Baby Kingdom - 親子王國 香港 討論區 › 首頁 › 興趣嗜好› 閒來無事說些事.....

興趣嗜好

收藏本版
回覆 發帖
返回列表
跳至頁

首頁
1516171819...43

尾頁
   7
cforchat


大宅

積分: 2720


321#
發表於 17-10-6 10:23 |只看該作者
每隔一段時間, 總會出現銀行又發生事故嘅報導, 作為其中嘅客戶, 真係會抹一額汗, 因為唔知幾時發生嘅情況會出現喺自己身上.

銀行為咗省減人手, 陸續出動好多機器幫忙, 例如存支票機, 打薄機, 存鈔機..... 呢啲機器當中, 唔計最原始嘅提款機, 我用得最多嘅就係存支票機, 因為通常都冇乜人排隊, 每次都好快搞掂.

而存鈔機就一次都未用過, 除咗因為無鈔可存, 最主要原因就係信唔過. 以前聽朋友講過, 始終都要經人手點算, 有時存款者會出錯, 又或者小人之心點算者手腳唔乾淨, 到時真係口同鼻拗, 誰是誰非只有天知地知. 為咗唔想無故失財, 寧願到櫃位排長龍, 都唔想冒險.

一間算喺行內老字號嘅銀行, 以為佢作風保守, 應該每個交易都查清查楚啦, 點知剛好相反, 糊裡糊塗就被第三者扣咗數.

話說有次收到信用咭帳單, 奇怪張信用咭我收到後就束之高閣, 連登記確認收妥新咭嘅動作都冇做, 點解會收我簽帳嘅數呢. 望真啲項目, 原來係一間不知名嘅慈善團體扣起我捐款嘅錢, 銀碼係幾佰蚊. 我連間機構名稱聽到未聽過, 又何來會捐錢呀, 於是打電話與銀行職員理論, 佢仲猛問係唔係自己捐咗唔記得或家人用咗我張咭去捐, 我質問佢, 如果張咭未確認都可以照簽帳, 咁每次要確認新咭至用得, 又有咩意義呢? 對方仲有好多個假設性問題, 總之就係針對我係自己簽帳, 所以人哋至會扣我數, 我都冇佢咁好氣, 一句話唔關我事, 跟住就叫佢哋自己查清楚.

為咗唔想再有下一次, 我索性即時取消埋張信用咭, 費事日後又要拗數咁煩.

事隔一排, 銀行寄咗封信畀我, 話已豁免嗰筆數, 字裡行間完全冇解釋點解會出啲咁嘅錯, 我都費事問咁多, 反正都冇下次.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


322#
發表於 17-10-7 10:13 |只看該作者
有時都會羨慕圈中嗰啲金蘭姐妹團, 若然全都係真心相對的話.....

自問自己嘅朋友運奇差, 好多以為可以推心置腹嘅老死, 到頭來先知原來都只係泛泛之交, 竟然會為咗一啲微不足道嘅事而與我絕交, 話唔失望其實只係呃人.

曾經求友若渴嘅心, 經歷過一而再再而三被無視之後, 我已經唔想再與嗰班識於微時嘅朋友有任何聯繫了, 所以而家我對老友呢個詞, 已經唔係老死嘅朋友, 極其量只可算係識咗好耐嘅普通朋友.

最近有位老友搵我, 話某某朋友遠渡而來想見我, 加上其他朋友話好耐都冇見我, 所以想約埋我乘機出嚟聚聚舊.

換着以前, 我會第一時間就應承, 因為都好想同佢哋吹吹水談近況, 可是而家嘅我已經失去咗嗰份熱忱, 亦提唔起動力再面對佢哋. 因為我覺得, 要好耐好耐先至咁樣聚一聚, 期間卻完全失去聯絡, 互相不聞不問. 而見面時又幾乎只得我發言居多, 其他人只係做聽眾, 同我想與佢哋互動, 彼此訴說別來發生種種事情嘅原意大相逕庭, 咁樣嘅所謂聚舊又有咩意思呢, 所以我諗都冇諗就斷然拒絕老友嘅邀請.

有時我會諗, 當我某日離開世界, 除咗家人之外, 應該唔會有朋友知道, 可能要到若干日子之後, 佢哋偶然記起而想搵我, 若果我嘅電話仲被保留, 佢哋到時先至會得知我已經唔喺度. 假如從此唔再搵我的話, 如果有緣, 就會喺另一個世界碰面, 佢哋才知原來我已先佢哋一步而至.

