想生BB 今日: 0|主題: 109582

照姑娘同我約o既時間, 8:30am 上到去 K5N, 到登記處, 攞張紙返去S座交錢, 跟住拎番晒D文件返上去K5N, 坐底等叫名, 咁我就睇住報紙黎減壓, 等左唔知幾耐, 終於叫我名喇.....入到房, 姑娘好 nice 架, 把聲都幾甜, 跟住就講解點用枝藥, 同埋 confirm 多次 day 1 係幾時, 咁佢就叫我由頭做多次點組合枝藥, 及確保我記得點噴, 噴鼻時間係 6:00am, 12:00noon, 6:00pm, 11:00pm, 一定要日日定時定候噴鼻, 直至通知我唔須要噴為止, 跟手約埋 15/4 返去照超聲波同抽血驗, 而老公亦要再一次驗精子, 約左 3/4 朝早拎精子上去.

2009-04-04

今日第一日噴鼻, set 定鬧鐘, 鬧鐘一響, 照住瑪麗姑娘教我個方法噴左, 咦....無乜感覺噴左咁, 但係又唔可以噴多次喎, 因為姑娘話唔可以噴多次架, 會影響劑量, 咁我咪等 12:00noon 果次噴完睇下係咪都無感覺先, 點知, 12:00noon 呢次噴完之後, d 藥流落喉嚨度喎, 仲有少少苦添...

2009-04-15

4/4 開始噴鼻, 至今日已經係第12日, 今日(Day 5)返去瑪麗照超聲波, 因為第一次去照的關係, 都幾緊張架! 先交$60診金就上去 K5N, 等左都幾耐先到我, 入到房見到係 dr. ng, 同佢講聲早聲就比嬸嬸叫我除晒 d 褲上床,

準備好晒, dr. ng 埋位黎照喇....照照下我先知有一個女醫生響佢旁邊, dr. ng 不斷咁同個女醫生講左好多野, 我聽到 dr. ng 話右邊有5粒, 左邊有4粒, 好開心呀, 夾埋有 9 粒呀, 我諗成績應該唔錯, 呢個係好開始, 希望黎緊日子都順順利利啦...照完超聲波, 原來仲要抽血, 跟住姑娘話聽日開始打針喇, 心裏面諗, 終於都到喇....好快就做 ivf 喇!

2009-04-16

今日第一日打針, 原來好鬼痛架, 最痛唔係枝針吉入 pat pat 果下, 係注射藥水果下最鬼痛, 個過程相當快, 打完針就返工 lu....

2009-04-21

第六日打針, 打針時問姑娘我而家打針係幾多劑量, 原來我頭兩日係打 300iu, 佢話會比較痛 d 架喎, 咁第三日開始...每日打150iu, 佢仲話如果我反應好的話, 應該會多50%卵泡架, 加埋上次照到果9粒, 咪有可能有14-15粒囉!

2009-04-23

第八日打針+照超聲波, 今日都係 dr. ng 幫我照超聲波, 都幾開心, 我聽到 dr ng 話我 d 卵泡有 9-12mm, 我從個 mon 度見到 d 卵泡迫埋一齊, 好多粒呀, dr. ng 話要繼續噴鼻同打針, 佢話估計要打到 27/4 (星期一), 同埋星期一呢日都會再照超聲波喎, 果日會再決定係咪星期三抽旦旦!

2009-04-27

第十二日打針+照超聲波, dr ng 放假, 改另一位女醫生幫我照旦旦, 我都唔知有幾多粒呀, 只係知道 d size 唔錯, 細o既有18mm, 大o既有成20mm, 其中最大係 22mm, 醫生話 29/4 (星期三) 朝早入院取卵, 咁今晚11:30 就返去打夜針(佢無講係咩針, 我估係排卵針), 星期五(1/5)就放番旦旦入去架喇.... 照完就等打針, 呢針係最後一針喇...好野~~

