蝦佬蝦佬~ 我又黎喇~~
消失左一排，唔知大家仲記唔記得我呢~?
呢排除左忙之外，最主要係我猶豫左好耐寫咩好......
一直以黎都只係諗住同大家些牙下啲韓國笑料，真係冇諗過原來有啲字眼會令人睇到咁唔舒服、咁反感...
所以當我知道嘅時候，我都真係打左個突，好似有啲迷失左方向咁...
令到有啲原訂左會寫嘅topic我都即時hold起左，甚至諗過由個post石沉公海…
最後，經過我反覆思量後… 我決定…
返黎繼續寫!
應承大家，今後我會好好用心咁咬文嚼字，盡量避免用一啲令人誤會嘅字眼，希望大家都可以睇得安心又放心~
見到有好幾位jm留言，想我講下我同C6嘅故事
其實故事就真係講唔上，因為我地真係好平凡好平凡好平凡，大慨我可以分享嘅就係我地相識嘅過程同點樣磨合到結婚
所以黎緊我會寫多兩篇左右嘅留學分享，之後就會正式介紹我家C6出場，希望大家會繼續收看~
第四篇 – 同班同學
今日，我想同大家講下我係學業上遇到嘅瓶頸…
首先，韓文能力總共分為6個級別，1級係最低，6級就係最高，我係由1級讀起嘅…
係1級呢啲BB班，內容基本上唔會複雜得去邊，返學好玩又開心，只要唔係完全唔溫書，其實成績唔會差得去邊，所以我好好彩咁係1級係全班第1名，而當時嘅班主任就曾經同我講過，話只要我直至3級都繼續保持到成績，學校會offer獎學金俾我
聽到獎學金即時雙眼發光!! 講到尾我係去韓國前一年做pt儲嘅所有錢再加埋我借嘅grant loan，都真係啱啱好夠錢，所以聽到我只需要再考多兩次第1就可以有獎學金，當然我即時發哂力去讀書啦!!
不過，世事唔係咁簡單嘅…
2級嘅內容真係話難唔難、話簡單又絕對唔係簡單，溫書唔需要記太多嘅嘢，唔需要背太多嘅嘢，難係難在啲文法個個都好似啲韓妹咁，個個都一樣樣嘅?!!!
所以要分清楚邊個打邊個、幾時用邊個係一件好困難嘅事，而最令我煩心嘅，除左呢啲韓妹文法之外，就係我嘅同班同學…
事件1 – 咒怨之人妻版
我班有12個同學，而12個同學裡面，我竟然係年紀最細嘅!!! (我係80後，當年已經2X歲…) 當中有一位黎自中國青島嘅姐姐，大我10幾年，係嫁黎韓國先學韓文嘅，由於佢大我咁多年嘅關係，佢係十分之照顧我嘅，而我亦都好感激佢…
不過，我諗人妻嘅世界實在係太複雜喇… 當然我而家梗係清楚啦，但係當時嘅我就真係好抗拒，因為每一日上堂嘅內容總係離不開飲酒、鬧老公同怨99… 明明今日學嘅文法係 “因為…，所以…”，偏偏即場作句就會變左 “因為99好乞我憎，所以今晚我飲左3支燒酒”… 再唔係就係明明今日教俗語，例如“大話精”、“神婆”，作句就會變左“我老公係死人大話精”、“我99係超級迷信神婆”…一類怨氣極重嘅句子(well，我已經修飾過用字架喇…)，最慘就係仲要一對一嘅練習，次次都殺我一個措手不及，令到我唔知俾啲咩反應好…
事件2 – 仲間由紀惠係韓國人?!