同樣情況, 如果佢哋當中有人辭世, 又冇人通知, 我一樣唔會知.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


323#
發表於 17-10-8 10:39 |只看該作者
每次睇"泥土的清香", 見到小芳大姐日日做到冇停手, 唔係煮大鑊飯就係到田裡種種摘摘挖挖, 有時又要忙進忙出醃製晾曬食物.... 可是忙裡又可偷閒, 與兒子嬉戲一番, 隨手拈來各樣食材回家煮幾味與家人享用, 間中又到左右鄰里處串門子閒話家常或大快朵頤...... 雖然有時幾辛苦, 但見佢臉上總是充滿笑容, 呢啲生活, 令我欣羨不已.

曾經陪父親回過一次家鄉農村, 幾日裡遠離市區繁囂, 每早被鳥鳴雞啼叫醒, 走在晨間被露水沾濕嘅小路, 呼吸着清新空氣, 飲着新鮮擠出嘅牛奶, 吃着家鄉美食,日間與父親忙於穿梭於鄉親裡聚舊, 夜晚與佢哋坐在天井處品茶乘涼....... 日子過得非常愜意, 令我樂而忘返, 萌生出想早點歸隱田園嘅情懷.

雖然事隔已多年, 但我呢個念頭依然一直存在, 我諗等到吾兒真正獨立, 又搵到陪伴佢嘅另一半, 我就會與當家告老還鄉.

春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


324#
發表於 17-10-9 11:03 |只看該作者
本帖最後由 cforchat 於 17-10-9 11:07 編輯

聽人講, 養狗千萬唔能夠畀生肉佢食, 否則會野性難馴. 我亦從未畀生嘅嘢狗狗食, 唔係怕佢難以馴服, 而係驚生吃唔衞生.

不過有時啲嘢人算不如天算, 日防夜防, 家狗難防.

話說有次買咗免治牛肉, 隨手就放喺灶旁, 跟住去洗手間洗把臉先至預備煮飯, 入到廚房, 搵唔到牛肉, 地下只得一個膠袋, 望吓狗狗, 見佢將舌頭伸出在嘴角邊周圍舔, 唔駛問, 梗係佢所為啦.

好彩牛肉本身生吃都得, 不過就算唔得都冇符, 因為佢都食咗落肚咯, 呢次係佢第一次食生肉, 幾驚佢會肚屙, 好彩冇事.

自此之後, 逢係再買任何肉類, 都會將之放喺佢觸唔到嘅地方.

不過, 一不離二, 第二次偶一疏忽, 又被佢有機可乘.

又有一次, 買咗一包雞腳準備煲湯, 由於要再落街, 所以就將雞腳倒出放喺鋅盆內解凍, 諗住鋅盆又高又係凹下, 斷估狗狗冇可能會掂到, 點知卻低估咗佢求吃嘅本能.

返到嚟, 直入廚房摺起衣袖準備動手, 點知唔見咗包雞腳, 我以為自己冇記性, 放咗喺雪櫃, 點知摷勻晒都搵唔到, 先前完全冇諗過關狗狗事, 而家唔到我唔將矛頭直指向狗狗啦. 唉, 啲雞腳仲未洗, 佢就咁食咗, 唔好肚瀉至好.

呢次係佢第二次食生肉.

跟住之後再買任何肉類, 不論生熟, 佢都會猛咁聞猛咁索虎視眈眈吃過返尋味, 受過幾次教訓仲唔學精咩, 第一時間就放入雪櫃, 費事一個不留心又被佢解決掉.

春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


325#
發表於 17-10-10 11:03 |只看該作者
本帖最後由 cforchat 於 17-10-10 11:35 編輯

世姪女現於某大專院校就讀, 由於所選學科清閒, 所以不時做兼職賺取零用錢.

早排透過同學介紹, 喺一間公眾機構做文職.

初初之所以吸引佢做, 係因為時薪比市價高, 有時做十日八日就夠佢一個月使費, 所以雖然工種幾沉悶, 但係睇錢份上, 佢都續咗幾次約.

最近又將會續新約, 世姪女好有信心一定會被繼續錄用, 可是事實卻係殘酷的.....

