本帖最後由 rose-mag 於 17-11-21 23:17 編輯
第25集筆記：
。秋冬去接近曲閩京太過唐突太過急進，一方面佢唔想一嚟就表明身份，因為曲已拒絕袁昆在先，多少對獵頭嘅意圖有負面感覺，二來鄭秋冬想用誠意同好意打動曲，但問題喺曲於官場上打滾一段日子又正值參與競選區長，加上心高氣傲，曲對於秋冬嘅意圖更有懷疑，相片嘅誤會，秋冬個老底，曲全盤否認秋冬嘅人格，唔只唔相信秋冬，更覺得秋冬係有心害自己。
。點解曲閩京唔識塗方至？呢度後面當佢同塗方志見面時會有解釋。題外話，曲閩京後生果張相P得差咗D，一睇就知係key個頭上去，根本都係人頭同身唔夾。
。點解秋冬要提山谷集團？唔提咪冇咁易露底囉！或者係，但點解秋冬會講自己喺山谷做過人力資源？咁咪正正為曲開咗一扇門，好提唔提去提山谷，自作孽吧！非也，正正係秋冬想做好人，佢喺山谷時，除咗借用覃飛身份呢個污點外，其實作為人工資源總監，佢係有能力嘅，孟總都不得不承認佢嘅貢獻，於是心底處，秋冬係冇特別意識到要隱瞞曾經喺山谷做過職員，加上山谷上市後嘅發展，曾經為山谷職員其實係一個資本，亦為打開話匣子嘅技倆，當人聽到佢曾係山谷職員，即刻另眼相向。秋冬甚至有為自己果段山谷工作嘅日子感到榮幸，佢渡過咗一段艱難日子，亦由谷底走出，雖然日子唔係富裕，但當時係開心嘅，亦都幫佢重建信心，知道自己係有能力嘅，因此潛意識更加唔會避諱去隱瞞曾為山谷職員嘅身份。呢一點反而見到秋冬的確有心改過，佢冇心思細密到刻意隱瞞自己嘅過去，因為佢冇想過曲會去查佢個底，呢樣係秋冬成長為專業獵頭必須要學習嘅其中一樣。
第26集筆記：
。曲閩京其實都好錫個女，但佢一直都仲戀棧官場，從未想過改變現狀，亦都唔察覺老婆同個女嘅需要，骨子裡佢都係一個大男人，正如佢舅仔所講，曲係一個心高氣傲嘅人，唔肯聽人講，佢未必係唔清楚現實，反而係因為太自負而唔肯面對現實。鄭秋冬做嘅一切，曲閩京一直以懷疑態度去睇，即使秋冬所講嘅都係有極高可信性，曲都選擇唔信任，佢心裡有數換屆自己冇戲，但打從心裡就係唔想信，亦對點出呢件事嘅秋冬更厭惡。
。獵頭行業要玩心理戰，要點樣出手上嘅牌，牌面大細估量，環環相扣，對於消息分析同探聽情報都似乎缺一不可，當然去到咁細，要獵嘅唔會係中低層員工。
。呢集最精彩應係曲鄭兩人攤牌對話果段，曲閩京因為鄭秋冬多番紏纏，加上起到佢覃飛個底，再誤會佢係展天嘯派嚟坑佢嘅人，曲提到鄭不光彩嘅過去，鄭始料不及，在毫無準備下崩潰，成個人曚咗，佢一時間唔可以面對。喺警署外咆哮「有病呀，我只是想吹吹風」加眼紅紅果下算係自我發洩吧，亦係演技亮點之二。
。秋冬最不堪嘅時候永遠都有羅伊人在，羅伊人每次都可以毫無顧忌咁直指要害，果句「你哭過」、「你已經是騙子了」只有羅伊人講出嚟至唔會令秋冬抗拒。當伊人聽到秋冬點解仲要去進行獵頭，佢唔想做平庸嘅普通人，伊人不動聲色去幫佢，佢果句「你不必對我交代」，秋冬另外兩個女朋友又可以做到義無反顧去盡力幫秋冬嗎？
。題外話：上兩集見到灰鷂，今集見到沈追大人，真係好出戲。
花旗太太生活在花旗國，留意時差，你問我未必即時答到。
發表於 
以為呢套戲係講商場d陰險、奸炸，點知原來係愛情片
返回列表
