Re: 打倒pk奶奶
我又想問下大家, 我個99又可唔可以算得上係pk呢???
我99有一次趁我老公行開左就同我講
"妳呀, 要多d返去探下妳婆婆啦, 佢老啦, 冇乜得幾多年架咋!!"
嘩~~ 當時我打左個突 , 我睬過你呀, 咩叫冇乜得幾多年呀, 我婆婆身體健康長命百歲呀!!!
我同返我老公講, 佢都話, 乜佢阿媽咁樣講野!! 跟住又話佢都係好意, 只不過講野唔經大腦!! 我咪鬧返佢囉, 就算點樣好意, 點樣唔經大腦, 都唔可以咁樣講野架麻, 佢叫我點樣答佢呢!! 如果我婆婆真係有咩事, 我實發火架!!! 邊有人咁樣咒人地架!!!
仲有, 我99成日發癲.... 我好煩呀... 我覺得我就黎痴線架啦!!!!
上星期有一日夜晚, 佢自己開一個好普通既搭鎖(果d鎖窗花果d鎖仔), 因為鎖匙太多同太似, 所以試左好幾次都試唔岩, 佢又唔係有系統咁去一條一條匙咁試, 又要跳住黎試, 試左幾次唔得就開始"猛陣", 跟住終於開到, 整完d野就開始鬧人, 全屋個個人都鬧勻, 又講晒粗口又x街又叫人去死, 仲越鬧越激烈, 但係佢唔係指住d人黎鬧, 而係好似d癲婆咁指天督地咁樣鬧, 大大聲驚死隔離聽唔到咁!!
佢一路係咁鬧, 鬧鬧下開始剩係鬧我老公同我 , 又話我地冇去問候佢, 又話我地冇家教, 唔知邊個教出黎 (我心諗, 你個仔唔係你教架咩, 你平時仲好自豪話自己教得d仔好好架!!!) , 跟住就開始用粗口起勢咁小我老公同我 , 又話我地運路行(咁我屋企門前真係有2條路, 行另一邊真係近d喎) , 又話日日都唔返去睇下佢(喂, 結左婚有頭家, 仲日日返阿媽度, 咁結黎做乜? 而且我老公同我日日都有打電話返去問下佢點樣, 我3日就會過去一次同佢傾計) , 佢d粗口真係, 野野都咒人仆街咒人死既!!
其實我真係唔係好明, 我知, 佢係有精神衰弱, 點解佢唔食藥呢? 唔通佢唔想好返? 定係佢覺得有病令佢有特權所有人都要就佢? 有病唔係大晒架麻!!!
其實本身真係只係一件好小既事, 仲要唔關所有人事, 係佢自己"猛陣", 點解就要令身邊既人受苦? 點解要推開晒身邊所有人, 然後佢就係度怨天怨地怨仔女點解要離開佢, 點解唔孝順, 點解唔做裙腳仔? 佢點解要令自己變成好似粵語殘片裡面d可憐新抱咁樣, 但係明明所有人都對佢好好, 連d唔熟既人都同佢講話佢d仔同新抱真係對佢好好架啦, 佢都聽唔入耳?
點解我做左咁多野, 佢都仍然要覺得我唔夠好? 覺得係我教壞佢個仔??
自問我真係做得好足, 佢有病, 我陪住佢等佢訓著我先返我度做freelance(果時仲要趕第2日交稿), 早上買麵包, 晏週煮粥, 下午茶煮麥皮, 夜晚煮通粉, 佢話唔like食, 我即刻煮過第2樣, 佢心情唔靚我係旁邊陪足佢5個鐘, 佢要買車我即刻週圍問人有冇識人有車賣!!