收到人事部電話, 人工將會減百分之二十, 問佢續唔續. 唔係嘛, 凍薪都算嘞, 仲要減薪? 而且減幅仲咁大, 搵鬼續咩, 所以世姪女就以功課忙作為藉口推辭.

想當初得知世姪女搵到呢份工, 都戥佢覺得筍, 因為聽講係要熟人介紹, 唔會公開招聘, 而且冇乜嘢做, 行行企企就出糧.

但係減薪後唔只唔筍, 而且仲衰過好多清潔工, 話晒要求嘅學歷係大學程度, 有乜理由人工會咁低至得㗎. 計我話, 根本係想逼佢哋走, 假如唔走繼續做, 就可以唔駛畀咁高人工, 呢招都算毒.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


326#
發表於 17-10-11 09:40 |只看該作者
本帖最後由 cforchat 於 17-10-11 09:41 編輯

"陰陽錯"電影內有一段係講女主角倪淑君喺天台上失足跌落街慘死, 跟住因為保險事宜而與男主角譚詠麟連上線, 從而發展一段哀怨纏綿嘅愛情故事.

於是呢, 我每次晾衫出外時, 腦中都會諗, 萬一大吉利是窗框不牢固, 致使我飛身往下墮, 咁我就會因為保險嘅事而要搵有關經紀跟進.

如果負責我個案嘅經紀好似譚詠麟咁靚仔, 我就可以有樣學樣, 變身靚靚女鬼與佢譜愛歌, 不過首要係先搵到一個水晶音樂盒, 唔係點唱出"怎去開始解釋這段情, 寫一首關於你的詩..... 燦爛的晶瑩, 代表絲絲愛意...."?

但係, 現實中嘅保險經紀, 又有幾多個係靚仔㗎呢, 所以以上情節, 只有電影至會出現. 更何況黑仔嘅我, 上天點會咁益我, 畀個靚仔經紀我遇上吖, 實係樣衰騎呢兼核突之輩啦.

所以我主演嘅唔係"陰陽錯", 而係"陰陽路之撞鬼咯!".
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


327#
發表於 17-10-12 11:41 |只看該作者
而家小朋友嘅名字, 好多都好繞口難讀, 筆劃又多, 發音又另類, 同我哋以前嗰輩簡簡單單嘅名字真有天壤之別.

當然, 愈簡單就愈容易撞名, 志強美玲秀娟淑惠比比皆是, 有時同一班嘅同學, 名字居然一模一樣, 每次明明想叫阿甲, 連阿乙都會和應, 搞到場面好尷尬.

我知係因為時移勢易, 好多父母只生一個小孩, 為咗想佢出人頭地飛黃騰達成為人中龍鳳, 因而除咗擇時辰出世, 連名字都要搵高人算過. 邊似得以前嘅年代, 一生就十個八個乃平常事, 加上大部份都係草根階層, 連三餐都未必有着落, 更何況搵高人指點吖, 咪求其男嘅叫志乜志物, 女嘅叫美乜美物囉, 所以我當時嘅同學中, 總有志強美玲喺身邊.

講返而家小朋友嘅名, 明明一個正宗嘅字, 卻被加上水字旁柱心邊山字頭人字尾, 搞到要查康熙字典先至識讀, 有啲甚至連中文字庫都出唔到, 要分開獨立打每邊, 先至出到一個字, 但明明係兩個字嚟㗎嘛. 有時費事查字典, 唯有求其有邊讀邊, 冇邊就亂咁讀.

喺我哋嘅年代, 好多時成日會被老師罰抄自己嘅名, 假如筆劃多, 就會怨父母大整蠱, 假如筆劃少, 就會佩服父母有先見之明.

嗰陣時會一邊罰抄, 一邊與同學暗暗商量將來為子女取名時, 為佢哋着想, 一定要取簡單易寫, 例如一丁二小三大......

成長後, 發現身邊後輩根本冇一個叫一丁二小三大, 可想而知當年全都在吹水.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


328#
發表於 17-10-13 18:06 |只看該作者
本帖最後由 cforchat 於 17-10-13 18:14 編輯

受朋友所托, 要交收物件畀一位無聊人, 之所以覺得佢無聊, 係從朋友口中得知, 佢咁叫, 我咪又咁叫囉.

約咗對方某時某地等, 未到時, 已千叮萬囑叫佢勿遲到, 因為之前試過一次又係遲, 所以再同佢聲明, 我架車會幾點到, 叫佢要提早5分鐘到來等候.

