hugoma2015 發表於 18-8-31 20:51 
有人咁評價坤哥的演繹方法，點睇？
寧弈演技不及陳坤，哈哈，笑死。
原本我趕寫稿，但見呢個討論姑且講一講我睇法，其實我暫時都未摸清寧弈呢個人嘅底，佢個坑好深吓，同埋你之前講嘅，太多啞迷，太多故弄玄虛，楚王對其他人如是，對父王如是，對辛子硯如是，對鳳知微如是，我睇到而家29集，想番之前至叫做明白多D。呢套劇之唔火，最大問題係太精太想有大格局，但冇考慮到觀眾而家冇心機同你打啞迷，下下都要福爾摩斯上身，仲要識聽同理解到文言文。。。對觀眾要求太高啦，已經比如懿好彩，唔係睇10分鐘就棄劇。
我睇寧弈點解要裝傻扮懵，一來係一個保護色，雖然係浮誇，有人理解佢係傻，正如太子同五皇子相信佢冇殺傷力；二來佢當時形勢想發圍都未夠實力，與其硬碰硬，不如扮下嘢，表明自己實力唔夠，咁偷得時間去籌謀日後都係好事。三，我覺得佢失去母妃，及後三王子被害，佢被監困八年，多多少少都令佢性格上有D孤癖，佢越係裝得無情，心中就越係在意，後來霍老三死、救鳳知微、陳紹臨門一腳改口，慢慢見到楚王係以古靈精怪去掩飾同保護脆弱嘅自己。
最近幾集突別有深刻印象幾場戲：
1）楚王被脫去衣服驗身，佢嘅屈辱同難過係真，殿上因為魏知出計解圍後撲倒地大喊，我覺得呢個係楚王真實嘅怨。
2）楚王見老皇帝，老皇帝話要個盒入面有個人名，而明顯要楚王做呢個箭靶上嘅人，楚王由質問到為趙給使求情，到暗示自己明白老皇帝要佢做咩，擺明知道個老豆當自己係棋子，衰嘢就要個仔做，幫佢揹黑鑊，幫佢唱紅臉白臉，到頭來真正得益又唔係楚王。
3）辛子硯去楚王府，楚王講出自己對父皇做唔到絕情，自苦自傷，果種無力感出晒嚟，佢一方面質疑自己，一方面又控制唔到自己，因為佢其實比任何一個人更重情。
反而我覺得倪妮演技有D尷尬，硬係唔知點咁，除咗高就係平，所以扮男裝係講得過嘅。講起男扮女呢樣算係一個好大嘅BUG，二王子同韶寧要害楚王，請楚王同七王子去魏知屋企作客，當時二王子同韶寧居然以秋明櫻同鳳皓要脅魏知，話係專登請佢嘅娘親同細佬去作客，咁即係二王子同韶寧都知道魏知係鳳知微，但之前冇耐韶寧仲對魏知傾心而死纏爛打，而家突然就知道佢係女扮男嘅鳳知微，呢度好似漏咗D戲喎。金獅王子又係，無端端識得去魏府求親鳳知微。咁多人知佢係男扮女，而老皇帝唔知？欺君犯上咁大件事，兒嬉D啩。
花旗太太生活在花旗國，留意時差，你問我未必即時答到。
發表於 
返回列表
