4）又一單！原本諗住慢慢追永夜星河，點知開wechat睇到有博主講一個大瓜，12月24日官宣劇集《三人行》開鏡，主演有馬天宇、李明德、徐夢潔，點知1明4日李明德爆料被人解約，不斷於微博出帖投訴話由男一帶資入組，佢被變成男二，又話男一耍大牌，遲到搞到佢要於天寒地凍等候成個鐘，男一唔準時參與圍讀，又講導演偏幫，同男一有路（男一同導演都係男人），有意陰佢推男一取代佢個位，逼佢解約賠錢。微博由星期六下午六七點開始發酵，一直熱搜上榜不退。果晚係騰訊星光大賞，微博上網民戲稱李明德搶晒星光。
劇組去到當晚十點幾先回應，導演話一直趕補拍追進度，放出圖片回應，話之前問過幾多業內人，十個有九個都叫佢唔好用李明德，但導演覺得佢真性情又有熱誠，於是力排眾議點知未開拍已經遲到失聯，後來李自稱有精神病，但保証唔會影響拍攝，但明明開機日又遲到，之後直情失聯，兩日後出現，仲破壞酒店，連洗衣機都整壞，雪櫃、門、牆都有損毀，搞到要賠差不多成萬。中間拍攝又鬧其他演員，行為威脅到其他人，其他演員同工作人員都驚咗佢，最後導演同製作人決定開除佢，並要求賠償，點知李明德先下手為強，話劇組霸凌佢，話單方面被解約，倒咬一口話馬天宇遲到唔睇劇本，仲叫馬天宇賠償幾日嘅拍攝費。劇組稱他損壞酒店財務，李明德坦承此事，但佢話係做「人性小測驗」，「當時我知道他們在給我設套，我這叫將計就計」，他敢做敢當，會負起賠償責任。
好多路人被李嘅行為打動，覺得佢係勇敢發言，對抗資本，為佢正義化身而喝采，佢連線直播，一晚收到嘅打賞好過拍部戲，有人話佢咋錢，佢話唔識關咗接受打賞個制。李兩日漲粉過百萬，熱度一直不退，開始有人話佢佔用公眾資源，而且說話但冇水準，有演員支持馬天宇發微博，冇幾耐就俾佢同黑粉追住鬧，而且言語好侮辱。
馬天宇呢，唔知話佢咩好，回應同導演一樣唔到肉唔扎重點，一大抽字講嘅太溫吞，最失敗係叫人關注抑鬱症病人，被解讀言外之意為叫人有病就去睇醫生，馬天宇自己曾經有過抑鬱症，花咗一段時間至好，佢應該唔係去嘲諷李明德（佢自己承認有精神病，應該係躁鬱症），但而家風口浪尖，剛剛趙露思有病，好多人剛課普完抑鬱症資料，自然好簡單咁聯想成負面意思，就算導演出嚟澄清，因為一早被打成狼狽為奸，兩個人講嘅即使係事實都會被先入為主覺得係合謀霸凌。
李明德經理人公司係和頌傳媒，老板李冰冰於李明德大鬧網絡後即時同佢做切割，將佢由公司除名。呢人反應似乎對李明德不利，如果佢真係有道理的話，相信李冰冰唔會即時放棄佢，過後佢應該唔駛再有人敢搵佢拍劇，不過唔駛驚，總有同情心泛濫嘅粉絲會支持佢，佢已預告會直播帶貨，可能比起拍劇賺得更多更快更容易。
而且後續麻煩嘅應該係劇組同馬天宇，前者要同投資方交代，劇會否因此而拍唔成，或者影響收視（收益）？馬天宇被拍耍大牌、帶資入組、同導演搞曖昧、唔敬業。。。偏偏佢回應得差，被指心虛刪博，直情公關災難好例子，唔知點化解！
個人觀點幾樣嘢：
1）呢套劇係講神秘大齡轉校生荀未來深刻影響了高中生趙左右嘅生活，而荀未來竟然係25年後嘅趙左右，後來仲會出現一個神秘老人，竟然係50年後嘅趙左右，形成了16歲、41歲同66歲三個趙左右嘅奇幻相遇。就咁睇，李明德嘅少年趙左右未必係男一，因為有三個男一，當然戲份或者會有多少，但男一呢個番號冇可能係李明德，佢圈內茄位同演技好到可以壓番馬天宇？李如果睇晒劇本應該唔會覺得自己係男一啩，而家話劇組騙佢係男一。
2）李明德出咗好多微博，亦有好多細節，但時間線有少少問題，佢話12月28日已經寫好離組感言，但29日開機，即係早就準備走？果陣唔爆料？
3）點解和頌老板唔撐佢仲將佢除名？導演話同有關方面協商解約，應該係通過和頌傾，咁和頌又點同李明德講？
4）一個失控嘅藝人，唔理你係真正義定扮慘，去到撕爛面發瘋周圍咬人（包括只係講自己觀點同支持其他人嘅路人），內核唔只唔穩定，直情已經變成火山，演藝事業已經係斷崖式插水玩完，當然佢而家唔駛擔心，已經搵到一大筆快錢，及後可以靠賣慘賣正義繼續搵錢。
5）觀眾都係看瓜食花生好啦，唔好咁傻要去支援明星208，佢地日薪隨時超過普通人一年收入，為佢地打錢送禮支持表示同情，不如好好對自己，有錢的話，行街食飯買嘢獎勵下努力工作嘅自己把啦。
花旗太太生活在花旗國，留意時差，你問我未必即時答到。
發表於 
返回列表