呢個世界上, 總係有啲人, 你愈驚佢會做某樣嘢, 佢偏偏就做畀你睇.

到達之後, 左顧右盼都唔見人, 打電話畀佢, 冇人聽, 打畀朋友, 佢話嘗試再搵佢. 頂, 已經就佢喺樓下等㗎啦, 都遲, 咩人嚟㗎.

跟住等呀等, 先見條友施施然行嚟車前, 仲話我早咗. 大姐, 咪講咗要提早5分鐘囉, 好在可以將架車泊埋一邊等, 如果唔係, 我走咗好耐嘞.

話佢, 佢仲大條道理話自己點忙點忙, 好似有幾百萬生意上落咁嘅款, 我夠忙咯, 仲要趕下場.

跟住將物件交畀朋友, 朋友告之, 無聊人打電話畀佢, 話人生好短, 好多事要做, 叫佢唔好將今次呢件事放得咁大, 又話大家要互相遷就, 朋友想解釋, 對方根本唔畀機會佢講嘢, 一輪嘴講不停, 最後朋友就放低電話, 由得佢噏到夠, 直至對方見冇反應先至肯收線, 我問無聊人究竟講咗啲乜, 朋友話開頭仲會聽佢講, 跟住見唔對路就索性唔聽, 鬼知佢講乜.

呢啲咁嘅人, 以前工作上都遇見過, 自以為大條道理, 所以有佢講冇人講, 最好嘅方法就係避之則吉少惹為妙, 以後冇乜嘢都唔好再接觸.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


329#
發表於 17-10-14 10:00 |只看該作者
最近成日發生唔見嘢事件, 有啲喺街上, 有啲喺屋企.

先講喺街唔見, 明明取出物件之後, 好小心地將包裝袋放入包包內, 但係當要搵時, 卻遍尋不獲, 已經即時返轉頭作地氈式搜索, 諗住如果唔覺意跌出嚟, 應該可以執得返, 點知金睛火眼地睇到實, 依然一無所得.

好啦, 就當自己大意, 唔小心弄掉, 於是換過第二種包裝, 結果一樣唔見. 唔信邪再換, 依然唔見.

至於屋企, 明明將物件收藏喺高處, 久不久至攞嚟用, 而且係得我用, 其他人唔會掂. 今日要用, 又係反轉間屋都搵唔到.

仲有好多家品, 日日用住, 忽然一日無影無蹤絕跡家中.

唔通呢啲失物, 進入咗另一個空間?
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


330#
發表於 17-10-15 10:32 |只看該作者
真係死性不改!!!!

我鬧緊我自己.

自問係一個執着嘅人, 樣樣事都以自己嘅定位為之最佳, 但係若要人似我, 除非兩個我, 根本冇可能有人同你一模一樣嘅諗法, 莫講話外人, 就算連同一個阿媽生嘅兄弟姐妹都唔會.

每當有人與自己嘅意見唔相符, 我就會直線曲線苦口婆心企圖改變, 名義上係為佢哋好, 實際上係為咗要配合我. 可是你有你一套, 人哋亦有人哋一套, 點解要聽你支笛先. 於是, 每當得唔到預期效果, 我就會好煩, 煩啲人做乜會咁咁咁, 應該點點點先正路吖嘛. 結果係我有我埋怨, 人有人繼續嬉戲, 最後激心嘅只得自己, 你話幾笨呢.

好多時就係因為一啲微不足道嘅事情弄得自己好唔開心, 最戇居係得自己苦惱喎, 人哋根本完全冇件事, 咁樣就搞死自己好多細胞, 幾無謂呢.

本來呢, 如果執着得嚟自己係開心嘅, 咁又無妨喎, 始終人係為自己而活, 邊理鬼得人哋嘅感受吖, 最緊要自己鐘意. (當中如涉及到主觀變態等行為則另當別論) 問題係我並唔開心吖嘛, 唔係因為對方唔受我一套, 而係點解我要去改變別人嚟迎合我呢? 就係不斷自責內疚, 所以就陷入痛苦中.

最乞人憎係, 每次發生類此情況, 當其時都會誓神劈願以後莫再犯, 又會告誡自己要設身處地為人着想, 可是隨住事件淡出, 我嘅誓言亦跟住淡出. 如是者一次又一次, 誓言又食言, 致使活到一把年紀, 依然童心未泯, 唔單只未能經一事長一智看化世事, 甚至愈活愈回頭, 嚴格嚟講算係一個白痴.