另一位日本女同學同樣3X歲，佢係我之前宿舍同房台灣姐姐嘅朋友，其實都好幾次聽過姐姐話佢好“特別”，除左佢每日返學都會著哂成套銀行櫃檯小姐個隻套裝加高踭鞋，但係配行山背囊之外 (你冇睇錯! 係Columbia個隻行山背囊啊! 而且係塞滿架喎…)，就係佢去到邊都會帶埋佢個行山背囊去… 我講緊包括小息時間去廁所要揹住去，同埋係宿舍夜晚沖涼都會揹埋去…
而且就係佢好鐘意成日問我地佢係咪好似韓人，基本上係每日問每個人3、4次咁滯，原因係佢話佢自己有韓國血統，佢黎學韓文係為左尋根咁話喎，之但係，佢真心根本就係短髮版嘅仲間由紀惠，我又點會話你似韓國人呢… 不過如果我地講真話話佢唔似，佢就會即時好嬲，碌到隻眼好大、用好惡嘅語氣同我地講 “我身邊個個都話我似韓國人架囉!!!係日本啲人都以為我係韓國人囉!!!”
自此之後，我地都學精左，一定會答 : “嘩~~直頭一睇你就係韓國人啦老細!!!”
(周星星上身mode)
事件3 – 來自日本的漢堡神偷
呢位日本男同學直頭係我學校嘅經典!!! 基本上全校師生都識佢咁滯…
話說佢係一個長情嘅人，因為佢每一日日都係著同一個style嘅衫，甚至乎我有懷疑過佢究竟有冇洗衫… 大家都知麥當當漢堡神偷係咩樣架可?!!! Yes! 呢位男同學每一日都係著間條衫(所有色嘅間條衫都有齊…勁!)、黑色長褲、尖頭皮鞋、長黑色大褸，再加一頂同漢堡神偷同款嘅圓帽!!!! 我講緊係一年365日都係一樣嘅打扮!!! (當然，夏天唔著褸，但係其他係一樣…) 再加上佢係煙不離手(佢講過自己一日食3包!)，全身都係好濃烈嘅煙味，但係亦都好有manner咁次次小息食完都會噴一噴香水再入課室 (想像得到古龍水加煙味嗎?? 係真係會即時頭痛架…
)
其實佢點著唔係好影響我嘅，就算佢全身煙味，其他同學都會即刻打開窗(零下20幾度照大大隻打開…)，而且我可以揀唔同佢坐，所以影響極都仲可以忍到嘅，只係問題就在於佢每日返學係唔聽書、只做自己嘢、分group討論永遠唔出聲同唔參與! 呢一個就係最影響到全班同學!
但係奇就奇在佢又唔係做功課or做其他唔相關嘅嘢，最過癮就係佢係做緊後幾個chapter嘅notes!!! 冇錯，例如我地而家教緊chapter 1，上堂佢會自己做chapter 3嘅notes同exercise…?!!!而且佢係一眼都唔會望個老師!!! 當然我地老師係個種一個都不能少嘅老師，所以係會照樣問下佢嘢，等佢講下韓文練習下，而佢次次一開口，都必定嚇傻我地全班，因為佢一開口答嘢，除左必定每句都有粗口之外，就係佢都會語出驚人爆自己大穫!
有一次老師要我地每個人分享下自己之前嘅工作經驗，當到漢堡神偷嘅時候，漢堡神偷同學竟然分享佢之前係人妻俱樂部返工嘅血淚史!!!
當佢越講越detail，點樣令到啲人妻賓至如歸嘅時候，老師就即刻stop左佢 (噢撈…未入肉啊老師…
)，之後老師就問佢當時返工辛唔辛苦，漢堡神偷就答 : “好X辛苦囉，日日都要湊住班老XX!!!”
(各jm請自行fill in the blanks)
如是者，我整個學期就係係一片怨憤、古怪、煙味加粗口之中渡過，呢個2級可以話係我最辛苦嘅一級! 不過，好好彩我依然力保不失，繼續保持住我嘅第1名，而我距離獎學金又近左一大步喇~!!!
黎緊下一篇將會交代我同韓仔之間嘅恩怨情仇，亦會正式開始鋪路我家C6出場!
下一篇見~
fu101011 發表於 16-5-27 13:11
我女今年升中，成日同我講要去韓國留學，想問下一年學費連食宿約幾錢?
發表於 
返回列表
