第44集看點
總結
我睇完呢一場戰爭，最深感受係大家同是本根生，大梁禁軍又好，慶曆軍又好，原本都係大梁子民，而家各為其主，有幾多士兵係真係知道唔係真係出師有名？有幾多死咗都唔知原來係咁嘅一回事？譽王同靖王都係梁帝嘅親生仔，兩個其實都唔係一定要水火不相容，但權力令人腐化，梁帝本身又何嘗唔係謀朝篡位！今日同根相煎嘅局面究竟又係邊個做成？何以要自己骨肉相爭相鬥，目的為何？
從呢件謀反事件可以睇到大梁國政的確有好多問題，以兵制來講，禁軍可以由皇后指令，巡房營由禁軍接管，因為副統領效忠咗皇后同譽王，所以基本上金陵已經失守。
另外雖有明文規定，都督於非於戰事冇專擅之權，百騎以上兵馬不見兵符不出，所有指令都要有兵符同密詔，兵符同密詔係完全控制於梁帝一人手中，不過兵符可以偽造，都督負責驗証，雖然統領可以覆驗，但只要有人被收買就可以通行。靖王指出軍隊已非當年，由於軍餉被克扣，軍紀敗壞，只有四境前線幾個行台軍仲有D硬骨頭，其他地方屯田軍已經冇咩沙場鐵血軍魂。以咁嘅情況，加上呢場內訌引起咁多人命損失，國力已大為損耗，做就後來被鄰國來襲嘅時機。
以咁多個統領來講，最好嘅行軍策劃就係林殊，靖王以前同佢一齊長大，但因為林殊本身已經有天份，加上林燮親自調教，林燮又係大梁最強七萬赤焰軍統領，作為少帥嘅林殊，行軍佈陣已經係一等一人才，即使唔可以上陣殺敵，有佢呢個強大嘅軍師，先可以造做呢場以小敵眾嘅成功。對比呢個上沙場嘅靖王，長蘇嘅戰意更強，佢不計自己生死，叫靖王以社稷為先，即使自己此戰不勝，亦唔好瞻前顧後，作為主帥，靖王心志要堅定。靖王俾我感覺係一個未出師嘅學徒，好多方面都未夠型，就而家情況咁睇，長蘇再長多十年命都冇用，靖王真係有排學，智商唔夠高，情商又唔掂，人情世故更加唔識，根本冇一忽可以睇到佢將來擔得起作為大梁儲君呢個位。
郡主終於出現，好感動，佢好英氣。知道宗主有難即刻趕嚟，去到獵宮，第一句問就係蘇先生可安好，跑上大殿時大叫開門，宗主聽到係霓凰，又驚又喜，成個人即刻好似上咗色咁，雖然要避忌，面上唔可以太明顯表現D咩，但個心係好甜好甜。霓凰抵不住興奮，一邊同梁帝報告一邊望向宗主，女兒家嘅羞澀暫且被見到心上人嘅喜悅壓過，後來發現長蘇掛住另一個女人嘅時候，呻醋乃係人之常情，難得劇中有小小感情戲，之後宗主身體更差，情節再發展落去簡直想虐死人。
花旗太太生活在花旗國，留意時差，你問我未必即時答到。
發表於 
,不過其實睇蒙大統領、穆青、浴巾幾個都幾溫暖,稍為調和下.
返回列表