今日在此反省吾心, 之前律己嚴對人亦嚴嘅心態, 必須改正為 : 律己以嚴, 待人以寬.

姑勿論對人寬會否縱容, 呢個已經係後話, 重要係我唔駛再自尋煩惱, 因為寬恕別人, 等於放過自己, 對人冇要求, 就唔會睇唔過眼想改變卻不果而生氣, 心境就可以保持平和不再動氣.

點評

bluerain_baby    發表於 17-10-17 11:20
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


331#
發表於 17-10-16 10:01 |只看該作者
唔知係咪入秋呢, 菜價普遍都偏貴, 之前幾蚊斤嗰啲, 而家要十幾蚊, 而且仲唔係咁靚.

雖然話菜貴可以轉吃瓜, 但係唔好以為瓜就平好多, 只係比菜平些少咋, 況且瓜始終係瓜, 雖則一樣營養豐富, 但卻取替唔到菜.

所以而家好怕去街市, 見到買開嘅嘢大部份都加加加, 我就冇心機.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


332#
發表於 17-10-17 11:12 |只看該作者
本帖最後由 cforchat 於 17-10-17 11:14 編輯

喺街上見到一位女子, 長髮飄飄隨風飛揚, 本來幾飄逸, 可惜佢偏偏貼牆而行, 因而每行一步, 頭髮被風吹起時, 髮尾就掃向牆, 我諗被佢髮絲拂過之處嘅牆身應該乾淨咗.

講起頭髮, 唔知係咪女人天生較善變呢, 總喜歡變髮. 長時想剪短, 短時想留長, 直時想電曲, 曲時想變直..... 於是每隔一段時間就會以新形象示人.

我自己長及腰又試過, 短至如男仔般剷青亦試過, 曲與直亦都試過, 如果問我覺得邊種好, 我會話各有各好. (廢話!!)

長直就斯文, 長曲就野性, 長髮多變化, 短髮易打理..... 係咪各有優點呀? 不過無論長短曲直, 最緊要都要視乎臉型而定. 我較好彩, 個個髮型師都話我嘅臉型長短皆宜, 所以我可以隨意地剪短或留長, 唔駛顧慮到要遷就臉型.

不過隨住年紀漸長, 個人認為如仲留長髮的話, 就唔太適合, 一來會吸走營養, 二來一臉皺紋卻長髮披肩, 好似有啲突兀. 當然, 有人選擇盤起成髻, 但係我覺得留長髮無非都係享受嗰種飄逸感啫, 如果全天候被紮起, 咁就無意思啦.

不過無可否認, 對一啲懶得上髮型屋嘅人, 長髮無疑較方便. 除非要涉及染電修等複雜工序, 否則真係可以一年半載都唔駛上髮廊, 我留長髮時就試過一兩年都唔駛踏足髮型屋. 相反, 短髮雖然日常打理方便, 但係一定要定時定候去修剪, 無論係要留長嘅過渡期, 或是繼續剪短, 到咁上下時候就要奉上銀兩畀髮型師.

點評

bluerain_baby    發表於 17-10-17 11:17
bluerain_baby    發表於 17-10-17 11:17
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


333#
發表於 17-10-18 11:06 |只看該作者
吾兒最近忙功課, 搞到食無定時, 有時吃過早餐之後, 直至晚間新聞時段先食晚餐.

因為咁夜至開餐, 返到屋企差不多瞓覺, 基本上冇乜時間消化, 所以搞到第二朝頂住個胃食不下嚥.

由於我唔知佢身體狀況, 所以就照平時早餐嘅份量, 點知佢呢頭食, 嗰頭就嘔, 嘥料!

我同佢講, 假如明知當晚食滯咗, 就預先通知我, 等我第日唔預早餐畀佢, 咁樣就可讓胃休息一下, 唔駛咁操勞, 又唔駛浪費食物.

佢話冇諗過會嘔, 係食物落咗肚先至覺得反胃, 我話點會唔知呀, 未食前點都有種飽滯冇胃口感㗎嘛.

