追完慶餘年2，點講呢？有點覺得期望過高失望大，唔至於唔好睇，又不至於好好睇，有種感覺係因為睇咗1，故事未完，於是追埋2，點知都係未完（其實預咗要睇幾季），第2季因為第1季太驚艷，第2季就顯得平淡，只係講故事，冇咗第1季嘅時不時有驚喜，故事劇情發展出人意表令人興奮。第2季好彩係大部份第1季演員都繼續出現，換人嘅只有配角，新言冰雲最初有少少礙眼，唔關係顏值事，演員其實更有立體感，而係第一集佢好多場都係成日抆嘴呢個小動作唔好睇，好彩後面佢有改善，冇咗呢個小動作，而且越演越好，言冰雲唔再冰，佢同父親言若海獄中一場戲好睇。
另一個換人角色係葉靈兒，由三四線演員韓玖諾換成金晨，點知葉靈兒唔再靈動，冇晒靈性，金晨可能係靚過韓玖諾，但身型太單薄，唔似一個武痴，眼又無神，表情呆滯，要金晨演扮豬食老虎就得，演一個痴迷武藝，既有武夫嘅衝動又甘於為家族放棄自由嘅角色，金晨就係外型都已經輸咗，即係好似張智霖同黃日華演郭靖，點都覺得張智霖個樣過份精明，唔夠老實咁。金晨呢次俾人鬧得好勁，事實佢又真係演得唔多掂，加上整容過度致面容僵硬，嘴同鼻都變型，成日表情目光似雲遊，同二皇子同場應有嘅一顛一萌對比出唔到，更加唔好話CP感，當然，就算韓玖諾同劉端端都未必會有CP感，兩個角色就係有矛盾感、不配搭感，不過韓同劉外型已經有種差異，比較金晨高瘦身型更有萌差感。據聞第3季金晨應該唔會再演。
慶餘年2變成群演劇，范閒戲份明顯被其他角色分薄，好在係配角們演技好，其中林相退場前嘅父子情深令好多人動容，林婉兒問范閒是否早知兄長係策劃牛欄街暗殺及同五竹叔對峙兩幕足夠令李沁吐氣揚眉，林婉兒雖然柔弱，其實佢係一個好有原則同堅韌嘅人。仲有鄧子越，演員演活咗一個由滿有理想到向現實低頭嘅人，希望第3季有更多發揮。
第2季反駁地方唔少，其中最多人吐糟係第1季最後范閒被言冰雲背刺一劍，第2季一開場就要圓美地填呢個坑，但填坑嘅來龍去脈實在太神（雖然呢套劇完全可以情理不通），而且最初幾集氛圍同節奏過於胡鬧，多個角色都向瘋癲方向發展，二皇子成功因為瘋批出圈，長公子繼續發瘋，連慶帝、陳萍萍、影子都不同程度地顛。
唔知係唔係而家嘅人生活壓抑多，瘋批變成亮眼點，慶餘年1時因為范閒夠反常（又正常），到2更係幾乎全員"瘋"走，結尾以為惡戰大宗師葉流雲，雖似雷聲大雨點小，我反而覺得更合情理。
花旗太太生活在花旗國，留意時差，你問我未必即時答到。
所以遲遲唔開睇，最近追「你比星光美麗」追平了，就開睇度華年，意外地覺得都OK，特別聽到張凌赫話「只有沒本事的人才會以妻之弱來彰顯自己的本事」，「作為丈夫對妻子的寵愛不是給她一個金絲鳥籠，而是讓她恣意去做喜歡的事」給說到心裡去
趙今麥好像還是比較適合拍時裝，可能她臉比較圓潤，古裝比較吃虧，反而吳磊亦古亦今
發表於 
返回列表
