奇地順眼自然.

朋友話, 如果有得揀, 佢寧願樣貎普通, 但愈睇愈耐看, 好過一剎那令人眼前一亮, 卻只係霎眼嬌, 睇多幾次畀人覺得不外如是.

我問佢, 假如我話畀你聽, 你既唔係霎眼嬌, 又唔覺愈睇愈順眼, 會唔會感到灰心? 如果唔會, 咁老實話你知, 兩樣都冇你份囉.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用


首頁
1213141516...43

尾頁

跳至頁
返回列表
回覆
發帖
高級模式 | 發表帖子
B Color Image Link Quote Code Smilies
你需要登錄後才可以回帖 登入 | 註冊

© 2025 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見