哈, 你估佢點講呀, 佢話喎, 每次見到你煮嘅嘢都唔開胃㗎啦, 但係都照啃, 點知今次會嘔啫.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


334#
發表於 17-10-19 17:57 |只看該作者
朋友訴苦, 話手腳嘅皮膚極度痕癢, 當我正想回答因為天氣乾燥所致時, 佢已先我一步話唔關轉天氣事, 因為一年四季, 冇特定時間出現, 好番一排又來過, 周而復始, 中西藥合璧, 內服外敷都唔見效, 苦不堪言.

於是, 我就以過來人嘅經驗, 向佢指點一下迷津 : 用自己嘅尿液搽患處.

呢個方法當然唔係我自創㗎啦, 係一次睇某位才女嘅文章介紹過, 我又係好似朋友咁, 不分季節腳部皮膚忽然會好㾗, 搽勻藥膏依然痕癢難當, 於是姑且用才女嘅方法, 連續試咗幾次又真係唔痕喇喎.

朋友話接受唔到尿液咁污穢, 佩服我居然頂得順. 唓, 話晒係自己出品, 況且係喺沖涼前搽, 搽完都沖走啦, 外敷啫, 又唔係內服, 怕乜喎.

其實我都試過搽其他藥膏, 又試過搽火酒, 諗住殺菌, 但係都唔得, 最終都要搽尿先至止到痕. 有時小便完去沖涼, 先至醒起要搽, 可惜已無得出. 就係成日唔記得, 搞到時搽時唔搽, 感覺上好似有排都未好.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


335#
發表於 17-10-20 17:26 |只看該作者
自問廚藝就唔係好了得, 但係剝蝦卻有一手.

無論生蝦熟蝦, 頭身尾一剝就搞掂, 好快手.

每逢屋企煮蝦, 我都會落手落腳為家人效勞, 因為佢哋剝一隻, 我已經可以剝四五隻. 所以每次食白灼蝦, 我會預先剝晒畀佢哋. 但其實咁樣已經冇咗剝一隻吃一隻嘅情趣嘞喎, 唔明點解仲要煮白灼蝦.

以前電視綜藝節目, 偶然會舉辦乜乜鬥快比賽, 我曾經同母親講, 如果有剝蝦比賽就好咯, 我實入三甲.

當然, 強中自有強中手, 一山還有一山高, 我都係講吓啫, 真係有剝蝦比賽, 我又點敢混入強陣中與人一比高下吖, 怕且未入決賽已被叮走.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


336#
發表於 17-10-21 08:09 |只看該作者
朋友問, 到底呢個世界上, 有乜嘢工係冇壓力㗎呢..... 呢個問題, 其實我都想知答案.

我諗除咗未識性嘅小朋友, 同埋智商有問題嘅人之外, 應該人人都有壓力, 只視乎壓力係來自邊方面.

以一間公司為例, 上至老闆下至清潔工, 各有各壓力, 前者要日日為營運而費神籌謀, 後者要為飯碗擔憂.

就算我唔駛工作, 看似理應毫無壓力, 但其實一樣有, 例如因賦閒在家無所事事, 每每時刻零食不離口, 就算唔買, 都會自己弄, 時鹹時甜時多時少, 又怕肥又怕滯但又忍唔到口, 搞到每次吃完都有罪惡感.

而讀書嘅學生哥, 除咗每日要應付繁重嘅功課, 亦要應付父母嘅期望, 一樣充滿壓力.

連我家狗狗亦不能倖免, 獨自在家孤獨所帶來不安嘅壓力, 出街時遇上同類向佢吠叫, 突如其來嘅響聲, 被人無故埋身...... 種種外來舉動都會令佢驚惶失措.

所以, 莫講話想搵一份冇壓力嘅工作難過登天, 就算想做一個冇壓力嘅平凡人都冇可能.

或者所謂嘅壓力, 亦算係一種推動力, 冇咗呢份推動力, 可能就唔會進步.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


337#
發表於 17-10-22 09:51 |只看該作者
我發覺好多父母都有一個共通點, 就係寧願自己節衣縮食, 都會將最好嘅畀晒子女.

好似我咁, 用喺自己身上就求求其其, 用喺吾兒身上就貴貴都捨得買.

