本帖最後由 oguh 於 12-8-7 23:16 編輯
Bruce的勁歌金曲
Bruce來左香港咁多年之後，佢最鍾意既香港文化，係本地動畫麥兜。話說某日電視播左「春田花花幼稚園」，即係有卡通又有真人做果套，佢睇完唔係好明，但又覺得好得意，問我係乜來。然後我買碟比佢睇埋其他兩套「麥兜故事」同「菠蘿油王子」，佢睇完之後非常之鍾意D歌。
佢聽麥兜D歌，有時唔係好明D歌詞，會問我點解。我解完之後，佢又再上網睇。唔知佢點解咁鍾意，之後仲學識唱，成日係屋企好好唱口：「我個名叫麥兜兜...我阿媽叫麥太太......」好似屋企多左個精神病人。
有次出去食飯，我點菜叫左半隻鴨，侍應上菜時，Bruce見到隻鴨，望住個侍應唱：「但現實，就似一隻鴨，下下一定要duck！唔得，唔得，點算呀？」然後自己係度笑，個侍應好尷尬咁笑，我真係想搵個窿捐！係咪痴左？佢話D歌詞好好笑，又好本地。
佢最鍾意「菠蘿油王子」，佢話雖然唔係睇得好明，但覺得麥兜同佢一樣，都係阿爸走左佬，上網聽住首「教我如何去小便」佢會坐係書桌前面，默不作聲聽完又聽。一個大男人既感慨，竟然同一隻豬有共嗚。有時我真係唔係好了解佢，佢都唔係多愁善感既人，點解可以因為一首卡通歌而感觸起來。
後來，佢呢個麥兜狂熱過左，佢就開始成日唱TBB劇既歌。其實我地唔係睇TBB既劇，只係開住電視有D聲咁，只要電視上有TBB劇做緊，而又播緊主題曲，佢一定會唔識唱又跟住唱，仲唱到好大聲。我叫佢收聲唔好嘈啦，佢話：「我唱歌令我廣東話進步呀。」
早排果套「護花危情」，鍾嘉欣唱果首主題曲好入腦，成套劇開頭結尾不停播，其中好上口果句「孤單的滋味，天知我知」簡直成為左Bruce既口頭禪。
我開OT，唔返來食飯，佢係電話另一邊唱：「孤單的滋味，天知我知。」
放假佢叫我同佢朋友一齊去打波，我有其他野做唔去，佢又唱：「孤單的滋味，天知我知。」
夜晚佢上左床瞓，我係廁所自己美容緊，佢係床上攬住張被唱：「孤單的滋味，天知我知。」
佢揸車，我落車去買D野食，行開三分鐘之後上返車，佢又唱：「孤單的滋味，天知我知。」
雪櫃得返最後一罐汽水，佢對住罐汽水唱：「孤單的滋味，天知你知。」
最後，我直頭要禁止佢繼續癲落去，可惜佢都係繼續，直至套劇播完，佢先肯停，我差D神經衰弱同聽覺受損，呢個男人真係嚴重威脅我既身體健康。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
, 
＜~擺起post係咪咁呢.bruce真係好funny
返回列表
