第22集筆記：
。海總完美示範商場如戰場，你有咩事都好，對手唔等你，朋友都唔會等你，佢撬走惠成功雖然係乘人之危，但對於自己對於惠成功，佢無疑係作出最好決定。
。惠成功睇到機會無可厚非，佢都好努力，喺秋冬唔可以處理客戶委托嘅工作時替佢去做，唔可以話佢完全冇私心想証明自己嘅能力搏表現，但其實都算係有情義，只係佢果頭鬧熊青春朝秦暮楚，又同賈依玫嘈到風風火火，呢頭自己其實都做同樣嘅事，傷害咗一個栽培自己嘅上司，道理上冇錯，等埋獎金至辭工係人之常情，但情理上係棄朋友不顧，係不仁不義，最反感係之後返去執嘢走時仲懶係提點秋冬，話佢同熊青春都係因為秋冬冇咗激情至離開，呢度真係太矯情啦，佢呢種只睇到眼前蠅頭小利嘅人，眼光太短淺，一朝得志就語無倫次，早走早安樂。
。林拜講得啱，走去棵樹搵番個森林，最初林拜都好現實，佢係獵頭界嘅高級職員，面對嘅都係行業高端人士，因為秋冬冒充覃飛被擺了一度，同秋冬劃清界線都無可厚非，經過法國銀行果次後，林拜對秋冬嘅為人已作肯定，甚至敢於喺袁昆面前補佢。熊同惠嘅背叛，林拜以行動作表示，幫秋冬點兵，搵到田堯，又幫佢助陣面試，所謂塞翁失馬，焉知非福。同時林拜又將慧獵做唔到嘅一單生意介紹俾秋冬，成功嘅自然豬籠入水，失敗嘅都有錢落袋，經濟上林拜又扶佢一把，而且去北京一舉兩得，等佢去搵羅伊人，又走開下，希望會因有工作在身，令秋冬可以快D忘記傷痛。
。賈依玫冇咗熊同惠，以老員工自居，開始打秋冬主意，秋冬要去北京，田堯初入公司挑大樑，賈居然提出陪秋冬去北京，想乘虛而入，真係想得太美，司馬昭之心呀～
。伊人同于成飛應該冇戲，但伊人唔知秋冬同青春分咗手，刻意誤導秋冬，平白又錯過。
花旗太太生活在花旗國，留意時差，你問我未必即時答到。
發表於 
返回列表