例如電子產品, 慢到拉牛咁都可以死忍爛忍, 唔想嘥錢更換, 但係如果吾兒正在十五十六間唔知好唔好更新更快嘅產品, 我一定舉腳贊成叫佢馬上行動. (其實都唔知究竟有冇實際需要, 只係相信佢提得出一定有用途)

由於賣出去唔值錢, 所以每次有更換, 好自然倆老就負責接收, 因而時常要重新學習如何操作. (之所以唔願換新機, 除咗唔想浪費金錢, 另一主因亦都係因為懶, 唔想要重頭學操作)

最近吾兒換新電腦, 一如以往, 睇吓邊個肯接收, 今次輪到我, 因為當家用慣佢部千年老機, 唔想學新功能.

事先已聲明, 一定要吾兒教我點用, 而以我嘅資質, 冇可能三言兩語就學識, 所以要等吾兒百忙中抽空至可以教我.

喺我間中催促下, 終於上咗第一堂課, 內容係如何開機關機, 跟住就 Goodbye Class, 前後都唔夠一分鐘.

咁搞法, 睇怕要十年八年先至學得識.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


338#
發表於 17-10-23 11:36 |只看該作者
夏天日長夜短, 假如早早瞓, 第二朝就會早早起牀, 幾乎鬧鐘未響就起身. 有時會叫自己再瞓吓㖭, 可是愈叫就愈醒, 與其喺牀上輾轉極都係瞓唔返, 不如起身算嘞.

冬天就唔同, 日短夜長, 加上窩在暖烘烘被竇內, 總係唔願起牀, 好多時鬧鐘未響都唔知醒.

由於習慣咗煮早餐, 所以點唔願都要起牀, 否則當家就要紥炮, 雖則佢提議可在外解決早餐, 讓我瞓耐啲, 但係我唔想囉, 一來在外用餐嘥錢, 二來又冇益.

有時想喺送佢出門後再回到牀上瞓個回籠覺, 不過多數都瞓唔到, 只好出去買餸又或者做吓家頭細務, 等下晝先至瞓晏覺.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


339#
發表於 17-10-24 11:20 |只看該作者
有啲人樣貌平庸, 偏偏桃花運勁旺, 令比佢多幾分姿色卻冇乜男性埋身嘅朋友恨到牙癢癢.

朋友中就有一位咁嘅人, 嚴格嚟講唔屬於係靚女級人馬, 但圍繞佢身邊嘅異性卻絡繹不絕, 就算已為人婦, 依然大把人追.

有時同佢去街, 不時見佢對住手機笑到甜絲絲, 細問之下原來係各方情人傳畀佢嘅窩心短訊, 難怪咁得戚啦.

又有時同佢去街, 會由其中之一送佢到約定地點, 直至我出現, 對方先至會離開, 我葡萄地問佢駛唔駛咁痴纏呀?

見佢手上咁多"貨", 於是叫佢喺手指縫彈啲畀我, 佢話唔敢帶壞我, 因怕被當家斬喎, 咁識諗, 點解又唔怕被佢另一半斬呢.

可能就係男伴川流不息, 所以佢換畫嘅速度都好快, 今次同呢個愛得甜蜜, 隔咗冇耐又話已告一段落, 真兒戲.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


340#
發表於 17-10-25 10:46 |只看該作者
有時發現手腳會無故損傷, 時而割傷時而撞瘀, 硬係諗唔起幾時整親, 奇怪當時居然唔痛, 要事後痛先至見到傷口.

每逢發現有損傷後, 都會盡量保護傷口, 避免觸及令其變得嚴重, 偏偏愈保護愈容易碰到.

好似最近唔知幾時割損咗手指, 已經好小心唔掂, 但係總係喺你唔多留意嘅時候就掂到, 痛到飛起. 都唔明嘅, 成隻手範圍咁大, 傷口只係好細好細, 點解度度都掂唔到, 總係掂到傷口㗎呢.

記得吾兒細時, 腳趾公受咗傷, 本來將近埋口痊癒, 點知有次行街被一個女士嘅高跟斗零踭不偏不倚踩正佢痛腳處, 令傷口裂開, 痛到佢即時號啕大哭.

平時冇事冇幹唔見被踩喎, 硬係撞正有傷時至嚟加多一腳, 成隻腳咁大, 卻偏偏踩正傷口位置, 都唔知係巧合定係上天有心愚弄.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用


首頁
1516171819...43

尾頁

跳至頁
返回列表
回覆
發帖
高級模式 | 發表帖子
B Color Image Link Quote Code Smilies
你需要登錄後才可以回帖 登入 | 註冊

© 2025 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見