本帖最後由 rose-mag 於 15-10-15 23:28 編輯
hugoma2015 發表於 15-10-15 16:42 
我第一次睇無喊，因為有少少“眼火爆”，不過第二次睇都是喊左。相對於成個結局黎講，感情線方面既 問題， ...
可能我未睇晒原著，所以我又冇覺得好慶，只係覺得有部份情節唔合理，既然藺晨明白宗主，佢一定知道郡主呢個人，佢亦都見過，同聶鋒解釋點醫嘅時候，郡主一直企喺宗主旁邊，拖晒手，之後宗主好緊張咁拉佢同蒙統領去第二度講，冇理由會唔知郡主對宗主有幾重要，三番幾次提宮羽，又出口幫佢搏宗主歡心，一係藺晨就極度唔鍾意郡主，一係佢就係世紀八公，一係就係個腦有問題。我懷疑係跳拍咗郡主某D戲先或係之後劉濤至入劇組，所以部份劇本寫到唔連貫，可以執走聶鐸呢個人，其實有郡主都可以唔駛要宮羽，或者將宮羽個設定改一改，等劇情變得唔好咁多餘，又話唔想兒女情長搞亂兄弟情君臣義，而家整到跳嚟跳去就更大問題。
事實上去旅遊散心都有少少時間問題，剛剛至完咗件事，話兩三日後出發，跟住果頭就話收到快馬報訊邊境被圍，如果唔講兩三日後出發，話只要咩事完咗就準備，冇個絕對日子會冇咁剛剛遇著啱啱feel，有時電視劇呢D邏輯嘢想多少少就唔會太失真。（的確我係比較奄尖，對於一D細節嘢我好上心。）
遺腹子我又覺得冇都唔係咩問題，有又未必係好，當時林殊已不能名正言順出現人前，而郡主亦於朝堂上表明婚約未癈，自己更以林氏遺屬身份去要求重審，咁嘅情況之下，佢其實唔嫁得林殊就幾乎代表以後都唔可能嫁其他人，即使話後來改嫁梅長蘇都有問題，就算郡主唔介意名節呢D世俗嘢，宗主都唔想佢受屈委，莫講話有個遺腹子，以當時講名份嘅社會，個小朋友係好難立足。
我覺得宗主同郡主嘅感情好含蓄，雖然郡主好多時都已經好主動，換佢自己果句：好輕浮，但見佢地都係點到即止，我地就意猶未盡，但以前古人嚟講又未嘗唔係咁樣，見到有其他地方有觀眾鬧點解封信上寫吾妹霓凰，好似宗主想將佢講到咁疏離，即係當佢係妹咁，想佢之後嫁人，我想話想得太多啦，亦都係以現代人嘅觀點去睇古裝劇嘅問題，唔寫吾妹寫咩？又未拜堂，唔通叫老婆或者愛人又或者吾妻？兄妹之稱除咗真係兄妹外，其實都係情侶之間嘅稱呼，只係比而家現世含蓄一D嘅叫法啫。
你講到同皇帝提到天下乃天下人之天下，當時社會真係驚世駭俗，太前衛啦，唔好話已失原本心志嘅皇帝接受唔到，就算係蔡荃可能都唔得，佢有時太汙腐，反而可能沈追可能看得透。皇帝話就算靖王都俾唔到林燮想要嘅天下，我想林殊受教於黎祟、林燮，更應該係同靖王一樣好仰慕祈王，正因為幾個都係有學問有高風亮節嘅人，所以林殊可以講得出呢個所謂烏托邦係咩一回事，並非遙不可及，而係在權力慾控制慾面前失卻心志，林燮同言侯去行走過江湖，多少有D閱歷，見過民間疾苦，梁帝坐於朝堂上，一聽不見民意，二察不到民情，當一切以為理所當然嘅時侯，追求嘅只係無盡嘅物慾同私利。
書刨完郡主揭穿宗主係林殊果章，雖然結局不同，依然係好催淚，郡主都有話唔再離開林殊哥哥，但宗主話「已經錯過的歲月，和已經動過的心，都像是逝去的河水，永遠也無法倒流。我已經累了十二年，不想再看到身邊重要的人因為我的存在而痛苦，這樣我也可以輕鬆很多，你說是不是？」宗主嘅愛情觀就係所謂真愛（曾經何時都有人同我講差不多嘅嘢，好彩果個係我而家老公，所以而家我都好幸福），若你唔愛我，我都希望你好，會幫你令你好，可以犧牲自己去成全自己所愛嘅人先為愛之最純粹。
景睿嘅選擇論都係好有啟發性，的確人世間太多不能控制不能盡如人意，如果每樣不合意嘅都要怪人，咁世間上仲有幾多美好？人生又有咩幸福可言？
我同意宗主整治嘅都係罪有應得嘅人，夏江、謝玉、慶國公、譽王、太子。。。個個都有要還嘅債，只係過程中搭上不少無辜人命，我最感慨係九安山獵宮謀反果一段，五萬慶曆軍得番一半，蒙統領手下禁軍得番三份一唔夠，兩陣廝殺對壘嘅都同係大梁子民，只係各為其主，有D死咗都唔知原來自己幫緊人謀反，就如衛錚所講，七萬赤焰軍有好多死果陣都唔知點解，我除咗覺得九安山果20分鐘畫面拍得好精彩（以打仗細節而言），其實我一邊睇一邊唔開心，蒙統領話殺呀～佢為咗保護自己忠於嘅皇帝之外，其實佢殺死嘅都係自己國人，唔怪得佢，為生存個個都可能會手上染D鮮血，就算放之於現世，職場上上位，無可避免會要踩住人，就算唔係有心去害人踩人，總係會有些時候要運用手段，每個人都有陰暗面，好多嘢當時覺得係傷害，時間耐咗又可能唔係真係一件壞事，就好似蕭景睿去完南楚一年後回歸，思想變得更清明。講起蕭景睿，最後幾集有個bug，蕭景睿雖則唔係謝玉個仔，謝玉壞事做盡，但不竟係有份養大佢愛錫佢，當佢果段同蒞陽講起謝玉，佢居然稱呼為謝侯，而唔係父親，我覺得以景睿心胸咁闊又重情嘅人，點都稱呼一聲父親，而唔係謝侯咁生外，不竟當時謝玉已死，一向傳統都係死者為大，所有過去罪孽都應該煙消雲散，何況係喺自己母親面對，我總係覺得有D唔妥當。
追咗兩個星期，捱咗咁多晚夜，我要休息下先，等下個星期再開始由頭睇過，到時就由第一集開始寫，我覺得好似以前寫論文都冇咁認真，呵呵。
花旗太太生活在花旗國，留意時差，你問我未必即時答到。
,其實加返段穆青長大了,正式接掌雲南,讓郡主陪宗主一起去有咁難咩.
其實尋晚冇睇,訓個好覺今朝睇仲好.
發表於 
返回列表
