hugoma2015 發表於 15-10-13 18:28 
琴晚49集果場對質，對胡歌又喺一次大考，覺得如何？夏江既反撲喺同原著一個好大區別。原著夏江無聯繫上越 ...
宮羽呢個角式既然已有郡主感情線，我覺得其實已經可有可無，跟去九安山已經覺得好多餘，為咗俾多幾場戲佢就安排易容入去天牢（果D叫做易容術？我O咀啦），再交代玲瓏公主有個仔，呢D可以由第二個人做都得，搞咁多嘢出嚟又唔係必須有D多餘。
其實景琰已經認出佢，分番D時間同心思俾郡主都應該，唔係一陣又生離死別我覺得愛情嚟得太薄啦。
我有睇到官網貼出嚟果幾個章節，原著小說相認嘅契機感動好多，靖王終於自己發現，佢就算係執著於以前嘅感情唔信林殊會係眼前嘅宗主，但已經懷疑咁耐，冇可能再會話認唔到，而家要由夏江口中講出嚟，再由長蘇自己承認（其實長蘇都可以辨解為當時用嚟玩心理），變得太過冇意思，而且由言侯同紀王口中講出以前父輩嘅瀟灑往事都俾到故事更豐富嘅人性色彩，我明白劇要更多矛盾更多大場面至吸引，無可能兩樣都兼顧，唯有將事實放明顯D，但就冇咗意會，描寫兄弟情就變得有D唔夠深入啦。不過你都講得啱，而家靖王果段內心戲就咁用鏡頭剪接交代，靖王唔去追宗主，反而直接去芷蘿宮，處理可以幫到王凱，如果佢可以放低偶像嘅包袱去演，唔好一味瞪大對眼的話，佢嘅靖王係可以立體D有人性多D，而家咁多人鍾意靖王，其實我都唔知係因為小說定因為王凱，佢樣係唔差，但演戲得個樣唔夠，佢呢段金殿戲最多叫做勉強收貨，但加分係因為安排俾靖王為宗主擋毒酒呢一下。
我鍾意言侯講出梅石楠來龍去脈果一度，亦都睇出上一代好多感情千絲萬縷，令其他角色都精彩好多。原著榛子酥果幕好正，因為我知你係邊個，見到你伸手去拎榛子酥，以前見你食咗會點，而家更加心疼你，當然要即時制止，宗主想逃避呢個軟弱點我鍾意多D，而家劇入面有時悲有時喜跳跳下，不過對比下，越係開心之後宗主離開就越慘。見到飛流擔心宗主入宮果段，佢天真無邪更對比到其他人嘅不純粹。
之前你話過蔡荃都要向現實低頭，人人都有陰暗面，正直剛烈如蔡荃都有死穴，難保以後冇再有呢類情況，佢自己痛恨黨爭痛恨不公平，自己又何嘗唔係有偏見，相對下，沈追就老練好多，佢個心更廣更肯變化。
胡歌呢兩集，金殿對質最初淡淡定定，雖然知道皇帝要驗佢手同頸做咩，但因為已挫骨削皮，佢唔驚會有証據，就算出到夏江講佢係林殊，佢都一直好定咁想計策，以三寸不爛之舌同心理戰去玩蠃夏江，只係最後敵唔過梁帝嘅心狠手辣，佢都估唔到靖王會幫佢擋毒酒，見佢見靖王攞咗佢隻杯佢都好意外，但又意料之內，見到靖王舉起杯，佢好驚想制止，驚靖王一時衝動真係會做蠢事，好彩佢係玩任性大自己父皇，又俾佢搏到，梁帝已經唔敢再輕易失去多一個仔。我呢兩場都cap咗好多圖，慢慢睇胡歌眼神同表情變化好好玩，反而王凱個個圖都唔差太多。我唔覺得金殿呢場好精彩，可能係對手問題，都冇得互擦火花，不過胡歌呢幕表現到宗主嘅冷靜同豁出去嘅決心。值得一提係呢場戲胡歌行禮走位全部都睇到佢有放心機落去，一埋位就宗主上身，見到皇帝行禮仔細認真，每一個身段都係好古人氣質，即使同藺晨果幾場搞笑戲佢都一D唔馬虎。佢同勒東默契好好，藺晨個角色又有笑點，同宗主嘅戲感覺好過同靖王嘅，令我覺得宗主同藺晨感情好似好過同靖王添。
反觀王凱趕去金殿果場行路戲，好心學下古裝行路係點先，手點放腳點行，作為一個太子點都要有D穩重感，既然叫得佢去，即係梁帝要佢睇一D嘢，一定唔會對長蘇出手住，而家表現得太心浮氣躁唔係太適合。入到大殿對父王行禮又好似好求其咁，都未跪好就舉起手，手都未到位就彎身下拜，點解導演收貨架？
我都認為採夏江果幕好有戲，正如夏江話宗主係鬼魂，由地獄歸來嘅鬼魂，佢面上表情冷淡，但眼神中滿係仇恨火焰，冷笑果幾個畫面都令人幾心寒。當一個演員肯放下靚仔樣去做一D有陰暗面嘅角色其實係一個脫變嚟，成日掛住點樣可以靚仔D，反派少少都唔想做嘅係唔會有進步。胡歌嘅梅長蘇有好多面，有時陰險，有時暖男上身，有時沉穩，有時跳皮，有時深情，有時冷漠，唯一同林殊如出一徹嘅係一片赤子之心，悲天憫人，將一切苦難咽下，讓其他人安好。作為林殊，佢得到所有人嘅愛，十幾年光環下嘅生活，佢享盡所有美好；作為梅長蘇，佢陰險算計，有恨佢入骨嘅人，亦有為佢肯賣命嘅人，佢得到好多人尊重，同時亦為好多人帶來傷痛苦難，十三年梅長蘇嘅生命令林殊飽受良心煎熬，我對胡歌嘅梅長蘇只有心痛，根本冇可能討厭佢，即使見到果個魔鬼宗主上身，我都可以為佢搵籍口解釋。古裝嚟講，胡歌演活梅長蘇呢個咁難演嘅角色，真係唔知可以再接咩角色去突破，但我都係鍾意睇佢演古裝多D，佢嘅造型好有古典氣質。
P.S. 呢幾集太多細節寫唔切，又唔想馬馬虎虎，會寫D感想先，劇情細節慢慢補番。唉，我驚餘下4集會喊死，好唔捨得。。。
花旗太太生活在花旗國，留意時差，你問我未必即時答到。
發表於 
返回列表