佢一開聲話要人幫佢, 我即刻飛身過去, 佢有咩叫我做, 我有邊次冇做足? 連佢話婚宴果晚既mv佢個仔有26張相我得5張我都照忍(我真係覺得好侮辱, 連佢d親戚都問張mv係咪我老公既個人專輯!!), 佢話我d晚裝太露(其實咪又係普通晚裝一套), 我又即刻買條毛毛披肩披住, 又用扣針扣住驚死露咁d肉出黎, 佢話唔鐘意玩新人, 我地又唔玩, 佢話乜, 我就照做乜, 有時我老公唔順氣想同佢嘈(99發癲掉晒佢d野出街), 都係我禁住佢, 我自問真係從來未試過對一個對我差既人我都咁忍佢, 對佢咁好, 點解佢都仲要咁樣??????? 仲有, 我對我自己阿媽都冇咁好, 點解佢都唔領情?? 人地話相見好同住難, 佢係相見唔好, 唔見仲好!!!!
之後, 我同我老公講, 我真係好驚我會痴線(我試過係我老公面前同佢講拜拜然後割腕, 又試過係條天橋度呆望住下面d車, 我老公即刻拉開我, 佢話果一刻見到我好似想跳落去咁) , 而家我d朋友都同我講叫我唔好猛得咁緊, 放鬆d, 佢先知道我真係好大壓力, 我同佢講我真係好想搬走, 我唔想再對住呢個99, 我唔想再理咁多野....
跟住佢諗左一陣, 話, 5年之內努力慳錢搬走!!
聽完呢句說話, 我真係放鬆左少少, 終於, 我睇得到終點..........
其實, 佢點樣鬧我, 我可以盡力忘記, 但係好似前面咁樣咒我d屋企人, 我真係點樣都忘記唔到!! 佢仲要唔係講過一次, 而係講左好幾次, 唔通我d屋企人有d咩事佢先安樂? 定係要好多人有事, 佢先會覺得公平d? (因為佢成日覺得人人都好過佢, even乞兒都好過佢咁話!!! 佢成日都話全世界佢最慘架啦!!!)
佢而家已經嬲左我老公成幾日, 佢自從自己發完脾四鬧完人之後就一直係咁嬲我地2公婆, 佢一d都冇覺得自己唔岩, 我老公話, 係佢心目中, 佢發脾氣唔係因為自己開唔到個鎖呢d咁小既事, 而係我地不孝所以佢會發脾四!!!
老實講, 我99有過好多次前科, 佢成日亂咁作野, 然之後同人地講到真既一樣!!!
好似我叔仔, 佢以前讀書唔成, 6299送左佢出國讀書, 但係佢唔珍惜, 讀左2年都畢唔到業(中六中七), 咁佢打電話返黎求佢地2老比佢試多一年, 我老公好鍚呢個細佬, 所以又幫口話不如比佢試多次啦, 我都可以幫下手架!!
咁上年叔仔搞大左女友個肚, 一定要結婚, 咁99覺得冇面, 就開始數佢呢個仔, 數數下覺得唔夠, 就數我老公當年點樣指住佢, 逼佢一定要比個細佬去讀書, 仲話點樣惡點樣惡, 講左好幾次, 第1,2次得我同6299係度, 我唔知件事係點樣, 所以我冇出聲, 第3次老公聽到, 就大大聲話, "阿媽, 你諗清楚? 你諗清楚d? 我當年真係咁樣同你講野既? 如果我當年係咁樣同你講野, 你一早打死左我啦!! 你諗清楚d, 如果我真係咁樣同你講野既, 我批個頭比你當鄧坐!!!!" 跟住我99就唔出聲, 從此之後就冇再講過同一番說話!!! 根本就係佢係度亂作, 然之後自己又信自己作出黎既野, 真係多到數唔晒!!
♡女人想要奢侈品，其實要的是男人的捨得！
♡女人想要你出差的禮物，其實要的是男人的掛念！
♡女人想要生日禮物，其實要的是男人的心思！
♡女人想要擁抱，其實要的是男人的溫暖！
♡女人想要吵架，其實要的是男人的包容！
♡女人想要的一切，無非是要男人在乎她的感覺！
發表於 
返回列表