2009-04-29

抽旦旦時間係11:30, 咁c6要12:00n 交丁丁返去, 佢響屋企留架, 跟住飛的返去瑪麗囉, 因為要一個鐘頭內交返去.....入到手術室, 我慢慢趴上床, 醫生一幫我打麻醉針就開始黎料喇...當d麻醉藥發作o既時候, 醫生就"動工"喇, 開頭都仲頂得住, 但係越黎越唔掂, 由於我d旦旦集中響右邊, 所以右邊抽左好耐, 咭得好痛, 最後果幾下直頭痛到成身震架, 醫生仲叫我忍下啦, 止緊血呀, 少痛架咋....嘩...邊係呀, 痛到c呀, 當手術完左之後, 我好隱約聽到佢話抽到11粒, 果下個心真係定左落黎, 11粒喎, 成績應該ok啦, 應該有大把雪旦用呀...手術一完, 我未落床就嘔到痴肺, 係咁嘔, 大概嘔左三次就好d喇, 慢慢扒番落去張輪椅到, 嬸嬸推番我上床休息, 老公就響側面唔知攪咩, 佢同嬸嬸講左d咩, 我已經好模糊, 只係感覺到佢幫我抹汁....唔知訓左幾耐就醒, 仲係好想嘔, 一飲水就嘔, 但係又好肚餓喎, 好想好想有件牛扒放響我面前呀....訓醒又嘔, 嘔完又訓, 唔知嘔左幾多次, 終於訓到5點幾就唔想嘔喇, 所以就打比老公叫佢黎接我出院, 呢日老公都算係咁喇, 佢全程響醫院等我, 又幫我攞藥, 佢話等攞藥都等左成2個鐘呀, 又話等到好肚餓咁, 講到不知幾可憐, 我忍唔住問佢, 家下究竟邊個可憐先...佢就即時收聲, hoho....

2009-05-01

雖然抽到11粒, 可惜...真係好可惜只有4粒分裂, 姑娘話雖然有4粒分裂, 但可惜只有2粒可以用, 其餘果2粒質素唔好, 唔用得, 咁即係話我已經無雪旦可以用, 講真, 果陣我真係差D喊出黎架喇, 我一心諗住今次唔會成功架麻, 我期望下次FET架, 因為我見好多SISTER都係放雪胎至成功. 放旦唔算辛苦, 仲好快就攪掂添, 跟住嬸嬸推左我去一間房度休息, 老公都有入黎陪我....到左下午1:00就出院喇....醫生無比藥我塞呀, 一放完胎就同我打左一針, 7/5 再返去打多一針, 18/5 返去驗!

2009-05-02

有 M 痛 feel , 我好疑惑, 個心好亂....

2009-05-14

煮晚飯前去廁所, 發現M小姐靜悄悄地黎左, 我呆坐左十分鐘, 好奇怪, 我無喊到.....

2009-05-17

17/05晚開始黎m, 一路都無血塊出現過, 下午去廁所時, 一抹....竟夜有一舊於紅得黎又似似地肉色o既野....我呆左...我好驚, 唔知係咩黎, 肯定同平時d m 血塊係唔一樣架...

2009-05-18

因為14/5已經 m 到, 所以無留到小便拎去驗, 點知去到...職員小姐叫我都要留喎, 咁唯有拎番個樽仔出黎留小便, 好快就叫我個名喇....入到去係見個女醫生, 我初時以為係見dr ng架...不過算啦, 都一樣o者, 當醫生同我講果結果係失敗時, 我都預左啦, 無咩野, 跟住佢問我打唔打算再試多次, 果一刻....我無出到聲....d 眼淚忍唔住流左落黎...靜左一陣, 我點一下頭....佢再繼續同我講, 話我d卵子ok架, 抽到11粒已經好好, 同埋老公d精子亦都唔錯, 所以當初決定唔須要做icsi, 而且亦唔知點解d精子游唔到入去卵子度, 佢話要同教授開會先知點解, 同埋會盡快排個快期比我, 不過因為之前用咁多針藥, 唔可以咁快再開始做ivf, 起碼要等3個月, 要清晒之前剩落黎o既卵泡先得! 佢再問我有無d咩唔舒服, 於是我就講左尋日o既事比佢知, 佢話係d內膜脫落喎, 我其實都唔係好記得, 因為我果陣已經唔多聽得入耳.....我又再問醫生, 老公d精子算唔算合格, 佢話今次ivf老公的精子報告唔錯, 唔須要icsi, 因為如非必要, 都唔會做icsi, 因為吉旦時, 拔番枝針出黎時, 唔知會帶走卵子裏面d咩野....雖然無野証明到真係會有影響, 但由於估計唔到將來有咩影響, 所以今次ivf都無幫我地做icsi....
跟住就去排期見醫生, 最快都要6月先返去見, 我諗, 所有野都要到時先知, 等醫生決定啦....

2009-06-26

呢日下午返去見醫生, 其實都無咩特別, 見左醫生就排期做第二次 ivf 囉, 因為無雪旦的關係, 我又要重新黎過, 噴鼻, 打針, 抽旦.......睇住醫生揭開本簿時, 我見佢揭到 10 月時, 個心沉一沉, 成個 10 月的期都 full 晒, 所以要排到 11月, 我仲係 11 月的第一個, 唉.....

2009-10-02

day 2, 重新開始, 通知瑪麗今日 day 2, 之後要做的事, 同之前一樣, 比 $$, 攞噴鼻藥, 準備第二次 ivf

2009-10-21

開始噴鼻, 時間一樣, 6:00am, 12:00noon, 6:00pm, 11:00pm

11月4日就要返去照超聲波喇, 希望一切順利!